Vuyelo Bya Ku Rhandza Rito Ra Xikwembu

‘Rhandza vutlhari, kutani byi ta ku hlayisa. Byi ta ku dzunisa loko u byi namarhela.’—SWIVURISO 4:6, 8.

1. Xana swi vula yini ku rhandza Rito ra Xikwembu hakunene?

KU HLAYA Bibele i nchumu wa nkoka eka Mukreste. Hambiswiritano, ku yi hlaya ntsena a hi xikombiso xa ku rhandza Rito ra Xikwembu. Ku vuriwa yini hi loko munhu a hlaya Bibele, kambe a endla swilo leswi Bibele yi swi solaka? Swi le rivaleni leswaku a nga rhandzi Rito ra Xikwembu hilaha mutsari wa Pisalema 119 a a ri rhandza hakona. Ku rhandza Rito ra Xikwembu swi n’wi susumetele ku hanya hi ku pfumelelana ni swilaveko swa rona.—Pisalema 119:97, 101, 105.

2. Vutlhari lebyi sekeriweke eRitweni ra Xikwembu byi pfuna yini?

² Ku hanya hi ku pfumelelana ni Rito ra Xikwembu swi lava leswaku munhu a tshama a ri karhi a lulamisa miehleketo ni mahanyelo yakwe. Ndlela yo tano yi kombisa vutlhari bya Xikwembu, leswi vulaka ku tirhisa vutivi ni ku twisisa loku munhu a ku kumaka loko a dyondza Bibele. ‘Rhandza vutlhari, kutani byi ta ku hlayisa. Byi xixime swinene, kutani byi ta ku tlakusa. Byi ta ku dzunisa loko u byi namarhela. Byi ta ku bombisa nhloko ya wena hi xibombiso lexinene; byi ta ku rhwexa harhi ya vuhosi yo kwetsima.’ (Swivuriso 4:6, 8, 9) Vona xikhutazo lexinene swonghasi xa ku rhandza Rito ra Xikwembu ni ku kongomisiwa hi rona! I mani loyi a nga swi rhandziki ku sirheleriwa, ku tlakusiwa ni ku dzunisiwa?

Ku Sirheleriwa Leswaku U Hambeta U Papalata Khombo

3. Ha yini Vakreste va fanele va sirheleriwa swinene sweswi, naswona va fanele va sirheleriwa eka mani?

³ Munhu u sirheleriwa njhani hi vutlhari bya ku dyondza ni ku tirhisa Rito ra Xikwembu? Hi xikombiso, u sirheleriwa eka Sathana Diyavulosi. Yesu u dyondzise valandzeri vakwe leswaku va khongelela ku kutsuriwa eka lowo biha, Sathana. (Matewu 6:13) Namuntlha, ku ni xilaveko lexikulu xa ku katsa xikombelo lexi eswikhongelweni swa hina. Sathana u hlongoriwe etilweni ni madimona yakwe endzhaku ka 1914, hikwalaho Sathana u “hlundzukile swinene, hi ku tiva leswaku u ni nkarhi wo koma.” (Nhlavutelo 12:9, 10, 12) Enkarhini lowu wa makumu, u fanele se a bava a khalakhasa hileswi a nga humeleliki eku lweni kakwe ni lava “hlayisaka swileriso swa Xikwembu naswona va nga ni ntirho wa ku nyikela vumbhoni mayelana na Yesu.”—Nhlavutelo 12:17.

4. Vakreste va sirheleriwa njhani eka mintshikilelo ni mintlhamu ya Sathana?

⁴ Hi ku hlundzuka, Sathana u ya emahlweni a lava ku dunga vatirheli lava nga Vakreste ni ku va vangela nxaniso wa tihanyi kumbe ku veka swihinga swin’wana entirhweni wa vona. Nakambe u lava ku yenga vahuweleri va Mfumo leswaku va rhangisa swilo swo tanihi ku kuma ndhuma emisaveni, ku rhandza vutomi bya ku tigedlha, ku kuma swilo leswi vonakaka, ni ku lava ku titsakisa, ku ri ni ku rhangisa ntirho wo chumayela ta Mfumo. I yini lexi sirhelelaka malandza ya Xikwembu lama tshembekaka leswaku ma nga hluriwi hi ntshikilelo wa Sathana kumbe ku phasiwa hi mintlhamu yakwe? Ina, i swa nkoka ku khongela, ku va ni vuxaka lebyikulu na Yehovha, ni ku tiyiseka leswaku switshembiso swakwe swi ta hetiseka. Kambe hinkwaswo leswi swi fambisana ni ku tiva switsundzuxo leswi nga eRitweni ra Xikwembu ni ku tiyimisela ku swi hlayisa. Switsundzuxo leswi hi swi kuma hi ku hlaya Bibele ni tibuku leti pfunaka ku dyondza Bibele, ku va kona eminhlanganweni ya Vukreste, ku yingisa ndzayo ya Matsalwa loko hi nyikiwa yona hi mupfumeri-kulorhi, kumbe hi ku anakanyisisa hi vuenti malunghana ni misinya ya milawu ya Bibele leyi moya wa Xikwembu wu hi tsundzuxaka yona.—Esaya 30:21; Yohane 14:26; 1 Yohane 2:15-17.

5. Vutlhari lebyi sekeriweke eRitweni ra Xikwembu byi hi sirhelela njhani?

⁵ Lava va rhandzaka Rito ra Xikwembu va sirheleriwa ni hi tindlela tin’wana. Hi xikombiso, va papalata ku karhateka emintlhavekweni ni ku khomiwa hi mavabyi lama vangiwaka hi swilo swo tanihi ku tirhisa swidzidzirisi hi ndlela yo biha, ku dzaha fole ni ku tikhoma hi ndlela yo biha hi tlhelo ra rimbewu. (1 Vakorinto 5:11; 2 Vakorinto 7:1) A va hoxi xandla eku onheni ka vuxaka hi ku hleva van’wana kumbe ku vulavula swo biha hi vona. (Vaefesa 4:31) Naswona a va tivangeli ku ngheniwa hi moya wa ku kanakana, hi ku handzisisa tifilosofi leti kanganyisaka ta vutlhari bya misava. (1 Vakorinto 3:19) Hi ku rhandza Rito ra Xikwembu, va sirheleleka eka swilo leswi nga onhaka vuxaka lebyi va nga na byona na Xikwembu ni leswi nga herisaka ntshembo wa vona wo kuma vutomi lebyi nga heriki. Va tshama va khomekile hi ku pfuna vaakelani va vona leswaku va va ni ripfumelo eka switshembiso swo hlawuleka leswi nga eBibeleni, hi ku tiva leswaku loko va endla tano va ta ‘tiponisa vona swin’we ni lava va va yingisaka.’—1 Timotiya 4:16.

6. Vutlhari lebyi sekeriweke eRitweni ra Xikwembu byi nga hi sirhelela njhani hambiloko hi ri ehansi ka swiyimo swo nonon’hwa?

⁶ Kunene, vanhu hinkwavo—ku katsa ni lava va rhandzaka Rito ra Xikwembu—va weriwa hi “nkari ni khombo.” (Eklesiasta 9:11) Swa boha leswaku van’wana exikarhi ka hina va weriwa hi timhangu ta ntumbuluko, va khomiwa hi mavabyi lama dlayaka, va weriwa hi timhangu tin’wana kumbe va fa swi nga languteriwanga. Hambiswiritano, hi sirhelelekile. Ku hava mhangu leyi nga n’wi vaviselaka makumu munhu loyi a rhandzaka Rito ra Xikwembu hakunene. Hikwalaho, a hi fanelanga hi karhateka ngopfu hi leswi swi nga hi humelelaka enkarhini lowu taka. Loko hi endla hinkwaswo leswi hi nga swi kotaka leswaku hi papalata makhombo, swa antswa ku tshika timhaka ta kona emavokweni ya Yehovha, hi nga pfumeleli xiyimo xa namuntlha xa ku nga tiyiseki hi vutomi xi hi tsona ku rhula. (Matewu 6:33, 34; Vafilipiya 4:6, 7) Tsundzuka ntshembo lowu tiyeke wa ku pfuxiwa ka lava feke ni wa vutomi byo antswa loko Xikwembu xi “endla swilo hinkwaswo swi va leswintshwa.”—Nhlavutelo 21:5; Yohane 11:25.

Tikombise U Ri ‘Misava Leyinene’

7. Hi xihi xifaniso lexi Yesu a xi byeleke mintshungu leyi teke yi ta n’wi yingisa?

⁷ Nkoka wa ku va ni langutelo lerinene hi Rito ra Xikwembu wu kombisiwe eka xin’wana xa swifaniso swa Yesu. Loko Yesu a twarisa mahungu lamanene etikweni hinkwaro ra Palestina, mintshungu yi hlengeletanile yi ta n’wi yingisa. (Luka 8:1, 4) Kambe a hi hinkwavo lava a va rhandza Rito ra Xikwembu hakunene. A swi kanakanisi leswaku vo tala va te va ta n’wi yingisela hileswi a va lava ku vona masingita kumbe hileswi a va tsakela ndlela leyinene leyi a a dyondzisa ha yona. Hikwalaho, Yesu u byele mintshungu yoleyo xifaniso a ku: “Muhaxi u humile a ya haxa mbewu yakwe. Kambe, loko a ri karhi a haxa, yin’wana ya yona yi wela etlhelo ka gondzo ivi yi kandziyeriwa, kutani tinyenyana ta tilo ti yi dya hinkwayo. Yin’wana yi wela ehenhla ka ribye lerikulu, kuteloko yi mirile, yi oma hikwalaho ka ku pfumala ndzhongo. Yin’wana yi wela exikarhi ka mitwa, kutani mitwa leyi kuleke swin’we na yona yi yi kamanyeta. Yin’wana yi wela emisaveni leyinene, kuteloko yi mirile, yi humesa mihandzu leyi phindhiweke ka dzana.”—Luka 8:5-8.

8. Exifanisweni xa Yesu, mbewu i yini?

⁸ Xifaniso xa Yesu xi kombise leswaku vanhu a va ta angula hi tindlela to hambana-hambana loko ku chumayeriwa mahungu lamanene, swi titshege hi xiyimo xa mbilu ya muyingiseri. Mbewu leyi byariwaka i “rito ra Xikwembu.” (Luka 8:11) Kumbe, hilaha rungula rin’wana ra xifaniso lexi ri vulaka hakona, mbewu i “rito ra mfumo.” (Matewu 13:19) Yesu a nga va a tirhise xin’wana ni xin’wana xa swiga leswi, tanihi leswi nhloko-mhaka ya Rito ra Xikwembu ku nga Mfumo wa le tilweni ehansi ka Yesu Kreste loyi a nga Hosi leyi Yehovha a nga ta tirhisa yona ku lwela vuhosi byakwe ni ku kwetsimisa vito ra yena. (Matewu 6:9, 10) Hikwalaho, kahle-kahle mbewu i rungula ra mahungu lamanene lama kumekaka eRitweni ra Xikwembu, ku nga Bibele. Timbhoni ta Yehovha ti kandziyisa rungula leri ra Mfumo loko ti haxa mbewu, ti tekelela Muhaxi wo sungula, Yesu Kreste. Xana vanhu va angurisa ku yini?

9. I yini lexi fanekiseriwaka hi mbewu leyi welaka (a) etlhelo ka gondzo? (b) ehenhla ka ribye lerikulu? (c) emisaveni leyi teleke mitwa?

⁹ Yesu u vule leswaku mbewu yin’wana yi wela etlhelo ka gondzo ivi yi kandziyeriwa. Leswi swi vula vanhu lava khomekeke ngopfu lerova mbewu ya Mfumo yi tsandzeka ku dzima timitsu etimbilwini ta vona. Loko va nga si sungula ku rhandza Rito ra Xikwembu, “Diyavulosi [u] ta a [ta] susa rito etimbilwini ta vona leswaku va nga pfumeli va ta ponisiwa.” (Luka 8:12) Mbewu yin’wana yi wela ehenhla ka ribye lerikulu. Leswi swi vula vanhu lava kokiwaka hi rungula ra Bibele kambe va nga ri pfumeleli leswaku ri khumba timbilu ta vona. Loko ku fika nkaneto, kumbe loko swi va tikela ku tirhisa ndzayo ya Bibele, “va wa” hileswi va nga riki na timitsu. (Luka 8:13) Nakambe ku ni lava va twaka rito kambe va hluriwa hi “ku karhateka, rifuwo ni ntsako wa vutomi lebyi.” Eku heteleleni, ku fana ni swimilana leswi phasaphasiweke hi mitwa, “va kamanyetiwa hi ku helela.”—Luka 8:14.

10, 11. (a) I vamani lava fanekiseriwaka hi misava leyinene? (b) Hi fanele hi endla yini leswaku hi ‘hlayisa’ Rito ra Xikwembu etimbilwini ta hina?

¹⁰ Xo hetelela, ku ni mbewu leyi welaka emisaveni leyinene. Lava i vanhu lava amukelaka rungula hi “mbilu yo xonga, leyinene.” Hi ntumbuluko, un’wana ni un’wana wa hina u anakanya leswaku u wela entlaweni lowu. Hambiswiritano, ku avanyisa ka Xikwembu hi kona ku tirhaka. (Swivuriso 17:3; 1 Vakorinto 4:4, 5) Rito ra xona ri vula leswaku “mbilu yo xonga, leyinene” i nchumu lowu hi wu kombisaka hi swiendlo swa hina ku sukela sweswi ku fikela loko hi fa kumbe ku fikela loko Xikwembu xi ta herisa mafambiselo lawa yo biha ya swilo. Loko n’wangulo wa hina wo sungula eka rungula ra Mfumo wu ri wunene, swi lulamile. Hambiswiritano, lava va nga ni mbilu yo xonga ni leyinene va amukela Rito ra Xikwembu va tlhela “va ri [hlayisa] ivi va veka mihandzu hi ku tiyisela.”—Luka 8:15.

¹¹ Ndlela yin’we ntsena leyi tiyeke ya ku hlayisa Rito ra Xikwembu etimbilwini ta hina i ku ri hlaya ni ku ri dyondza hi ri hexe ni loko hi ri ni vapfumeri-kulorhi. Leswi swi katsa ku swi tlangela swinene swakudya swa moya leswi lunghiseleriweke hi nandza la vekiweke leswaku a khathalela swilaveko swa moya swa valandzeri va Yesu va ntiyiso. (Matewu 24:45-47) Hi ku tirhisa tindlela teto, lava va hlayisaka Rito ra Xikwembu etimbilwini ta vona va khutaziwa hi rirhandzu leswaku va “veka mihandzu hi ku tiyisela.”

12. Hi yihi mihandzu leyi hi faneleke hi yi veka hi ku tiyisela?

¹² I mihandzu yihi leyi vekiwaka hi misava leyinene? Emisaveni ya xiviri, mbewu yi mila yi va swimilana leswi tswalaka mihandzu leyi nga ni mbewu ya muxaka lowu fanaka, leyi na yona yi nga haxiwaka leswaku yi tswala mihandzu yin’wana. Hilaha ku fanaka, mbewu ya rito yi mila eka lava nga ni mbilu yo xonga ni leyinene, yi va susumetela ku endla nhluvuko hi tlhelo ra moya ku fikela laha na vona va byalaka mbewu etimbilwini ta van’wana. (Matewu 28:19, 20) Naswona ntirho wa vona wa ku byala va wu endla hi ku tiyisela. Yesu u kombise nkoka wa ku byala hi ku tiyisela loko a ku: “Loyi a tiyiseleke ku fika emakumu hi yena la nga ta ponisiwa. Naswona mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.”—Matewu 24:13, 14.

‘Ku Veka Mihandzu eMintirhweni Hinkwayo Leyinene’

13. I xikhongelo xihi lexi endliweke hi Pawulo lexi a xi kombisa ku yelana ka ku veka mihandzu ni ku tiva Rito ra Xikwembu?

¹³ Muapostola Pawulo na yena u vulavule hi xilaveko xa ku veka mihandzu, naswona u kombise ku yelana exikarhi ka ku veka mihandzu ni Rito ra Xikwembu. U khongelele leswaku vapfumeri-kulobye va “tala vutivi lebyi kongomeke bya ku rhandza ka [Xikwembu] hi vutlhari hinkwabyo ni ku twisisa ka moya, leswaku mi famba hi mukhuva lowu fanelaka eka Yehovha leswaku mi n’wi tsakisa hi ku helela mi ri karhi mi veka mihandzu entirhweni wun’wana ni wun’wana lowunene.”—Vakolosa 1:9, 10; Vafilipiya 1:9-11.

14-16. Ku pfumelelana ni xikhongelo xa Pawulo, i mihandzu yihi leyi vekiwaka hi lava va rhandzaka Rito ra Xikwembu?

¹⁴ Xisweswo Pawulo u komba leswaku ku kuma vutivi bya Bibele a hi makumu ya timhaka. Ku ri na sweswo, ku rhandza Rito ra Xikwembu swi hi susumetela ku “famba hi mukhuva lowu fanelaka eka Yehovha” hi ku hambeta hi “veka mihandzu entirhweni wun’wana ni wun’wana lowunene.” Ntirho lowu lowunene hi wihi ke? Ku chumayela mahungu lamanene ya Mfumo i xiavelo xo hlawuleka xa Vakreste emasikwini lawa ya makumu. (Marka 13:10) Ku tlula kwalaho, lava va rhandzaka Rito ra Xikwembu va endla leswi va nga swi kotaka leswaku va seketela ntirho lowu nkarhi na nkarhi hi tlhelo ra timali. Va ri tsakela lunghelo leri, hi ku tiva leswaku “Xikwembu xi rhandza munyiki la tsakeke.” (2 Vakorinto 9:7) Minyikelo ya vona yi hakelela mintirho leyi endliwaka emiakweni ya Bethele leyi tlulaka dzana, leyi kongomisaka ntirho wo chumayela ta Mfumo, kasi yin’wana ya yona yi tlhela yi humesa Tibibele ni tibuku leti fambisanaka na Bibele. Minyikelo ya vona yi pfuna ni ku hakelela mintsombano leyikulu ya Vukreste ni ku pfuna valanguteri lava famba-fambaka, varhumiwa ni van’wana lava vulaka evhangeli nkarhi hinkwawo.

¹⁵ Mintirho yin’wana leyinene yi katsa ku aka ni ku khathalela tindhawu ta vugandzeri bya ntiyiso. Ku rhandza Rito ra Xikwembu swi susumetela vagandzeri va xona leswaku va tiyiseka leswaku Tiholo ta Tinhlengeletano ni Tiholo ta Mfumo a ti honisiwi. (Ringanisa Nehemiya 10:39.) Tanihi leswi vito ra Xikwembu ri humelelaka emahlweni ka miako yo tano, i swa nkoka leswaku endzeni ni le handle ku tshama ku basile ku tlhela ku koka mahlo, naswona mahanyelo ya lava va gandzelaka endzeni ka tiholo to tano a ma fanelanga ma soleka. (2 Vakorinto 6:3) Vakreste van’wana va kota ku endla leswi engetelekeke. Ku rhandza Rito ra Xikwembu swi va susumetela ku teka maendzo yo leha leswaku va ya pfuneta ku aka tindhawu letintshwa to gandzela eka tona etindhawini tin’wana ta misava laha ku lavekaka mpfuno, hikwalaho ka vusweti kumbe hikwalaho ka ku kayivela ka vanhu va vutshila.—2 Vakorinto 8:14.

¹⁶ Ku “veka mihandzu entirhweni wun’wana ni wun’wana lowunene” swi katsa ni ku khathalela vutihlamuleri bya ndyangu ni ku khumbeka hi Vakreste-kulorhi. Ku rhandza Rito ra Xikwembu swi hi susumetela ku khathala hi swilaveko swa lava “nga swin’we na hina eripfumelweni,” ni “ku hanya hi ku tinyiketela loku nga ni vukwembu endyangwini wa [hina].” (Vagalatiya 6:10; 1 Timotiya 5:4, 8) Emhakeni leyi, i swinene ku endzela vavabyi ni ku chavelela lava rilaka. Naswona vakulu va vandlha ni Tikomiti to Vulavurisana ni Swibedlhele va endla ntirho lowunene swonghasi hi ku pfuna vanhu lava langutanaka ni xiyimo xo nonon’hwa xa vutshunguri! (Mintirho 15:29) Nakambe nhlayo ya timhangu ya tlakuka—tin’wana ta tona i ta ntumbuluko kasi tin’wana ti vangiwa hi vuhunguki bya vanhu. Hi mpfuno wa moya wa Xikwembu, Timbhoni ta Yehovha ematikweni yo tala ya misava ti ve ni vito lerinene hikwalaho ko hatlisela ku phalala vapfumeri-kulobye ni van’wana lava hlaseriweke hi timhangu ni makhombo. Leswi hinkwaswo i mihandzu leyinene leyi vekiwaka hi lava va rhandzaka Rito ra Xikwembu.

Vuyelo Lebyinene eNkarhini Lowu Taka

17, 18. (a) Hi byihi vuyelo lebyi nga kona hikwalaho ka ku byariwa ka mbewu ya Mfumo? (b) Hi swihi swiendlakalo leswi tsemaka nhlana leswi lava va rhandzaka Rito ra Xikwembu va nga ta swi vona ku nga ri khale?

¹⁷ Ku haxa mbewu ya Mfumo ku hambeta ku pfuna vanhu swinene. Emalembeni lama ha ku hundzaka, vanhu vo tlula 300 000 lembe na lembe va pfumelele rungula ra Bibele ri dzika etimbilwini ta vona, ku fikela laha va nyiketeleke vutomi bya vona eka Yehovha kutani va swi kombisa hi ku khuvuriwa ematini. Mawaku vumundzuku lebyinene lebyi va nga na byona!

¹⁸ Lava rhandzaka Rito ra Xikwembu va swi tiva leswaku ku nga ri khale Yehovha Xikwembu u ta yima a tlakusa vito ra yena. “Babilona Lonkulu,” mfumo wa misava wa vukhongeri bya mavunwa, u ta lovisiwa. (Nhlavutelo 18:2, 8) Kutani, lava va alaka ku hanya hi ku pfumelelana ni Rito ra Xikwembu va ta lovisiwa hi Hosi Yesu Kreste. (Pisalema 2:9-11; Daniyele 2:44) Endzhaku, Mfumo wa Xikwembu wu ta herisa vugevenga, nyimpi ni timhangu tin’wana. A ku nge he vi na xilaveko xo chavelela vanhu hikwalaho ka ku twa ku vava, vuvabyi ni rifu.—Nhlavutelo 21:3, 4.

19, 20. Hi byihi vumundzuku lebyinene lebyi hlayiseriweke lava va rhandzaka Rito ra Xikwembu hakunene?

¹⁹ Vona mintirho leyinene swonghasi leyi nga ta endliwa hi lava va rhandzaka Rito ra Xikwembu! Lava va nga ta pona Armagedoni va ta sungula ntirho lowu tsakisaka wa ku hundzula misava leyi yi va paradeyisi. Va ta va ni lunghelo leri tsakisaka ra ku lunghiselela swilaveko swa vanhu lava sweswi va tiwiseleke esirheni, naswona va nga emianakanyweni ya Xikwembu, lava nga ni ntshembo wa ku pfuxiwa. (Yohane 5:28, 29) Hi nkarhi wolowo, vaaki va misava va ta kuma vukongomisi lebyi hetisekeke eka Yehovha Hosi ya le Henhla-henhla, hi ku tirhisa N’wana wa yena la tlakukeke, ku nga Yesu Kreste. ‘Ku ta pfuriwa tibuku-nsongwa,’ leti hlavutelaka swiletelo swa Yehovha swa mahanyelo ya le misaveni leyintshwa.—Nhlavutelo 20:12.

²⁰ Hi nkarhi lowu faneleke wa Yehovha, vatotiwa vo hetelela, vo tshembeka lava nga Vakreste, va ta tlakuseriwa etilweni, va ya kuma hakelo ya vona yo va “vadyandzhaka-kulobye na Kreste.” (Varhoma 8:17) Hi nkarhi wa Ku Fuma ka Kreste ka Gidi ra Malembe, vanhu hinkwavo emisaveni lava rhandzaka Rito ra Xikwembu va ta endliwa lava hetisekeke emianakanyweni ni le mirini. Loko va kumeka va tshembekile endzhaku ka ndzingo wo hetelela, va ta hakeriwa hi vutomi lebyi nga heriki, naswona va ta kuma “ntshunxeko lowu vangamaka wa vana va Xikwembu.” (Varhoma 8:21; Nhlavutelo 20:1-3, 7-10) Wolowo wu ta va nkarhi lowunene swonghasi! Kunene, hambi Yehovha a hi nyike ntshembo wa ku ya hanya etilweni kumbe emisaveni, ku hambeta hi rhandza Rito rakwe ni ku tiyimisela ku hanya hi ku pfumelelana ni vutlhari bya Xikwembu swi ta hi sirhelela. Naswona enkarhini lowu taka, swi ‘ta hi dzunisa loko hi swi namarhela.’—Swivuriso 4:6, 8.

U Nga Hlamusela Xana?

◻ Xana ku rhandza Rito ra Xikwembu swi ta hi sirhelela njhani?

◻ I yini mbewu ya xifaniso xa Yesu, naswona yi byariwa njhani?

◻ Hi nga swi kombisa njhani leswaku hi ‘misava leyinene’?

◻ Lava rhandzaka Rito ra Xikwembu va nga langutela ku vuyeriwa hi yini?

[Xifaniso lexi nga eka tluka 16]

Mbewu ya xifaniso xa Yesu yi fanekisela rungula ra mahungu lamanene lama tameriweke hi Rito ra Xikwembu

[Xihlovo Xa Kona]

Garo Nalbandian

[Xifaniso lexi nga eka tluka 17]

Timbhoni ta Yehovha ti tekelela Muhaxi Lonkulu

[Swifaniso leswi nga eka tluka 18]

Lava nga ta pona Armagedoni va ta tsakela mihandzu ya misava