“Lontsongo” U Ve “Gidi”

“Lontsongo u ta va gidi, kasi lontsongo ngopfu u ta va tiko ra matimba.”—ESAYA 60:22.

1, 2. (a) Ha yini munyama wu funengeta misava namuntlha? (b) Ku vonakala ka Yehovha ku ye ku engeteleka hi ndlela yihi ehenhla ka vanhu vakwe?

“MUNYAMA wu ta funengeta misava, ni ku dzwihala lokukulu ku ta funengeta vanhu va matiko; kambe Yehovha u ta voninga ehenhla ka wena, ku vangama ka yena ku ta vonaka ehenhla ka wena.” (Esaya 60:2) Marito lawa ma xi hlamusela kahle xiyimo lexi veke kona emisaveni ku sukela hi 1919. Vujagana byi honise xikombiso xa ku va kona ka Yesu Kreste evuhosini, a nga “ku vonakala ka misava.” (Yohane 8:12; Matewu 24:3) Hikwalaho ka ‘ku hlundzuka lokukulu’ ka Sathana, hosi ya “vafumi va misava va munyama lowu,” lembe-xidzana ra vu-20 ri ve nkarhi wa maxangu ni nhlomulo lowukulu ematin’wini ya munhu. (Nhlavutelo 12:12; Vaefesa 6:12) Vanhu vo tala va hanya emunyameni hi tlhelo ra moya.

² Hambiswiritano, ku vonakala ku kona namuntlha. Yehovha u ‘voningela’ malandza yakwe, masalela lama totiweke, lama nga vayimeri va laha misaveni va “wansati” wakwe wa le tilweni. (Esaya 60:1) Ngopfu-ngopfu loko masalela lawa ma ntshunxiwa evuhlongeni bya le Babilona hi 1919, ma kombise ku vangama ka Xikwembu naswona ‘ma endle leswaku ku voninga ka wona ku vonakala emahlweni ka vanhu.’ (Matewu 5:16) Ku sukela hi 1919 ku ya ka 1931, ku vonakala ka Mfumo ku ye ku voninga swinene loko masalela lawa ma kulula tinketana to hetelela ta mianakanyo ya Babilona. Nhlayo ya wona yi andzile yi va makume ya magidi, loko Yehovha a hetisisa xitshembiso xakwe lexi nge: “Kunene ndzi ta hlengeleta lava va seleke va Israyele. Ndzi ta va veka hi vun’we, kukota ntlhambi etshangeni, kukota ntlhambi emadyelweni ya wona; va ta ba huwa swin’we ni vanhu.” (Mikiya 2:12) Hi 1931, ku vangama ka Yehovha ehenhla ka vanhu vakwe ku ve loku vonakaka swinene loko va amukela vito leri nge Timbhoni ta Yehovha.—Esaya 43:10, 12.

3. Swi tikombe njhani leswaku ku vonakala ka Yehovha a ku ta voninga ehenhla ka van’wana lava nga riki vatotiwa?

³ Xana Yehovha a a ta voningela masalela ya “ntlhambinyana” ntsena? (Luka 12:32) Doo. Nkandziyiso wa Xihondzo xo Rindza (wa Xinghezi) wa September 1, 1931, wu vulavule hi ntlawa wun’wanyana. Loko wu nyikela nhlamuselo leyi twisisekaka ya Ezekiyele 9:1-11, wu kombise leswaku wanuna loyi a nga ni rimhondzo ra mutsari loyi ku vulavuriwaka ha yena eka tindzimana teto u yimela masalela lama totiweke. Xana i vamani lava funghiwaka emombyeni hi “munhu” yoloye? I “tinyimpfu tin’wana,” leti nga ni ntshembo wa ku hanya hi masiku emisaveni leyi nga paradeyisi. (Yohane 10:16; Pisalema 37:29) Hi 1935, ntlawa lowu wa “tinyimpfu tin’wana” wu twisisiwe wu ri ‘ntshungu lowukulu, lowu humaka ematikweni hinkwawo,’ lowu muapostola Yohane a wu voneke exivonweni. (Nhlavutelo 7:9-14) Ku sukela hi 1935 ku ta fika sweswi, ku yisiwe nyingiso lowukulu eku hlengeleteni ka ntshungu lowukulu.

4. I vamani “tihosi” ni “matiko,” lava ku vulavuriwaka ha vona eka Esaya 60:3?

⁴ Ntirho lowu wo hlengeleta wu katsiwile eka vuprofeta bya Esaya lebyi nge: “Kunene matiko ma ta ya eku vonakaleni ka wena, ni tihosi eku vangameni ka ku voninga ka wena.” (Esaya 60:3) I vamani “tihosi” leti ku vulavuriwaka ha tona laha? I masalela ya lava 144 000, lava, kun’we na Yesu Kreste, va nga vadyandzhaka va Mfumo wa le tilweni, naswona hi vona lava rhangeleke entirhweni wo chumayela. (Varhoma 8:17; Nhlavutelo 12:17; 14:1) Namuntlha, magidi ma nga ri mangani ya masalela lama totiweke ma tluriwa ekule hi nhlayo ya “matiko,” ku nga lava va nga ni ntshembo wo hanya laha misaveni, lava taka va ta dyondzisiwa hi Yehovha ni ku rhamba ni van’wana leswaku va ta dyondzisiwa hi yena.—Esaya 2:3.

Malandza Ya Yehovha Lama Hisekaka

5. (a) I yini leswi kombisaka leswaku ku hiseka ka vanhu va Yehovha a ku vohlanga? (b) I matiko wahi lama veke ni ku andza ko hlawuleka hi 1999? (Vona chati eka matluka 17-20.)

⁵ Timbhoni ta Yehovha ta masiku lawa ti kombise ku hiseka lokukulu swonghasi eka lembe-xidzana ra vu-20 hinkwaro! Naswona ku nga khathariseki mintshikilelo leyi kulaka, ku hiseka ka tona a ku vohlanga loko ti tshinelela lembe ra 2000. A ta ha xi teka xi ri xa nkoka xileriso xa Yesu lexi nge: ‘Endlani vadyondzisiwa eka vanhu va matiko hinkwawo.’ (Matewu 28:19, 20) Nhlayo ya vahuweleri lava hisekaka va mahungu lamanene eka lembe ra ntirho leri hundzeke ra lembe-xidzana ra vu-20, yi fikelele nhlohlorhi leyintshwa ya 5 912 492. Va hete ntsengo lowu hlamarisaka wa tiawara ta 1 144 566 849 va vulavula ni van’wana hi Xikwembu ni swikongomelo swa xona. Va endle maendzo yo vuyela ya 420 047 796 eka vanhu lava tsakelaka, naswona va fambise tidyondzo ta le kaya ta Bibele ta mahala leti ringanaka 4 433 884. Vona xiviko lexi tsakisaka swonghasi xa ku tirha hi ku hiseka!

6. Hi rihi lunghiselelo lerintshwa leri endleriweke maphayona, naswona n’wangulo wu ve wihi?

⁶ Hi January n’wexemu, Huvo leyi Fumaka yi tivise ndzulamiso wa tiawara leti lavekaka eka maphayona. Leswi swi pfumelele vo tala ku va maphayona ya nkarhi hinkwawo kumbe ya nkarhinyana. Hi xikombiso, hi tin’hweti ta mune to sungula ta lembe ra 1999, hofisi ya rhavi ya le Netherlands yi amukele swikombelo swa vuphayona bya nkarhi hinkwawo leswi andzisiweke ka mune loko swi ringanisiwa ni leswi endliweke hi nkarhi lowu fanaka elembeni ra le mahlweni ka rero. Xiviko xa le Ghana xi ri: “Ku sukela loko ku endliwe ndzulamiso wa tiawara leti lavekaka eka maphayona, nhlayo ya maphayona ya nkarhi hinkwawo yi tshame yi ri karhi yi engeteleka.” Eka lembe ra ntirho ra 1999, nhlayo ya maphayona emisaveni hinkwayo yi ve 738 343—ku nga xikombiso lexinene xa ‘ku hisekela mintirho leyinene.’—Tito 2:14.

7. Yehovha u yi katekise njhani migingiriko ya malandza ya yena?

⁷ Xana Yehovha u wu katekisile ntirho lowu wu endliweke hi ku gingiriteka? Ina. U vula leswi landzelaka hi nomu wa Esaya: “Tlakusa mahlo u rhalarhala u vona! Hinkwavo va hlengeletiwile; va te eka wena. Vana va wena va hambeta va ta va huma ekule swinene, ni vanhwanyana va wena lava nga ta khathaleriwa va ri etsheveni.” (Esaya 60:4) “Vana” ni “vanhwanyana” lava totiweke lava hlengeletiweke, va ha tirhela Xikwembu hi ku hiseka. Kutani sweswi, tinyimpfu tin’wana ta Yesu ti karhi ta hlengeletiwa eka “vana” ni “vanhwanyana” va Yehovha lava totiweke, ematikweni ya 234 swin’we ni le swihlaleni swa lwandle.

“Ntirho Wun’wana Ni Wun’wana Lowunene”

8. Hi yihi ‘mintirho leyinene’ leyi Timbhoni ta Yehovha ti yi hisekelaka?

⁸ Vakreste va ni vutihlamuleri byo chumayela mahungu lamanene ya Mfumo ni ku pfuna vanhu lava tsakelaka leswaku va va vadyondzisiwa. Kambe va ‘hlomiseriwe ntirho wun’wana ni wun’wana lowunene.’ (2 Timotiya 3:17) Hikwalaho, va khathalela mindyangu ya vona hi rirhandzu, va kombisa malwandla ni ku endzela lava vabyaka. (1 Timotiya 5:8; Vaheveru 13:16) Naswona vatirhi vo tirhandzela va endla ntirho wo tanihi ku aka Tiholo ta Mfumo—wu nga ntirho lowu na wona wu nyikelaka vumbhoni. Le Togo, endzhaku ko aka holo yin’wana, varhangeri va kereke ya kwalaho ya mahlori va lave ku tiva leswaku ha yini Timbhoni ta Yehovha ti kota ku tiakela miako ya tona, kasi kereke ya vona yi boheka ku qacha vanhu va yi akela! Xiviko xa le Togo xi vula leswaku ku akiwa ka Tiholo ta Mfumo ta xiyimo lexinene swi ve ni vuyelo lebyinene ngopfu endhawini yoleyo lerova vanhu van’wana va ringeta ku qacha kumbe ku aka tindlu ekusuhi ni laha tiholo ti nga ta akiwa kona.

9. Timbhoni ta Yehovha ti angule njhani loko timhangu ti hlasela?

⁹ Minkarhi yin’wana ku laveka ntirho lowunene wa muxaka wun’wana. Eka lembe ra ntirho ra n’wexemu, matiko yo tala ma hlaseriwe hi timhangu, naswona hakanyingi a ku fika Timbhoni ta Yehovha ku sungula ti ta phalala. Hi xikombiso, xiphemu lexikulu xa tiko ra Honduras xi hlaseriwe hi Xidzedze lexi vuriwaka Mitch. Hi ku hatlisa, rhavi ri vumbe tikomiti ta mphalalo leswaku ti hlela tindlela to phalala ha tona. Timbhoni ta le Honduras ni le matikweni man’wana yo tala ti nyikele hi swiambalo, swakudya, mirhi ya vutshunguri ni swilo swin’wana leswi lavekaka. Tikomiti to Aka ta Xifundzha ti tirhise vutshila bya tona ti pfuxeta tindlu. Endzhakunyana, vamakwerhu lava weriweke hi mhangu leyi va pfuniwe ku tlhela va endla mintirho ya vona leyi tolovelekeke. Le Ecuador, Timbhoni ta Yehovha ti pfune vamakwavo loko ndhambi leyikulu yi onhe makaya ya vona. Endzhaku ko vona ndlela leyinene leyi ti hlangavetaneke ni xiyimo lexi ha yona, mutirhela-mfumo un’wana u te: “Loko ntlawa lowu a wo va ehansi ka mina, a ndzi ta endla masingita! Vanhu vo fana na n’wina a va fanele va va kona emisaveni hinkwayo.” Ntirho wo tano lowunene wu yisa ku dzuneka eka Yehovha Xikwembu, naswona wu kombisa “ku tinyiketela [ka hina] loku nga ni vukwembu [loku pfunaka] eka hinkwaswo.”—1 Timotiya 4:8.

Va ‘Ta Va Haha Ku Fana Ni Papa’

10. Hambileswi nhlayo ya vatotiwa yi hungutekaka, ha yini vito ra Yehovha ri twarisiwa swinene ku tlula eku sunguleni?

¹⁰ Kutani Yehovha wa vutisa a ku: “I vamani lava taka va haha ku fana ni papa, ku fana ni matuva loko ma ya etimbhoveni ta swisaka swa wona? Hikuva swihlala swi ta hambeta swi tshemba mina, ni swikepe swa Taraxixi ku fana ni le ku sunguleni, leswaku vana va wena va tisiwa va huma ekule . . . Entiyisweni vanhu vambe va ta aka marhangu ya wena, ni tihosi ta vona ti ta ku tirhela.” (Esaya 60:8-10) Lava va rhangeke va angula loko Yehovha a va ‘voningela’ i “vana” va yena, ku nga Vakreste lava totiweke. Kutani ku landzele “vanhu vambe,” ntshungu lowukulu, lowu wu tirhelaka vamakwavo lava totiweke hi ku tshembeka, va landzela vukongomisi bya vona bya ku chumayela mahungu lamanene. Hikwalaho, hambileswi nhlayo ya vatotiwa yi hungutekaka, vito ra Yehovha ri twarisiwa emisaveni hinkwayo ku tlula eku sunguleni.

11. (a) I yini lexa ha endlekaka ni sweswi, naswona vuyelo byi ve byihi hi 1999? (b) Hi wahi matiko lama veke ni nhlayo yo hlawuleka ya lava khuvuriweke hi 1999? (Vona chati eka matluka 17-20.)

¹¹ Hikwalaho, timiliyoni ti khitikana “ku fana ni matuva loko ma ya etimbhoveni ta swisaka swa wona,” ti kuma vutumbelo evandlheni ra Vukreste. Lembe na lembe ku nghena madzana ya magidi, naswona nyangwa ya ha pfulekile leswaku ku nghena lava engetelekeke. Esaya u ri: “Entiyisweni tinyangwa ta wena ti ta tshama ti pfulekile nkarhi hinkwawo; a ti nge pfariwi ninhlikanhi ni nivusiku, leswaku u tiseriwa xuma xa matiko.” (Esaya 60:11) N’wexemu ku khuvuriwe vanhu va 323 439, va kombisa ku tinyiketela ka vona eka Yehovha, naswona a nga si ti pfala tinyangwa. “Swilo leswi navelekaka swa matiko hinkwawo,” ku nga swirho swa ntshungu lowukulu, swa ha khitikana swi nghena ha tona. (Hagayi 2:7) A nga kona loyi a tlherisiwaka loko a lava ku huma emunyameni. (Yohane 12:46) Vanhu vo tano hinkwavo va nga tshuki va lahlekeriwa hi ku tlangela ka vona ka ku vonakala!

Va Ve Ni Vurhena Loko Va Xanisiwa

12. Lava va rhandzaka munyama va ringetise ku yini ku herisa ku vonakala?

¹² Lava va rhandzaka munyama va venga ku vonakala ka Yehovha. (Yohane 3:19) Van’wana va ringeta ni ku herisa ku vonakala koloko. Leswi a swi hlamarisi. Hambi a ri Yesu, “ku vonakala ka ntiyiso loku nyikaka ku vonakala eka mixaka hinkwayo ya vanhu,” u hlekuriwile, a kanetiwa ivi eku heteleleni a dlayiwa hi vanhu va ka vona. (Yohane 1:9) Eka lembe-xidzana ra vu-20, Timbhoni ta Yehovha na tona ti hlekuriwile, ti pfaleriwa emakhotsweni, ti yirisiwa ni ku dlayiwa, hileswi ti kombiseke ku vonakala ka Yehovha hi ku tshembeka. Emalembeni ya sweswinyana, vakaneti va sungule ku hangalasa mavunwa hi swihaxa-mahungu malunghana ni lava va kombisaka ku vonakala ka Xikwembu. Van’wana va lwela ku khorwisa vanhu leswaku Timbhoni ta Yehovha ti ni khombo, kutani ti fanele ti vekeriwa swipimelo kumbe ti yirisiwa. Xana vakaneti volavo va humelerile?

13. Byi ve byihi vuyelo bya ku hlamusela ntiyiso wa mhaka hi vuxiyaxiya eka swihaxa-mahungu, malunghana ni ntirho wa hina?

¹³ Doo. Laha swi faneleke, Timbhoni ta Yehovha ti ye eka swihaxa-mahungu ti ya hlamusela ntiyiso wa mhaka. Hikwalaho, vito ra Yehovha ri hangalasiwile swinene hi maphepha-hungu ni timagazini, hambi ku ri hi xiya-ni-moya ni thelevhixini. Leswi swi ve ni vuyelo lebyinene entirhweni wo chumayela. Hi xikombiso, le Denmark, nongonoko wa TV ya tiko wu vulavule hi nhloko-mhaka leyi nge “Xivangelo xa ku tsana ka ripfumelo ra vaaka-tiko va le Denmark.” Ku vulavuriwe ni vayimeri va Timbhoni ta Yehovha ni va vukhongeri byin’wana. Endzhaku, wansati un’wana loyi a hlaleleke nongonoko lowu u te: “Swi ve erivaleni swinene leswaku i vamani lava nga ni moya wa Xikwembu.” Ku sunguriwe dyondzo na yena.

14. Vakaneti va ta wa mapa loko va boheka ku lemuka yini ku nga ri khale?

¹⁴ Timbhoni ta Yehovha ta swi tiva leswaku vo tala emisaveni leyi va ta ti kaneta. (Yohane 17:14) Hambiswiritano, ti tiyisiwa hi vuprofeta bya Esaya lebyi nge: “Vana va lava va ku xanisaka va fanele va [ta] eka wena, va nkhinsama ehansi; hinkwavo lava ku khomaka hi ndlela leyi nga kombisiki xichavo va fanele va nkhinsama emikondzweni ya milenge ya wena, va ta ku vitana muti wa Yehovha, Siyoni wa Mukwetsimi wa Israyele.” (Esaya 60:14) Ku nga ri khale, vakaneti va ta wa mapa loko va boheka ku lemuka leswaku kahle-kahle a va lwa na Xikwembu hi xoxe. Xana ku ta hlula mani enyimpini yoleyo?

15. Timbhoni ta Yehovha ti “an’wa ntswamba wa matiko” hi ndlela yihi, naswona leswi swi kombisiwe njhani entirhweni wa tona wa ku dyondzisa ni ku vula evhangeli?

¹⁵ Nakambe Yehovha u tshembisa a ku: “Ndzi ta ku veka u va nchumu wa ku tinyungubyisa hilaha ku nga riki na makumu . . . Entiyisweni u ta an’wa ntswamba wa matiko, naswona u ta an’wa mavele ya tihosi; hakunene u ta tiva leswaku mina, Yehovha, ndzi Muponisi wa wena.” (Esaya 60:15, 16) Ina, Yehovha i Muponisi wa vanhu vakwe. Loko va tshemba yena, va ta hanya “hilaha ku nga riki na makumu.” Nakambe va ta “an’wa ntswamba wa matiko,” va tirhisa swilo swin’wana leswi nga kona leswaku va yisa vugandzeri bya ntiyiso emahlweni. Hi xikombiso, ku tirhisiwa ka thekinoloji ya khompyuta ni ya swa mbulavurisano hi vutlhari, swi endla leswaku swi olova ku kandziyisa Xihondzo xo Rindza hi nkarhi wun’we hi tindzimi ta 121, Xalamuka! yona yi kandziyisiwa hi tindzimi ta 62. Ku sunguriwe ndlela yo tirhisa khompyuta hi mukhuva lowu nga ta pfuna ku hundzuluxela Vuhundzuluxeri Bya Misava Leyintshwa hi tindzimi tin’wana, naswona vuhundzuluxeri byo tano byi tisa ntsako lowukulu. Loko vuhundzuluxeri bya Xicroatia bya Matsalwa ya Vukreste ya Xigriki byi humesiwa hi 1999, vo tala a va xiririka mihloti ya ntsako. Makwerhu un’wana wa xinuna la dyuhaleke u te: “I khale ndzi rindze Bibele leyi. Se ndzi nga fa hi ku rhula!” Ku fambisiwe tikopi leti heleleke kumbe leti nga helelangiki to tlula 100 wa timiliyoni ta Vuhundzuluxeri Bya Misava Leyintshwa, hi tindzimi ta 34.

Mimpimanyeto Leyi Tlakukeke Ya Mahanyelo

16, 17. (a) Hambiloko swi nonon’hwa, ha yini swi ri swa nkoka ku namarhela mimpimanyeto ya Yehovha leyi tlakukeke? (b) I ntokoto wihi lowu kombisaka leswaku vantshwa va nga swi kota ku papalata ku nyamisiwa hi misava?

¹⁶ Yesu u te: “Loyi a hanyaka hi swilo swo biha u venga ku vonakala.” (Yohane 3:20) Hi hala tlhelo, lava va tshamaka eku vonakaleni va rhandza mimpimanyeto ya Yehovha leyi tlakukeke. Yehovha u vula leswi landzelaka hi nomu wa Esaya: “Loko ku ri vanhu va wena, hinkwavo va ta va vo lulama.” (Esaya 60:21a) A hi matlangwana ku namarhela mimpimanyeto leyi lulameke emisaveni leyi eka yona ku tikhoma ko biha hi tlhelo ra rimbewu, ku hemba, makwanga ni ku tivona swi tolovelekeke swinene. Hi xikombiso, matiko man’wana ma yime kahle hi tlhelo ra timali, kutani swa olova ku tikuma u ri karhi u hlongorisa rifuwo ntsena. Hambiswiritano, Pawulo u lemukisile a ku: “Lava tiyimiseleke ku fuwa va wela endzingweni ni le ntlhan’wini ni le ku naveleni ko tala ka vuhunguki ni loku vavisaka, loku nghenisaka vanhu endzovisweni ni le ku onhakeni.” (1 Timotiya 6:9) Ku nga va ni khombo lerikulu loko munhu a tipeta a helela emabindzwini lerova a honisa swilo swa nkoka swinene, swo tanihi ku hlangana ni Vakreste-kulobye, ku endla ntirho wo kwetsima, ku namarhela misinya ya milawu ya mahanyelo, ni ku byarha vutihlamuleri bya ku hlayisa ndyangu!

¹⁷ Ku namarhela mimpimanyeto leyi lulameke swi nga va nonon’hwela ngopfu vantshwa, tanihi leswi tintangha ta vona to tala swinene ti tirhisaka swidzidzirisi ni ku tikhoma hi ndlela yo biha. Le Suriname, mufana la langutekaka u ye eka nhwanyana wa malembe ya 14 exikolweni a kombela ku va ni vuxaka bya rimbewu na yena. Nhwanyana loyi u arile, a vula leswaku Bibele a yi pfumeli leswaku vanhu va endla swilo swo tano loko va nga tekananga. Vanhwanyana van’wana exikolweni va n’wi hundzule xihlekiso, va ringeta ku n’wi kucetela leswaku a cinca mianakanyo yakwe, va vula leswaku un’wana ni un’wana wa swi rilela ku etlela ni mufana yoloye. Hambiswiritano, xinhwanyetana lexi xi ale no twa. Endzhaku ka mavhiki ma nga ri mangani, mufana loyi u kumiwe a ri na HIV kutani a sungula ku vabya swinene. Nhwanyana loyi u tsakile hileswi a yingiseke xileriso xa Yehovha xa ku ‘papalata vumbhisa.’ (Mintirho 15:28, 29) Timbhoni ta Yehovha ti tinyungubyisa swinene hi vana va tona lava yimaka va tiyile va lwela ku endla leswi lulameke. Ripfumelo ra vona, kun’we ni ra vatswari va vona, ‘ri sasekisa’—kumbe ku dzunisa—vito ra Yehovha Xikwembu.—Esaya 60:21b.

Yehovha Hi Yena A Endleke Leswaku Ku Va Ni Ku Andza

18. (a) I nchumu wihi lowukulu lowu Yehovha a wu endleleke vanhu vakwe? (b) Hi byihi vumbhoni lebyi nga kona bya leswaku ku engeteleka ku ta ya emahlweni, naswona hi wihi ntshembo lowu tsakisaka lowu lava va tshamaka eku vonakaleni va nga na wona?

¹⁸ Ina, Yehovha u voningela vanhu vakwe, a va katekisa, a va kongomisa ni ku va tiyisa. Eka lembe-xidzana ra vu-20, va vone ku hetiseka ka marito ya Esaya lama nge: “Lontsongo u ta va gidi, kasi lontsongo ngopfu u ta va tiko ra matimba. Mina Yehovha, ndzi ta swi hatlisisa hi nkarhi wa swona.” (Esaya 60:22) “Lontsongo” u andzile ku suka eka vanhu va nga ri vangani le ndzhaku hi 1919, a ya tlula “gidi.” Naswona ku engeteleka koloko a ku yimanga! N’wexemu, vanhu va 14 088 751 va ve kona enkhubyeni wa Xitsundzuxo xa rifu ra Yesu. Vo tala va vona a hi Timbhoni. Ha tsaka leswi va veke kona exitsundzuxweni xexo xa nkoka, naswona ha va rhamba leswaku va ta eku vonakaleni. Yehovha wa ha va voningela swinene vanhu vakwe. Nyangwa yo nghena enhlengeletanweni yakwe ya ha pfulekile. Kutani hinkwerhu a hi tiyimiseleni ku tshama eku vonakaleni ka Yehovha. Ku endla tano swi hi tisela mikateko leyikulu sweswi! Naswona sweswo swi ta hi tisela ntsako lowukulu swonghasi enkarhini lowu taka loko ntumbuluko hinkwawo wu dzunisa Yehovha ni ku tsakela ku vangama kakwe lokukulu!—Nhlavutelo 5:13, 14.

U Nga Hlamusela Xana?

• I vamani lava kombiseke ku vangama ka Yehovha emasikwini lawa ya makumu?

• I yini lexi kombisaka leswaku ku hiseka ka vanhu va Yehovha a ku vohlanga?

• Hi yihi yin’wana ya mintirho leyinene leyi Timbhoni ta Yehovha ti khomekeke ha yona?

• I yini lexi hi tiyisekaka ha xona, hambi hi kanetiwa hi tihanyi?

[Chati leyi nga eka tluka 17-20]

1999 SERVICE YEAR REPORT OF JEHOVAH’S WITNESSES WORLDWIDE

(See bound volume)

[Swifaniso leswi nga eka tluka 15]

Vanhu va ha khitikanela enhlengeletanweni ya Yehovha

[Xifaniso lexi nga eka tluka 16]

Ha tsaka leswi Yehovha a pfuleke nyangwa swinene leswaku ku nghena lava va rhandzaka ku vonakala