“Tikhameni Hi Mianakanyo Yo Titsongahata”
“Xikwembu xi lwisana ni lava titlakusaka, kambe lava titsongahataka xi va nyika musa lowu nga faneriwiki.”—1 PETRO 5:5.
1, 2. Hi yihi mixaka mimbirhi leyi nga faniki ya mimboyamelo ya mianakanyo leyi khumbaka mahanyelo ya vanhu hi ndlela yo hlawuleka?
EKA mimboyamelo ya mianakanyo leyi Rito ra Xikwembu ri hi tsundzuxaka ha yona ku ni mixaka mimbirhi leyi nga faniki. Hayimbirhi yi khumba mahanyelo ya vanhu hi ndlela yo hlawuleka. Mboyamelo wun’wana i “mianakanyo yo titsongahata.” (1 Petro 5:5) Xihlamusela-marito xi vula leswaku “ku titsongahata” i “ku va ni mahanyelo kumbe moya lowunene: ku pfumala vutikukumuxi.” Ku va ni mianakanyo yo titsongahata swi vula ku verhama, naswona Xikwembu xi yi teka yi ri mfanelo leyinene ngopfu.
2 Mboyamelo lowun’wanyana i vutikukumuxi. Swi vula “ku tivona ku tlula mpimo,” ku “titlakusa.” I mboyamelo wa vutianakanyi, naswona wu susumetela munhu ku hlongorisa swilo leswi vonakaka, swilo leswi enerisaka yena ni swin’wana, hambiloko swi siya van’wana va vavisekile. Bibele yi kombisa vuyelo byin’wana bya mukhuva wolowo yi ku: ‘Munhu u fume munhu-kulobye ku n’wi endla swo biha.’ Yi vula leswaku ‘ku kwetlembetana’ i “ku lanḍa mheho” hikuva loko munhu a ya esirheni, “o ta ya a nga tamelanga ntšhumu.” Vutikukumuxi byo tano byi bihe ngopfu emahlweni ka Xikwembu.—Eklesiasta 4:4; 5:15; 8:9.
Moya Lowu Lawulaka Misava
3. Hi wihi moya lowu lawulaka misava?
3 Eka mimboyamelo leyi yimbirhi ya mianakanyo, hi wihi lowu vonakaka ngopfu emisaveni namuntlha? Hi wihi moya lowu lawulaka misava? World Military and Social Expenditures 1996 yi ri: “A ku na lembe-xidzana leri fanaka ni ra vu-20 loko swi ta eka madzolonga . . . ya nsele.” Mphikizano wa ku fuma tiko ni ikhonomi—kun’we ni nkwetlembetano wa matiko, vukhongeri, tinyimba ni tinxaka—swi vange leswaku ku dlayiwa vanhu vo tlula 100 wa timiliyoni eka lembe-xidzana leri. Ku va munhu a lava ku tihanyela hi ndlela yakwe swi tinyike matimba. Chicago Tribune yi te: “Mikhuva ya vanhu yi katsa madzolonga ya nsele, ku khoma vana hi ndlela yo biha, ku dlaya vukati, vudakwa, AIDS (SIDA), ku tisunga ka vana va kondlo-a-ndzi-dyi, swidzidzirisi, tinsulavoya ta le switarateni, ku pfinya, ku hunguka, ku susa khwiri, swifaniso swa vanhu lava nga ambalangiki, . . . ku hemba, vukanganyisi, manyala ya swa tipolitiki . . . Leswinene ni leswo biha a swa ha hambanisiwi.” Hikwalaho, UN Chronicle yi te: “Mahanyelo ya vanhu ma hohloka.”
4, 5. Moya wa misava wu hlamuseriwe kahle hi ndlela yihi evuprofeteni bya Bibele lebyi vulavulaka hi nkarhi wa hina?
4 Swiyimo leswi swi le misaveni hinkwayo. Swi hilaha vuprofeta bya Bibele byi vuleke hakona malunghana ni nkarhi wa hina: “Emasikwini yo hetelela ku ta fika minkarhi ya mangava leyi swi nonon’hwaka ku langutana na yona. Hikuva vanhu va ta va lava tirhandzaka, varhandzi va mali, lava titivaka, lava titlakusaka, vasandzi, lava nga yingisiki vatswari, lava nga nkhensiki, lava nga tshembekiki, lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene, vaxengi, lava omeke tinhloko, lava tikukumuxaka hi ku tinyungubyisa.”—2 Timotiya 3:1-4.
5 Wolawo i mahlamuselelo lama pakanisaka ya moya lowu lawulaka misava leyi. I langutelo ra vutianakanyi. Ku phikizana ka matiko ku kombisiwa hi ndlela leyi vanhu va phikizanaka ha yona. Hi xikombiso, emintlangweni yo phikizana, vatlangi vo tala va lava ku va vo sungula, ku nga khathariseki leswaku sweswo swi va vavisa njhani van’wana emintlhavekweni kumbe emirini. Moya lowu wa vutianakanyi wu dyondzisiwa vana naswona wu hambeta wu khumba vanhu lava kuleke etimhakeni to tala. Wu vanga “vulala, dzolonga, mavondzo, swifafa, ku kanetana, ku avana.”—Vagalatiya 5:19-21.
6. I vamani lava kondletelaka vutianakanyi, naswona Yehovha u titwisa ku yini hi moya wo tano?
6 Bibele yi komba leswaku moya wa vutianakanyi wa misava leyi wu fana ni wa ‘loyi a vuriwaka Diyavulosi na Sathana, loyi a xisaka misava hinkwayo leyi akiweke.’ Malunghana ni nhlohlotelo lowu Sathana a nga na wona ehenhla ka vanhu lava hanyaka emasikwini lawa yo hetelela lama nonon’hwaka, Bibele yi ri: “Khombo eka misava . . . hikuva Diyavulosi u xikele eka n’wina, a hlundzukile swinene, hi ku tiva leswaku u ni nkarhi wo koma.” (Nhlavutelo 12:9-12) Hikwalaho, yena ni mademona yakwe va tinyiketele hi matimba ku kondletela moya wa vutianakanyi eka vanhu. Kutani ke, xana Yehovha u titwisa ku yini hi langutelo ro tano? Rito rakwe ri ri: “Munhu uṅwana ni uṅwana l’a tikurisaka hi mbilu, i manyala e ka Yehova.”—Swivuriso 16:5.
Yehovha U Rhandza Lava Titsongahataka
7. Yehovha u va languta njhani lava titsongahataka, naswona u va dyondzisa yini?
7 Hi hala tlhelo, Yehovha u katekisa lava nga ni mianakanyo yo titsongahata. Loko Hosi Davhida a yimbelelela Yehovha risimu, u te: “U ta ponisa vanhu lava titsongahataka; kambe mahlo ya wena ma venga lava titlakusaka leswaku u va yisa ehansi.” (2 Samuwele 22:1, 28, NW) Hikwalaho, Rito ra Xikwembu ra hi tsundzuxa: “Lav̌ani Yehova, ṅwina, v̌atiṭongahati hikwav̌o v̌a tiko . . . Lav̌ani ku lulama, mi lav̌a ku tiṭongahata; kumbe mi ta tifihla e sikwini ra v̌ukari bya Yehova.” (Sofoniya 2:3) Lava va lavaka Yehovha hi ku titsongahata va dyondzisiwa hi yena leswaku va va ni moya lowu hambaneke hi ku helela ni wa misava leyi. “[U ta] dyonḍisa la’v̌a tiṭongahataka e ndlela ya yena.” (Pisalema 25:9; Esaya 54:13) Ndlela yoleyo i ndlela ya rirhandzu. Yi sekeriwe eku endleni ka leswinene hi ku ya hi mimpimanyeto ya Xikwembu. Hi ku ya hi Bibele, rirhandzu leri, leri lawuriwaka hi misinya ya milawu, “a ri tikurisi, a ri tikukumuxi, . . . a ri lavi leswi vuyerisaka rona ntsena.” (1 Vakorinto 13:1-8) Nakambe ri tikombisa hi mianakanyo yo titsongahata.
8, 9. (a) Rirhandzu leri lawuriwaka hi misinya ya milawu ri suka kwihi? (b) I swa nkoka ku fikela kwihi ku tekelela rirhandzu ni ku titsongahata loku Yesu a ku kombiseke?
8 Pawulo ni Vakreste van’wana va lembe-xidzana ro sungula va dyondze rirhandzu ra muxaka lowu eka tidyondzo ta Yesu. Yesu yena u ri dyondze eka Tata wakwe Yehovha, loyi ha yena Bibele yi nge: “Xikwembu i rirhandzu.” (1 Yohane 4:8) Yesu a a swi tiva leswaku Xikwembu a xi rhandza leswaku a hanya hi nawu wa rirhandzu, kutani u endle tano. (Yohane 6:38) Hikokwalaho a veke ni ntwela-vusiwana eka lava tshikileriweke, swisiwana ni vadyohi. (Matewu 9:36) U te: “Tanani eka mina, n’wina hinkwenu lava tirhaka hi matimba ni lava tikeriwaka hi mpingu, kutani ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata.”—Matewu 11:28, 29.
9 Yesu u kombise vadyondzisiwa vakwe nkoka wa ku tekelela rirhandzu ni ku titsongahata ka yena, loko a va byela a ku: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) A va ta va vanhu lava hambaneke ni misava leyi ya vutianakanyi. Hikokwalaho Yesu a vuleke leswi landzelaka hi valandzeri vakwe: ‘A hi va misava.’ (Yohane 17:14) E-e, a va tekeleli moya wa misava ya Sathana wa ku tikukumuxa ni wa vutianakanyi. Ku ri na sweswo, va tekelela moya wa rirhandzu ni wa ku titsongahata lowu Yesu a wu kombiseke.
10. Yehovha u endla yini hi vanhu lava titsongahataka enkarhini wa hina?
10 Rito ra Xikwembu ri vule ka ha ri emahlweni leswaku emasikwini lawa yo hetelela, vanhu lava titsongahataka a va ta hlangana va va vandla ra misava hinkwayo leri nga ni rirhandzu ni leri titsongahataka. Hikwalaho, hambileswi vanhu va Yehovha va hanyaka exikarhi ka misava leyi yaka yi va ni manyunyu, va kombisa langutelo leri hambaneke—mianakanyo yo titsongahata. Vanhu vo tano va ri: ‘A hi tlhandlukeleni entshaveni ya Yehovha [vugandzeri byakwe bya ntiyiso lebyi tlakukeke], kutani u ta hi dyondzisa tindlela ta yena, ivi hi famba etindleleni ta yena.’ (Esaya 2:2, 3) Timbhoni ta Yehovha hi tona ti vumbaka vandla leri ra misava hinkwayo leri fambaka etindleleni ta Xikwembu. Exikarhi ka tona ku ni “ntshungu lowukulu [lowu andzaka], lowu a ku nga ri na munhu la kotaka ku wu hlaya, wu huma eka matiko hinkwawo ni tinyimba hinkwato ni vanhu hinkwavo ni tindzimi hinkwato.” (Nhlavutelo 7:9) Ntshungu lowu lowukulu sweswi wu endliwa hi vanhu va timiliyoni. Xana Yehovha u va letela njhani leswaku va va lava titsongahataka?
Ku Dyondza Ku Va Ni Mianakanyo Yo Titsongahata
11, 12. Malandza ya Xikwembu ma yi kombisa njhani mianakanyo yo titsongahata?
11 Moya wa Xikwembu lowu tirhaka eka vanhu va xona lava tiyimiseleke wu va pfuna ku dyondza ku hlula moya lowo biha wa misava ni ku kombisa mihandzu ya moya wa Xikwembu. Mihandzu ya kona yi kombisiwa hi “rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma.” (Vagalatiya 5:22, 23) Leswaku malandza ya Xikwembu ma kota ku va ni timfanelo to tano, ma tsundzuxiwa leswaku ma nga “tshuki [ma] tikurisa, [ma] pfuxa ku phikizana, [ma] va ni mona eka van’wana.” (Vagalatiya 5:26) Hilaha ku fanaka, muapostola Pawulo u te: “Ndzi byela un’wana ni un’wana kwalaho exikarhi ka n’wina leswaku a nga tiehleketeleli ku tlula mpimo lowu a faneleke ku tiehleketelela ha wona; kambe a a ehlekete hi xikongomelo xo va ni mianakanyo leyi hlutekeke.”—Varhoma 12:3.
12 Rito ra Xikwembu ri byela Vakreste va ntiyiso ri ku “mi nga endli nchumu hi ku kanetana kumbe hi ku tikurisa, kambe hi mianakanyo yo titsongahata mi teka van’wana [malandza ya Xikwembu] va ri lava tlakukeke eka n’wina, mi nga veki tihlo etimhakeni ta n’wina ntsena, kambe ni le timhakeni ta van’wana.” (Vafilipiya 2:3, 4) “Un’wana ni un’wana a a hambete a lava leswaku ku pfuneka un’wana, hayi yena n’wini.” (1 Vakorinto 10:24) Ina, “rirhandzu [ri] aka” van’wana hi marito ni swiendlo leswi nga riki swa vutianakanyi. (1 Vakorinto 8:1) Ri kondletela ntirhisano, hayi mphikizano. Moya wa vutianakanyi a wu laveki exikarhi ka malandza ya Yehovha.
13. Ha yini munhu a boheka ku dyondza ku va ni mianakanyo yo titsongahata, naswona u swi dyondza njhani?
13 Hambiswiritano, leswi hi tswariweke hi nga hetisekanga, ni mianakanyo yo titsongahata a hi tswariwi hi ri na yona. (Pisalema 51:5) Mfanelo leyi yi fanele yi dyondziwa. Naswona leswi swi nga nonon’hwela lava nga dyondzisiwangiki tindlela ta Yehovha loko va ha ri vatsongo, kambe va ti amukeleke hi voxe loko se va kurile. Ana se vumunhu bya vona a byi lawuriwa hi malangutelo ya misava leyi ya khale. Kutani va fanele va dyondza ku “cukumeta vumunhu bya khale lebyi fambisanaka ni ndlela ya [vona] yo sungula ya ku tikhoma,” kutani va “ambala vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.” (Vaefesa 4:22, 24) Hi ku pfuniwa hi Xikwembu, vanhu lava tshembekaka va nga swi kota ku endla leswi xi va kombelaka swona: “Tiambexeni xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha.”—Vakolosa 3:12.
14. Yesu u ku sole njhani ku lava ku titlakusa?
14 Vadyondzisiwa va Yesu va boheke ku swi dyondza sweswo. Se a va ri vanhu lava kuleke loko va va vadyondzisiwa vakwe naswona a va ngheniwe swinene hi moya wa misava wa ku phikizana. Loko mana wa van’wana vambirhi exikarhi ka vona a lave leswaku vana vakwe va kuma swikhundlha leswi tlakukeke, Yesu u te: “Vafumi va matiko va [tikisela vanhu] naswona vanhu lavakulu va ma lawula. A swi fanelanga swi va tano eka n’wina; kambe mani na mani la lavaka ku va lonkulu exikarhi ka n’wina u fanele ku va mutirheli wa n’wina, naswona mani na mani la lavaka ku va wo sungula exikarhi ka n’wina u fanele ku va hlonga ra n’wina. Tanihi leswi N’wana wa munhu [Yesu] a nga telangiki ku tirheriwa, kambe u tele ku tirhela ni ku nyikela moya-xiviri wakwe wu va nkutsulo wa lavo tala.” (Matewu 20:20-28) Loko Yesu a byele vadyondzisiwa vakwe leswaku va nga ringeti ku titlakusa hi ku tirhisa swithopo, u ye emahlweni a ku: “N’wina hinkwenu mi vamakwavo.”—Matewu 23:8.
15. Lava va lavaka ku fikelela ntirho wa ku va valanguteri va fanele va va ni langutelo rihi?
15 Mulandzeri wa ntiyiso wa Yesu i nandza, ina i hlonga ra Vakreste-kulobye. (Vagalatiya 5:13) Leswi swi tano ngopfu-ngopfu eka lava va lavaka ku fanelekela ku va valanguteri evandlheni. A va fanelanga va lwela ndhuma kumbe matimba; a va fanelanga va ‘tikisela lava nga ndzhaka ya Xikwembu, kambe va fanele va va swikombiso eka vona.’ (1 Petro 5:3) Kunene, moya wa vutianakanyi i xikombiso xa leswaku munhu a nga byi fanelekeli vulanguteri. Munhu wo tano a nga onha vandlha. Ina, a swi hoxanga ku “lwela ku fikelela ntirho wa ku va mulanguteri,” kambe sweswo swi fanele swi vangiwa hi ku navela ku tirhela Vakreste van’wana. Ntirho lowu a hi xikhundlha xa ndhuma kumbe matimba, hikuva valanguteri va fanele ku va van’wana va vanhu lava nga ni mianakanyo leyi titsongahataka swinene evandlheni.—1 Timotiya 3:1, 6.
16. Ha yini Diyotrefo a soriwile eRitweni ra Xikwembu?
16 Muapostola Yohane u hi tsundzuxa hi munhu loyi a a ri ni langutelo ro biha, a ku: “Ndzi tsalele vandlha swin’wana, kambe Diyotrefo, loyi a lavaka ku tiveka emahlweni ka vona, xin’wana ni xin’wana lexi humaka eka hina a nga xi amukeli hi xichavo.” Wanuna loyi a a nga kombisi xichavo eka van’wana leswaku a ringeta ku tlakusa xikhundlha xa yena. Ematshan’weni ya sweswo, moya wa Xikwembu wu susumetele Yohane leswaku a nghenisa marito yo sola Diyotrefo eBibeleni, hikwalaho ka langutelo rakwe ra vutianakanyi.—3 Yohane 9, 10.
Langutelo Lerinene
17. Xana Petro, Pawulo na Barnaba va yi kombise njhani mianakanyo yo titsongahata?
17 EBibeleni ku ni swikombiso swo tala swa vanhu lava a va ri ni langutelo lerinene, va mianakanyo yo titsongahata. Loko Petro a nghena emutini wa Korneliyo, wanuna loyi u “[wele] ehansi emilengeni [ya Petro] a n’wi nkhinsamela.” Kambe ematshan’weni yo pfumela ku gandzeriwa, “Petro [u n’wi tlakusile], a ku: ‘Tlakuka; na mina ndzi munhu.’” (Mintirho 10:25, 26) Loko Pawulo na Barnaba va ri eListra, Pawulo u hanyise munhu loyi a tswariweke a lamarile. Hikwalaho, mintshungu yi vule leswaku vaapostola lava i swikwembu. Kambe Pawulo na Barnaba “va [handzule] tinguvu ta vona ta le handle kutani va tlulela entshungwini, va huwelela va ku: ‘Vavanuna, xana mi swi endlela yini swilo leswi? Na hina hi vanhu lava nga ni vulema lebyi fanaka ni bya n’wina.’” (Mintirho 14:8-15) Vakreste lava va titsongahataka a va nga pfumeli ku dzunisiwa hi vanhu.
18. Ntsumi ya matimba yi n’wi byele yini Yohane, hikwalaho ka ku titsongahata ka yona?
18 Loko muapostola Yohane a nyikiwe “nhlavutelo ya Yesu Kreste,” yi hundziseriwe eka yena hi ntsumi. (Nhlavutelo 1:1) Hikwalaho ka matimba ya ntsumi, hi nga xi twisisa xivangelo xa ku va Yohane a tshukile, hikuva ntsumi yin’we yi dlaye Vaasiriya va 185 000 hi vusiku byin’we. (2 Tihosi 19:35) Yohane u ri: “Kuteloko ndzi swi twile ni ku swi vona, ndzi wa ehansi leswaku ndzi gandzela emahlweni ka milenge ya ntsumi leyi a yi ndzi komba swilo leswi. Kambe yi ndzi byela yi ku: ‘Tivonele! U nga endli sweswo! Mina ndzo va hlonga-kuloni swin’we ni vamakwenu . . . Gandzela Xikwembu.’” (Nhlavutelo 22:8, 9) Vona mianakanyo yo titsongahata ya ntsumi leyi ya matimba!
19, 20. Kombisa ku hambana exikarhi ka ku titlakusa ka tindhuna ta Rhoma leti hluleke enyimpini kun’we ni mianakanyo yo titsongahata ya Yesu.
19 Yesu u ve xikombiso lexinene ngopfu xa munhu wa mianakanyo yo titsongahata. A a ri N’wana wa Xikwembu la tswariweke a ri swakwe, loyi a a ta va Hosi eMfun’weni wa Xikwembu wa le tilweni. Loko a ya eka vanhu, a nga yanga ku fana ni tindhuna ta le nkarhini wa Rhoma leti hluleke enyimpini. Tona a ti heleketiwa hi ntshungu lowukulu—minxaxamelo ya vanhu—naswona a ti khandziya makalichi lama khavisiweke hi nsuku ni timhondzo ta ndlopfu, lama kokiwaka hi tihanci to basa, kumbexana hi tindlopfu, tinghala kumbe tiyingwe. Eka minxaxamelo ya kona a ku ri ni swiyimbeleri leswi yimbelelaka tinsimu ta ku hlula, hala tlhelo ku ri ni swigolonyana leswi rhwaleke swilo leswi phangiweke, kun’we ni minkombiso leyikulu ya swa nyimpi. Nakambe a ku ri ni tihosi, tihosana ni tindhuna leti khomiweke enyimpini, swin’we ni mindyangu ya tona, hakanyingi va hluvuriwa va sala va nga ambalanga leswaku va khomisiwa tingana. Swiendlakalo leswi a swi kombisa ku tikukumuxa, ku tikurisa.
20 Teka sweswo u swi ringanisa ni ndlela leyi Yesu a yeke ha yona eka vanhu. Hi ku titsongahata u tinyiketele hi mbilu hinkwayo ku hetisekisa vuprofeta lebyi vulavulaka hi yena, lebyi nge: “Waswivo! Hosi ya wena yi ta eka wena. Yi lulamile, ina, yi ponisiwile; ya titsongahata, yi gade mbhongolo.” Hi ku titsongahata u gade xifuwo lexi rhwalaka ndzhwalo, hayi kalichi leyi kokiwaka hi xipano xa swiharhi swo hlawuleka. (Zakariya 9:9, NW; Matewu 21:4, 5) Vanhu lava titsongahataka va tsaka swonghasi hileswi Yesu a nga ta va Hosi leyi vekiweke hi Yehovha leswaku a fuma misava hinkwayo emafambiselweni lamantshwa, tanihi munhu la nga ni mianakanyo yo titsongahata hakunene, la nga titlakusiki, la nga ni rirhandzu, ntwela-vusiwana ni tintswalo!—Esaya 9:6, 7; Vafilipiya 2:5-8.
21. I yini leswi mianakanyo yo titsongahata yi nga kombisiki swona?
21 Leswi Yesu, Petro, Pawulo ni vavanuna ni vavasati van’wana va ripfumelo va le minkarhini ya ku tsariwa ka Bibele va veke ni mianakanyo yo titsongahata, swi kaneta mhaka ya leswaku ku titsongahata swi kombisa ku tsana. Ku ri na sweswo, swi kombisa ku va ni matimba, hikuva vanhu lava a va ri ni xivindzi naswona a va hiseka. Hikwalaho ka matimba lamakulu lawa a ma lawula mianakanyo ni mahanyelo ya vona, va kote ku tiyisela miringo leyikulu. (Vaheveru, ndzima 11) Naswona namuntlha, loko malandza ya Yehovha ma ri ni mianakanyo yo titsongahata, ma kuma matimba lama fanaka, hikuva Xikwembu xi seketela vanhu va mianakanyo yo titsongahata hi moya wa xona wo kwetsima lowu nga ni matimba. Xisweswo ha khutaziwa: “Hinkwenu tikhameni hi mianakanyo yo titsongahata un’wana eka un’wana, hikuva Xikwembu xi lwisana ni lava titlakusaka, kambe lava titsongahataka xi va nyika musa lowu nga faneriwiki. Hikokwalaho, titsongahateni ehansi ka voko ra matimba ra Xikwembu, leswaku xi ta mi tlakusa hi nkarhi lowu faneleke.”—1 Petro 5:5, 6; 2 Vakorinto 4:7.
22. Ku ta hlamuseriwa yini eka xihloko lexi landzelaka?
22 Ku ni mukhuva wun’wana lowunene malunghana ni mianakanyo yo titsongahata, lowu malandza ya Xikwembu ma faneleke ma titoloveta wona. Wona wu hoxa xandla swinene eku akeni ka moya wa rirhandzu ni ntirhisano emavandlheni. Kunene, i mukhuva wa nkoka lowu fambisanaka ni mianakanyo yo titsongahata. Sweswo swi ta hlamuseriwa eka xihloko lexi landzelaka.
Mpfuxeto
◻ Hlamusela moya lowu lawulaka misava leyi.
◻ Yehovha u va amukela njhani lava nga ni mianakanyo yo titsongahata?
◻ Ha yini swi boha ku dyondza ku va ni mianakanyo yo titsongahata?
◻ Hi swihi swikombiso swin’wana swa le Bibeleni swa vanhu lava kombiseke mianakanyo yo titsongahata?
[Xifaniso lexi nga eka tluka 15]
Ntsumi yi byele Yohane yi ku: “U nga endli sweswo! Mina ndzo va hlonga-kuloni”