Va Endle Ku Rhandza Ka Yehovha

Mariya A Hlawula “Xiavelo Lexinene”

ESIKWINI ra Yesu, vavasati va Vayuda a va siveriwa-siveriwa hi milawu ya varhabi. Hikwalaho, a va nga pfumeleriwi ku dyondza Nawu. Phela, xiyenge xin’wana lexi tshahiweke eka Mishnah a xi ku: “Loko wanuna wihi na wihi a dyondzisa n’wana wa yena wa nhwanyana Nawu swi fana ni loko a n’wi dyondzisa vunghwavava.”—Sotah 3:4.

Hikwalaho ka sweswo, vavasati vo tala va le Yudiya ya lembe-xidzana ro sungula a va nga dyondzekanga. The Anchor Bible Dictionary yi ri: “A ku na vumbhoni bya leswaku emahlweni ka vutirheli bya Yesu vavasati va Vayuda a va pfumeleriwa ku va vadyondzisiwa va mudyondzisi lonkulu, hi nga ha vuli ku famba ni mudyondzisi yoloye, kumbe ku dyondzisa un’wana handle ka vana va vona.” Leswaku va va tsongahata ku tlula ni mpimo, varhangeri van’wana va vukhongeri a va veke ni nawu lowu a wu vula leswaku wanuna a nga fanelanga a vulavula ni wansati erivaleni!

Yesu a nga ma landzelanga malangutelo wolawo lama nga kombisiki ku chava Xikwembu. U dyondzise vavasati swin’we ni vavanuna, naswona valandzeri va yena a ku ri vavasati ni vavanuna. (Luka 8:1-3) Hi nkarhi wun’wana, Yesu a rhambiwe hi Marta na Mariya. (Luka 10:38) Vavasati lavambirhi a va ri vamakwavo va Lazaro, naswona lavanharhu a va ri vadyondzisiwa ni vanghana lavakulu va Yesu. (Yohane 11:5) Swi nga ha endleka leswaku ndyangu lowu a wu tiviwa swinene, loko ku xiyiwa nhlayo leyikulu ya vanhu lava teke ku ta chavelela Marta na Mariya loko Lazaro a file. Kambe ntiyiso wa kona hi leswaku, leswi humeleleke ekaya ra vona loko Yesu a va endzerile swi nyikele dyondzo ya nkoka ku nga ri eka vona ntsena kambe ni le ka hina.

Ku Dyondza A Ri eMilengeni Ya Yesu

A swi kanakanisi leswaku Marta na Mariya a va swi hisekela ku endlela Yesu nkhuvo lowukulu, naswona swi vonaka onge a swi nga ta va tikela ku endla tano. (Ringanisa Yohane 12:1-3.) Hambiswiritano, loko muendzi wa vona a fika, Mariya “[u] tshame hansi hi le milengeni ya Hosi naswona a a ya emahlweni a yingisa rito ra yona.” (Luka 10:39) A ku na ndhavuko wa vanhu lowu a wu ta sivela Yesu ku dyondzisa wansati loyi wo tshembeka loyi a a swi hisekela swinene ku dyondza! Hi nga n’wi anakanya Mariya a tshame emahlweni ka Yesu, a kotisa mudyondzi loyi a yi yingiserisisaka swinene dyondzo ya N’wini wa yena.—Ringanisa Deteronoma 33:3; Mintirho 22:3.

Ku hambana na Mariya, Marta “a a rivatiwa hi ku tirha mintirho yo tala.” Leswi a a lunghiselela swakudya swo tala, a khomekile hi mintirho ya yena leyi a yi lava nkarhi. Hi ku hatlisa, Marta wa hlundzuka hi leswi a siyiweke a endla mintirho hinkwayo kasi makwavo wa yena u tshame emilengeni ya Yesu! Kutani Marta u nghena Yesu enon’wini loko a ri karhi a vulavula na Mariya, kumbexana hi xihatla, a ku: “Hosi, xana a swi na mhaka eka wena leswi makwerhu a ndzi siyeke ndzi ri swanga ndzi tirha swin’wana? Hikokwalaho, n’wi byele leswaku a ta ndzi pfuna.”—Luka 10:40.

A ku nga ri na lexi hoxeke hi xikombelo xa Marta. Phela, ku lunghisela ntlawa wa vanhu swakudya a hi matlangwana, naswona a swi fanelanga swi endliwa hi munhu un’we. Hambiswiritano, Yesu u kume nkarhi wa ku dyondzisa dyondzo ya nkoka emaritweni ya wansati loyi. U te: “Marta, Marta, u vilela ni ku karhatekela swilo swo tala. Kambe, i swilo switsongo leswi lavekaka, kumbe xin’we ntsena. Loko ku ri Mariya, u hlawule xiavelo lexinene, naswona a nge tekeriwi xona.”—Luka 10:41, 42.

Yesu a a nga vuli swona leswaku Marta a a nga swi tsakeli swilo swa moya. Ku hambana ni sweswo, a n’wi tivela ku va wansati la tinyiketeleke swinene eka Xikwembu.a Swi nga ha endleka hi swona swi n’wi susumeteleke ku rhamba Yesu a ta ekaya ra yena. Hambiswiritano, eka ku tshinya ka yena lokunene, Yesu a a kombisa leswaku Marta a a lahlekeriwa hi ku kuma ndzetelo lowu kalaka lowu humaka eka N’wana wa Xikwembu, hikwalaho ka ku hisekela ku lunghiselela swakudya.

I ntiyiso leswaku ndhavuko wa nkarhi wolowo wu nga ha va wu seketele langutelo ra leswaku nkoka wa wansati a wu kombisiwa swinene hi ku kota ku tirha mintirho ya le kaya. Kambe marito ya Yesu ma kombise leswaku vavasati, ku fana ni vavanuna, va nga tshama emilengeni ya N’wana wa Xikwembu va kuma marito ya vutomi! (Yohane 4:7-15; Mintirho 5:14) Hikwalaho ka leswi, a swi ta va swi antswe ngopfu loko Marta a lo endla swakudya swo ka swi nga nyawuli—kumbe switsongo—leswaku a kuma nkarhi wa ku tshama emilengeni ya N’wini wa yena a dyondza eka yena.—Ringanisa Matewu 6:25.

Leswi Hi Swi Dyondzaka

Namuntlha, vavanuna ni vavasati va kona exikarhi ka lava amukelaka xirhambo xa Yesu xo “[nwa] mati ya vutomi mahala.” (Nhlavutelo 22:17) Hi ku susumetiwa hi rirhandzu, van’wana—lava fanaka na Marta—va endla leswi va nga swi kotaka leswaku va khathalela swilaveko swa vapfumeri-kulobye. Va pfuna swinene naswona va hatlisela ku teka goza, kutani Yehovha u tshembisa ku vuyerisa mintirho ya vona ya rirhandzu. (Vaheveru 6:10; 13:16) Kumbexana van’wana va n’wi fanekisela kahle Mariya. Va rhandza ku vulavula ni vanhu naswona va anakanya hi swilo swa moya. Ku hisekela ka vona ku anakanyisisa hi Rito ra Xikwembu ku va pfuna ku tshama va dzime timitsu swinene eripfumelweni.—Vaefesa 3:17-19.

Mixaka leyimbirhi ya vanhu yi hetisisa xilaveko xa nkoka evandlheni ra Vukreste. Hambiswiritano, eku heteleleni hinkwavo va fanele va ‘hlawula xiavelo lexinene’ hi ku rhangisa swilo swa moya. Hi ku tiyiseka hi swilo swa nkoka swinene, hi ta kuma tintswalo ni mikateko ya Yehovha.—Vafilipiya 1:9-11.

[Nhlamuselo ya le hansi]