Xirho Lexintshwa Xa Huvo Leyi Fumaka

HI Ravunharhu nimixo, January 24, 2018, ndyangu wa Bethele ya le United States ni ya le Canada yi twe xitiviso xo hlawuleka lexi nge: Makwerhu  Kenneth Cook, Jr., u hlawuriwe ku va xirho xa Huvo leyi Fumaka ya Timbhoni ta Yehovha.

Makwerhu Cook u tswariwe ni ku kulela edzongaxikarhi wa Pennsylvania, le U.S.A. U dyondze ntiyiso eka xichudenikulobye loko a ri ekusuhi ni ku pasa ntanga khume naswona u khuvuriwe hi June 7, 1980. U sungule ntirho wa nkarhi hinkwawo hi ku phayona hi September 1, 1982. Endzhaku ko phayona malembe mambirhi, u rhambiwe ku ya tirha eBethele ya le Wallkill le New York, hi October 12, 1984.

Ku ringana malembe ya 25, Makwerhu Cook u tirhe eka swiavelo swo hambanahambana endhawini ya Vugandliselo ni le Hofisini ya le Bethele. U tekane na Jamie hi 1996 naswona Jamie u sungule ku tirha eBethele ya le Wallkill. Hi December 2009, Makwerhu Cook ni nsati wakwe va yisiwe eNtsindza wa Dyondzo wa Watchtower ePatterson le New York, laha Makwerhu Cook a averiweke ku ya tirha ni Ndzawulo leyi Hlamulaka Swivutiso. Hi April 2016, endzhaku ka loko va tlhelele eWallkill, Makwerhu Cook ni nsati wakwe va yisiwe eBrooklyn, le New York. Endzhaku ka tin’hweti ta ntlhanu, va rhurhele eyindlunkulu ya misava hinkwayo eWarwick, le New York. Hi January 2017, Makwerhu Cook u hlawuriwe ku va mupfuni eka Komiti ya Vatsari ya Huvo leyi Fumaka.