Swirho Leswintshwa Swa Huvo Leyi Fumaka

HI Mugqivela, October 2, 1999, Nhlangano wa Lembe na Lembe wa Watch Tower Bible and Tract Society of Pennsylvania wu gimetiwe hi xitiviso lexi a xi nga languteriwanga. Vanhu va 10 594 lava a va ri kona kumbe va yingisele va ri eka ndhawu yin’wana a va nyanyukile loko va twa leswaku ku engeteriwe swirho swa mune eka Huvo leyi Fumaka ya Timbhoni ta Yehovha. Swirho leswi leswintshwa, leswi hinkwaswo ka swona swi nga Vakreste lava totiweke, i Samuel F. Herd; M. Stephen Lett; Guy H. Pierce; na David H. Splane.

• Samuel Herd u sungule ku phayona hi 1958, naswona ku sukela hi 1965 ku ya eka 1997, u ve mulanguteri wa xifundzha ni wa muganga. Endzhaku ka kwalaho, yena ni nsati wa yena, Gloria, va ve swirho swa ndyangu wa Bethele wa le United States, laha Makwerhu Herd a a ri eNdzawulweni ya Ntirho. Nakambe a a pfuneta eka Komiti ya Ntirho.

• Stephen Lett yena u sungule ku phayona hi December 1966, naswona ku sukela hi 1967 ku ya eka 1971, u tirhe eBethele ya le United States. Hi October 1971, u tekane na Susan, ivi va nghenela ntirho wa vuphayona byo hlawuleka. Ku sukela hi 1979 ku ya eka 1998, u ve mulanguteri wa xifundzha. Ku sukela hi April 1998, yena na Susan va ve swirho swa ndyangu wa Bethele wa le United States. U fike a tirha eNdzawulweni ya Ntirho naswona a a pfuneta eka Komiti yo Dyondzisa.

• Loko ku ri Guy Pierce u kurise vana va yena ivi hi April 1982 a sungula ku phayona ni nsati wa yena. U ve mulanguteri wa xifundzha ku sukela hi 1986 ku fikela hi 1997, ku nga nkarhi lowu yena ni nsati wa yena, Penny, va veke swirho swa ndyangu wa Bethele wa le United States. Makwerhu Pierce a a pfuneta eka Komiti ya Vatirhi.

• Kasi David Splane u sungule ku phayona hi September 1963. Leswi a a thwase eka ntlawa wa vu-42 wa le Gilead, u ve murhumiwa le Senegal, eAfrika, ivi a va mulanguteri wa xifundzha le Canada ku ringana malembe ya 19. Yena ni nsati wa yena, Linda, va ve eBethele ya le United States ku sukela hi 1990, laha Makwerhu Splane a tirheke endzawulweni ya Ntirho ni ya Vutsari. Ku sukela hi 1998, a a pfuneta eka Komiti ya Vutsari.

Ku engetela eka swirho leswintshwa swa mune, sweswi swirho swa Huvo leyi Fumaka i C. W. Barber, J. E. Barr, M. G. Henschel, G. Lösch, T. Jaracz, K. F. Klein, A. D. Schroeder, L. A. Swingle, na D. Sydlik. Onge Yehovha a nga hambeta a katekisa ni ku tiyisa Huvo leyi Fumaka, leyi sweswi yi engeteriweke, loko yi ri karhi yi ya emahlweni yi langutela mintirho ya vanhu va Xikwembu emisaveni hinkwayo ni ku khathalela timhaka ta vona ta moya.