Xana U Ri Rhandza Ku Fikela Kwihi Rito Ra Xikwembu?
“E nawu wa wena nḍi wu ranḍisa ku yini! Nḍi wu anakanya hi siku hikwaro.”—PISALEMA 119:97.
1. Hi yihi ndlela yin’wana leyi vanhu lava chavaka Xikwembu va kombisaka ha yona leswaku va rhandza Rito ra Xikwembu?
VAVANUNA ni vavasati va madzana ya timiliyoni va na yona Bibele. Kambe ku va na Bibele ni ku rhandza Rito ra Xikwembu a swi fani. Xana munhu a nga va a tiyisile loko a vula leswaku u rhandza Rito ra Xikwembu, kasi u ri hlaya hi xiwelo ntsena? Doo! Ku hambana ni sweswo, van’wana lava tshameke va nga vi na mhaka ngopfu na Bibele, sweswi va yi hlaya siku ni siku. Va dyondze ku rhandza Rito ra Xikwembu, naswona, ku fana ni mupisalema, sweswi va anakanya hi Rito ra Xikwembu “siku hikwaro.”—Pisalema 119:97.
2. Ripfumelo ra un’wana wa Timbhoni ta Yehovha ri tiyisiwe njhani loko a langutane ni swiyimo swo nonon’hwa?
2 Un’wana loyi a dyondzeke ku rhandza Rito ra Xikwembu i Nasho Dori. U tiyisele makume yo tala ya malembe a ri karhi a tirhela Yehovha swin’we ni vagandzeri-kulobye, etikweni ra ka vona ra Albania. Exiphen’wini lexikulu xa nkarhi wolowo, Timbhoni ta Yehovha a ti yirisiwile, naswona Vakreste lava vo tshembeka a va nga kumi tibuku to tala ta Bibele. Hambiswiritano, ripfumelo ra Makwerhu Dori ri tshame ri tiyile. Njhani? U te: “Ndzi tivekele pakani ya ku heta kwalomu ka awara ndzi hlaya Bibele siku ni siku, naswona ndzi endle tano hi malembe ya kwalomu ka 60 ku fikela loko ndzi nga ha voni kahle.” A hi khale Bibele ya Xialbaniya yi ri kona, kambe Makwerhu Dori u dyondze Xigriki loko a ha ri ntsongo, kutani a a hlaya Bibele hi ririmi rero. Ku hlaya Bibele nkarhi na nkarhi swi tiyise Makwerhu Dori loko a langutane ni miringo yo hambana-hambana, naswona swi nga hi tiyisa na hina.
‘Hlakulela Ku Navela’ Rito Ra Xikwembu
3. Vakreste va fanele va hlakulela langutelo rihi malunghana ni Rito ra Xikwembu?
3 Muapostola Petro u tsarile a ku: “Kukota tincece leta ha ku velekiwaka, hlakulelani ku navela ntswamba wa rito lowu nga pfanganyisiwangiki na nchumu.” (1 Petro 2:2) Ku fana ni ricece leri navelaka mafi ya mana wa rona, Vakreste lava khathalaka hi xilaveko xa vona xa moya va swi tsakela swinene ku hlaya Rito ra Xikwembu. Xana wena u titwisa sweswo? Loko swi nga ri tano, u nga heli matimba. Na wena u nga ri hlakulela torha ra Rito ra Xikwembu.
4. Swi katsa yini ku titoloveta ku hlaya Bibele siku ni siku?
4 Leswaku u endla tano, xo sungula u fanele u titoloveta ku hlaya Bibele, loko swi koteka u yi hlaya siku ni siku. (Mintirho 17:11) Kumbexana a wu nge swi koti ku heta awara siku ni siku u hlaya Bibele, ku fana na Nasho Dori, kambe, kumbexana u nga tivekela nkarhi wo karhi siku ni siku, u kambisisa Rito ra Xikwembu. Vakreste vo tala va hatla va pfuka leswaku va ta kuma nkarhi wa ku anakanyisisa hi rungula ro karhi ra Bibele. Xana a hi yona ndlela yo antswa yo sungula siku? Van’wana va tsakela ku hlaya Bibele ni madyambu loko va nga si ya lata rivambu. Van’wanyana vona va hlaya Bibele hi nkarhi wun’wana lowu wu va pfumelelaka. Nchumu wa nkoka i ku titoloveta ku hlaya Bibele nkarhi na nkarhi. Loko u hlayile, tinyike nkarhi wo anakanyisisa hi leswi u swi hlayeke. A hi xiyeni swikombiso swin’wana swa vanhu lava vuyeriweke hi ku hlaya Rito ra Xikwembu ni ku anakanyisisa ha rona.
Mupisalema Loyi A A Rhandza Nawu Wa Xikwembu
5, 6. Hambiloko hi nga ri tivi vito ra mutsari wa Pisalema ya vu-119, xana hi nga dyondza yini ha yena loko hi hlaya ni ku anakanyisisa hi leswi a swi tsaleke?
5 Mutsari wa Pisalema ya vu-119 a a ri tlangela hakunene Rito ra Xikwembu. Pisalema yoleyo yi tsariwe hi mani? Bibele a yi n’wi boxi mutsari wa kona. Hambiswiritano, mongo wa yona wu hi byela swo karhi hi yena, naswona ha swi tiva leswaku vutomi byakwe a byi ri ni swiphiqo swo karhi. Van’wana va vanhu lava a a va tiva, lava a va tivula vagandzeri va Yehovha, a va nga hanyi hi misinya ya milawu ya Bibele. Hambiswiritano, mupisalema a nga ri pfumelelanga langutelo ra vona leswaku ri n’wi sivela ku endla leswi lulameke. (Pisalema 119:23) Loko u tshama kumbe u tirha ni munhu loyi a nga yi xiximiki misinya ya milawu ya Bibele, u nga tikuma u ri exiyin’weni lexi fanaka ni xa mupisalema.
6 Hambileswi a a chava Xikwembu, mupisalema loyi a a nga tiendli wo lulama. U vule hi ku kongoma leswaku a nga hetisekanga. (Pisalema 119:5, 6, 67) Hambiswiritano, a nga pfumelanga ku lawuriwa hi xidyoho. U vutisile a ku: “E džaha ri ta tengisa ku yini ku famba ka [rona] šana?” U hlamule a ku: “Hi loko [ri] ku šašameta ni rito ra wena.” (Pisalema 119:9) Kutani, loko a kandziyisa mpfuno lowukulu wa Rito ra Xikwembu, mupisalema u ye emahlweni a ku: “Nḍi hlayisa rito ra wena e mbilwini ya mina, leŝaku nḍi nga ku dyoheli.” (Pisalema 119:11) Nsusumeto lowu nga hi pfunaka leswaku hi papalata ku dyohela Xikwembu i wukulu hakunene!
7. Ha yini vantshwa va fanele va khathala swinene hi xilaveko xa ku hlaya Bibele siku na siku?
7 Vantshwa lava nga Vakreste va endla kahle loko va anakanyisisa hi marito ya mupisalema. Vakreste lava ha riki vantshwa va hlaseriwa namuntlha. Diyavulosi u swi lava hi mbilu hinkwayo ku onha vantshwa lava gandzelaka Yehovha. Xikongomelo xa Sathana i ku yenga vantshwa lava nga Vakreste leswaku va hluriwa hi ku navela ka nyama kutani va tlula milawu ya Xikwembu. Tifilimi ni minongonoko ya thelevhixini hakanyingi swi kombisa miehleketo ya Diyavulosi. Vatlangi-nkulu eka minongonoko yoleyo va vonaka va koka mahlo ni ku rhandzeka; ku tikhoma ka vona ko biha ku tekiwa ku ri nchumu lowu tolovelekeke. Xana leswi swi nyika mianakanyo yihi? ‘Leswaku a ku hoxanga nchumu loko vanhu lava nga tekanangiki va va ni vuxaka bya rimbewu, ntsendze loko va rhandzana hakunene.’ Lexi vavisaka, lembe na lembe vantshwa vo tala lava nga Vakreste va phasiwa hi mianakanyo yo tano. Ripfumelo ra van’wana ri tshoveka ku fana ni xikepe. Kutani ntshikilelo wu tinyike matimba! Kambe, xana ntshikilelo wa kona i wukulu swinene lerova n’wina vantshwa a mi nge swi koti ku hlangavetana na wona? Nikatsongo! Yehovha u lunghiselele Vakreste lava ha riki vantshwa ndlela leyi nga ta va pfuna ku hlula ku navela loku nga tengangiki. Va nga bakanya tlhari rihi ni rihi leri Diyavulosi a nga ri tirhisaka, hi ‘ku hitekela ku kongomisiwa hi Rito ra Xikwembu, va hlayisa marito ya Xikwembu etimbilwini ta vona.’ Xana wena u heta nkarhi wo tanihi kwihi u hlaya Bibele ni ku anakanyisisa hi leswi u swi hlayeke?
8. Swikombiso leswi xaxametiweke endzimaneni leyi swi nga ku pfuna njhani leswaku u tlangela Nawu wa Muxe hilaha ku engetelekeke?
8 Mutsari wa Pisalema ya vu-119 u te: “E nawu wa wena nḍi wu ranḍisa ku yini!” (Pisalema 119:97) Xana a a vula nawu wihi? A a vula rito leri Yehovha a ri paluxeke, ku katsa ni Nawu wa Muxe. Eku sunguleni, van’wana va nga bakanyela Nawu lowu etlhelo, va vula leswaku wu hundzeriwe hi nkarhi, va anakanya leswaku ku hava munhu loyi a nga wu rhandzaka. Hambiswiritano, loko hi anakanyisisa hi timhaka to hambana-hambana ta Nawu wa Muxe, hilaha mupisalema a endleke hakona, hi kota ku twisisa vutlhari lebyi fambisanaka ni Nawu wolowo. Handle ka timhaka to tala ta vuprofeta leti nga eNawini lowu, ku ni swileriso swa nsivela-mavabyi ni swa swakudya leswi faneleke, leswi a swi pfuna vanhu leswaku va tshama va basile ni ku va ni rihanyo lerinene. (Levhitika 7:23, 24, 26; 11:2-8) Nawu a wu khutaza Vaisrayele leswaku va endla bindzu ra vona hi ku tshembeka ni leswaku va kombisa ntwela-vusiwana eka vagandzeri-kulobye lava pfumalaka. (Eksoda 22:26, 27; 23:6; Levhitika 19:35, 36; Deteronoma 24:17-21) Swiboho swa vuavanyisi a swi fanele swi endliwa handle ko ya hi nghohe. (Deteronoma 16:19; 19:15) Loko mutsari wa Pisalema ya 119 a ya a va ni ntokoto evuton’wini, handle ko kanakana u vone vuyelo lebyinene eka lava a va tirhisa Nawu wa Xikwembu, kutani ku wu tsakela ka yena ku kurile. Hilaha ku fanaka namuntlha, loko Vakreste va yi tirhisa hilaha ku humelelaka misinya ya milawu ya Bibele, rirhandzu ni ku tlangela loku va nga na kona ka Rito ra Xikwembu swa kula.
Hosana Leyi Kanyeke Mbilu, Yi Nga Tifanisi Ni Van’wana
9. I langutelo rihi leri Hosi Hezekiya a veke na rona hi Rito ra Xikwembu?
9 Rungula ra Pisalema ya vu-119 ri twanana kahle ni leswi hi swi tivaka hi Hezekiya loko a ha ri hosana. Swidyondzi swin’wana swa Bibele swi ringanyeta leswaku Hezekiya hi yena a tsaleke pisalema leyi. Hambileswi hi nga tiyisekiki hi mhaka leyi, leswi hi swi tivaka hi leswaku Hezekiya a a ri xixima swinene Rito ra Xikwembu. Evuton’wini byakwe, u kombise leswaku a a pfumelelana hi mbilu ya yena hinkwayo ni marito ya Pisalema 119:97. Bibele yi vula leswi landzelaka malunghana na Hezekiya: “A namarela Yehova, a nga ṅwi fularelanga, a hlayisa milawu leyi Yehova a yi leriseke Moše.”—2 Tihosi 18:6.
10. Xikombiso xa Hezekiya xi va khutaza njhani Vakreste lava nga kurisiwangiki hi vatswari lava chavaka Xikwembu?
10 Hi ku ya hi rungula leri nga kona, swi tikomba onge Hezekiya a nga kulelanga endyangwini lowu chavaka Xikwembu. Tata wakwe, Hosi Akazi, a a ri mugandzeri wa swikwembu swa hava la nga tshembekiki, loyi a tekeke un’wana wa vana va yena—makwavo wa Hezekiya—a n’wi hisa endzilweni a ri karhi a hanya, a endlela xikwembu xa mavunwa gandzelo! (2 Tihosi 16:3) Hambileswi tata wakwe a a ri xikombiso xo biha, Hezekiya u kote ku ‘susa endleleni ya yena’ mikhuva ya vuhedeni hi ku titoloveta Rito ra Xikwembu.—2 Tikronika 29:2.
11. Hilaha Hezekiya a swi voneke hakona, xana swilo swi n’wi fambele njhani tata wakwe la nga tshembekangiki?
11 Loko Hezekiya a ri karhi a kula, u yi vone hi yexe ndlela leyi tata wakwe la gandzelaka swikwembu swa hava a fambiseke timhaka ta Tiko ha yona. Vayuda a va rhendzeriwe hi valala. A ku ri na Resini, hosi ya Siriya, loyi a hlanganeke na Hosi Peka wa le Israyele va rhendzela Yerusalema. (2 Tihosi 16:5, 6) A ku ri ni Vaedomu ni Vafilista, lava hlaseleke Yuda va tlhela va teka ni miti yin’wana ya Yudiya. (2 Tikronika 28:16-19) Xana Akazi u endle njhani loko a langutane ni nhlomulo lowu? Ematshan’weni yo kombela Yehovha leswaku a n’wi lamulela eka Siriya, Akazi u ye eka hosi ya le Asiriya, a yi fumbarherisa nsuku ni silivhere, leswi swin’wana swa swona a swi tekeke evuhlayiselweni bya mali etempeleni. Kambe sweswo a swi tisanga ku rhula ka nkarhi wo leha eYuda.—2 Tihosi 16:6, 8.
12. Hezekiya a a fanele a endla yini leswaku a papalata ku endla swihoxo leswi endliweke hi tata wakwe?
12 Eku heteleleni, Akazi u file ivi Hezekiya a va hosi a ri ni malembe ya 25 hi vukhale. (2 Tikronika 29:1) A a ha ri ntsongo, kambe sweswo a swi n’wi sivelanga ku va hosi leyi humelelaka. Ematshan’weni yo tekelela mahanyelo ya tata wakwe loyi a a nga tshembekanga, u namarhele Nawu wa Yehovha. Nawu lowu a wu ri ni xileriso xo hlawuleka lexi kongomisiweke eka tihosi: ‘Kutaku loko hosi yi tshama exiluvelweni xa mfumo wa yona, yi fanele yi titsalela buku, kopi ya nawu lowu nga ehansi ka vaprista, ku nga Valevhi. Kutani yi fanele yi tshama na yona, naswona yi fanele yi yi hlaya masiku hinkwawo ya vutomi bya yona, ku endlela leswaku yi dyondza ku chava Yehovha Xikwembu xa yona, leswaku yi hlayisa marito hinkwawo ya nawu lowu.’ (Deteronoma 17:18, 19) Loko Hezekiya a hlaya Rito ra Xikwembu siku ni siku, a a ta dyondza ku chava Yehovha ni ku papalata ku endla swihoxo leswi endliweke hi tata wakwe la nga chaviki Xikwembu.
13. Mukreste a nga tiyiseka njhani leswaku hinkwaswo leswi a swi endlaka swi ta humelela hi tlhelo ra moya?
13 A ku nga khutaziwi tihosi ta Israyele ntsena leswaku ti tshama ti ri karhi ti anakanya hi Rito ra Xikwembu, kambe ni Vaisrayele hinkwavo lava a va chava Xikwembu a va fanele va endla tano. Pisalema yo sungula yi vula leswaku munhu la tsakeke hakunene hi loyi a “[titsakelaka] e nawini wa Yehova, a wu anakanya nhlekanhi ni v̌usiku.” (Pisalema 1:1, 2) Malunghana ni munhu wo tano, mupisalema u ri: “Hikwaŝo leŝi a ŝi endlaka ŝi ta kateka.” (Pisalema 1:3) Ku hambana ni sweswo, malunghana ni munhu loyi a nga riki na ripfumelo eka Yehovha Xikwembu, Bibele yi ri: “I munhu la nga tiyisekiki, loyi a nga yimangiki a tiya etindleleni ta yena hinkwato.” (Yakobo 1:8) Hinkwerhu hi lava ku tsaka ni ku humelela. Ku titoloveta ku hlaya Bibele nkarhi na nkarhi hi ndlela leyi vuyerisaka, swi nga engetela ntsako wa hina.
Rito Ra Xikwembu Ri Tiyise Yesu
14. Yesu u swi kombise njhani leswaku a a rhandza Rito ra Xikwembu?
14 Siku rin’wana, vatswari va Yesu va n’wi kume a tshame exikarhi ka vadyondzisi etempeleni eYerusalema. Vativi lava va Nawu wa Xikwembu a va “hlamala va nga heti hikwalaho ka ku twisisa kakwe ni tinhlamulo takwe”! (Luka 2:46, 47) Hi nkarhi wolowo Yesu a ri ni malembe ya 12 hi vukhale. Ina, ni loko a ha ri ntsongo, a a ri rhandza hakunene Rito ra Xikwembu. Endzhaku, Yesu u tirhise Matsalwa loko a tshinya Diyavulosi, a ku: “Munhu a nga fanelanga a hanya hi xinkwa ntsena, kambe u fanele ku hanya ni hi rito rin’wana ni rin’wana leri humaka enon’wini wa Yehovha.” (Matewu 4:3-10) Endzhakunyana ka sweswo, Yesu u chumayele vaaki va muti wa ka vona wa Nazareta, a tirhisa Matsalwa.—Luka 4:16-21.
15. Yesu u xi veke njhani xikombiso loko a chumayela van’wana?
15 Nkarhi na nkarhi Yesu a a seketela tidyondzo ta yena hi ku tshaha Rito ra Xikwembu. Vayingiseri vakwe va “hlamarisiw[e] hi ndlela yakwe yo dyondzisa.” (Matewu 7:28) Sweswo a swi hlamarisi—phela leswi Yesu a a swi dyondzisa a swi huma eka Yehovha Xikwembu hi byakwe! Yesu u te: “Leswi ndzi swi dyondzisaka a hi swa mina, kambe i swa loyi a ndzi rhumeke. Loyi a vulavulaka hi ku tisungulela u lava ku tivangamisa; kambe loyi a lavaka ku vangamisa loyi a n’wi rhumeke, u ni ntiyiso, naswona vubihi a byi kona eka yena.”—Yohane 7:16, 18.
16. Yesu u ri kombise njhani rirhandzu leri a ri na rona eRitweni ra Xikwembu?
16 Ku hambana ni mutsari wa Pisalema 119, Yesu a a ‘nga ri na vubihi.’ A a ri N’wana wa Xikwembu la nga riki na xidyoho, loyi a “titsongahat[eke] kutani a yingisa ku ya fika eku feni.” (Vafilipiya 2:8; Vaheveru 7:26) Kambe, hambileswi a a hetisekile, Yesu a a dyondza Nawu wa Xikwembu a tlhela a wu yingisa. Leswi hi swona swi n’wi pfuneke swinene leswaku a tshama a tshembekile. Loko Petro a tirhise banga, a ringeta ku sirhelela N’wini wakwe leswaku a nga khomiwi, Yesu u tshinye muapostola loyi, kutani a vutisa a ku: “Xana u ehleketa leswaku enkarhini lowu a ndzi nge kombeli eka Tatana a ndzi rhumela mavandla ya tintsumi lama tlulaka 12? Mayelana ni leswi, xana Matsalwa ma ta hetiseka njhani lama vulaka leswaku swi fanele swi endleka hi ndlela leyi?” (Matewu 26:53, 54) Ina, ku hetiseka ka Matsalwa hi swona a swi ri swa nkoka eka Yesu, ku ri ni ku pona ku dlayiwa hi ndlela ya tihanyi leyi tsongahataka. A a ri rhandza hakunene Rito ra Xikwembu!
Van’wana Lava Tekeleleke Kreste
17. Rito ra Xikwembu a ri ri ra nkoka ku fikela kwihi eka muapostola Pawulo?
17 Muapostola Pawulo u tsalele Vakreste-kulobye a ku: “Mi va vatekeleri va mina, tanihi leswi mina ndzi nga mutekeleri wa Kreste.” (1 Vakorinto 11:1) Ku fana ni N’wini wa yena, Pawulo a a ma rhandza Matsalwa. U te: “Endzeni-ndzeni ka mina, ndzi wu rhandza swinene Nawu wa Xikwembu.” (Varhoma 7:22, The Jerusalem Bible) Hakanyingi Pawulo a a tshaha Rito ra Xikwembu. (Mintirho 13:32-41; 17:2, 3; 28:23) Loko Pawulo a lerisa timhaka to hetelela eka mutirheli-kulobye la rhandzekaka ku nga Timotiya, u kandziyise ntirho wa nkoka lowu Rito ra Xikwembu ri faneleke ri wu endla masiku hinkwawo evuton’wini bya “munhu wa Xikwembu.”—2 Timotiya 3:15-17.
18. Nyika xikombiso xa munhu loyi a a xixima Rito ra Xikwembu eminkarhini ya hina?
18 Malandza yo tala ya Yehovha lama tshembekaka eminkarhini ya hina na wona ma tekelele ndlela leyi Yesu a a ri rhandza ha yona Rito ra Xikwembu. Eku sunguleni ka lembe-xidzana leri, jaha rin’wana ri nyikiwe Bibele hi munghana wa rona. Ri hlamusela ndlela leyi nyiko leyi ya risima yi ri khumbeke ha yona: “Ndzi tibohe ku hlaya rungula ro karhi ra Bibele siku rin’wana ni rin’wana ntsena loko ndza ha hanya.” Jaha rero a ku ri Frederick Franz, naswona ndlela leyi a a rhandza Bibele ha yona yi endle leswaku a heta nkarhi wo leha a ri karhi a tirhela Yehovha hilaha ku humelelaka. Vo tala va n’wi tsundzuka hi vuswikoti lebyi a a ri na byona bya ku tshaha tindzima hinkwato ta Bibele hi nhloko.
19. Van’wana va xi endla njhani xiyimiso xa nhlayo wa Bibele wa vhiki na vhiki wa Xikolo xa Vutirheli bya le Tilweni?
19 Timbhoni ta Yehovha ti yi kandziyisa swinene mhaka ya ku titoloveta ku hlaya Bibele nkarhi na nkarhi. Vhiki rin’wana ni rin’wana, loko ti lunghiselela wun’wana wa minhlangano ya tona ya Vukreste, ku nga Xikolo xa Vutirheli bya le Tilweni, ti hlaya tindzima to karhi ta Bibele. Enhlanganweni lowu ku nyikeriwa tinhla-nkulu ta mhaka ya Bibele leyi welaka evhikini rero. Timbhoni tin’wana ti kuma swi antswa ku avanyisa nhlayo wa Bibele wa vhiki hi swiyenge leswitsongo swa nkombo kutani ti hlaya xiyenge xin’we hi siku. Loko ti ri karhi ti hlaya, ti anakanyisisa hi rungula ra kona. Loko swi koteka, ti endla ndzavisiso lowu engetelekeke hi ku tirhisa tibuku leti sekeriweke eBibeleni.
20. Hi fanele hi endla yini leswaku hi kuma nkarhi wa ku hlaya Bibele nkarhi na nkarhi?
20 Swi nga lava leswaku u ‘xava nkarhi’ wa ku hlaya Bibele nkarhi na nkarhi, eka swilo swin’wana. (Vaefesa 5:16) Hambiswiritano, vuyelo bya kona byi ta va lebyikulu swinene ku tlula leswi u titsoneke swona. Loko u ya u tolovela ku hlaya Bibele siku na siku, ku rhandza ka wena Rito ra Xikwembu ku ta ya ku engeteleka. Hi ku hatlisa, u ta susumeteleka ku vula marito lama vuriweke hi mupisalema, lama nge: “E nawu wa wena nḍi wu ranḍisa ku yini! Nḍi wu anakanya hi siku hikwaro.” (Pisalema 119:97) Langutelo ro tano ri ta ku vuyerisa swinene sweswi ni le nkarhini lowu taka, hilaha xihloko lexi landzelaka xi nga ta kombisa hakona.
Wa Tsundzuka Xana?
◻ Mutsari wa Pisalema 119 u swi kombise njhani leswaku a a ri rhandza swinene Rito ra Xikwembu?
◻ Hi nga dyondza yini eka swikombiso swa Yesu na Pawulo?
◻ Hi nga endla yini leswaku rirhandzu leri hi nga na rona eRitweni ra Xikwembu ri ya ri kula?
[Swifaniso leswi nga eka tluka 10]
Tihosi leti tshembekeke a ti fanele ti titoloveta ku hlaya Rito ra Xikwembu nkarhi na nkarhi. Xana wena u endla tano?
[Xifaniso lexi nga eka tluka 12]
Ni loko a ha ri ntsongo, Yesu a a rhandza Rito ra Xikwembu