Lexi Endlaka Leswaku Vanhu Va Lava Mupfuni

‘A NDZI ri muxanisi la nga ni tihanyi,’ ku vule khale ka wanuna la tikukumuxaka a tlhela a va ni vukarhi. A a ri musandzi wo biha loyi handle ka ntwela-vusiwana a karhateke valandzeri va Yesu Kreste lava chavaka Xikwembu a tlhela a va hlasela. U tsale a tsakile a ku: “Nilokoswiritano, ndzi kombisiwe tintswalo.” Hilaha swi vonakaka swi hlamarisa hakona muxanisi loyi wa tihanyi u hundzuke muapostola Pawulo la nga Mukreste wo tshembeka.—1 Timotiya 1:12-16; Mintirho 9:1-19.

A hi vanhu hinkwavo lava endleke swilo leswi Pawulo a swi endleke. Kambe, hinkwerhu ka hina ha tsandzeka ku fikelela mimpimanyeto ya Xikwembu. Ha yini? Hikuva “hinkw[erhu hi] dyohile, naswona [hi] kayivela ku vangama ka Xikwembu.” (Varhoma 3:23) Tlhandla-kambirhi, swa olova ku nyupela endzhopeni wa gome, kumbexana hi titwa hi bihe ngopfu lerova a hi nge wu kumi musa wa Xikwembu. Loko a anakanyisisa hi mboyamelo wa yena wa vudyoho, Pawulo u te: “Mina munhu wa maxangu! I mani loyi a nga ta ndzi ponisa eka miri lowu weriwaka hi rifu leri?” Loko a tihlamula u te: “Ndzi nkhensa Xikwembu ha Yesu Kreste Hosi ya hina!”—Varhoma 7:24, 25.

Xana Muvumbi wo lulama a nga va ni vuxaka njhani ni vadyohi? (Pisalema 5:4) Xiya leswaku Pawulo u te: “Ndzi nkhensa Xikwembu ha Yesu Kreste Hosi ya hina.” Un’wana loyi Xikwembu xi n’wi kombeke tintswalo u te: “Loko mani na mani a endla xidyoho, hi ni mupfuni eka Tatana, a nga Yesu Kreste, loyi a lulameke. Naswona yena i gandzelo ra ku vuyelelana ra swidyoho swa hina, kambe ku nga ri swa hina ntsena, ni swa misava hinkwayo.”—1 Yohane 2:1, 2.

Ha yini Yesu Kreste a vuriwa “mupfuni eka Tatana”? Naswona Yesu i “gandzelo ra ku vuyelelana” ra swidyoho hi ndlela yihi?

Lexi endlaka Leswaku Ku Laveka Mupfuni

Yesu u te emisaveni “ku nyikela moya-xiviri wakwe wu va nkutsulo wa lavo tala.” (Matewu 20:28) Nkutsulo i hakelo leyi humesiwaka leswaku u tlhela u xava nchumu wu va wa wena, kumbe ku ntshunxa munhu wo karhi kumbe nchumu wo karhi. Riendli ra rito ra Xiheveru leri hundzuluxeriweke ri va “nkutsulo” ri nyika mongo wo funengeta kumbe ku riha swidyoho. (Pisalema 78:38) Rito ra Xigriki, ro fana ni leri kumekaka eka Matewu 20:28, a a ri tirhisiwa ngopfu-ngopfu eka hakelo leyi humesiwaka ku kutsula vakhotsiwa va le nyimpini kumbe ku ntshunxa mahlonga. Leswaku ku hetisisiwa vululami, ku humesiwa nchumu lowu ringanaka ni lowun’wana.

Vanhu va ve mahlonga hikwalaho ka leswi munhu wo sungula a xandzukeleke Xikwembu. Tanihi laha swi kombisiweke hakona eka Genesa ndzima 3, munhu yoloye wo hetiseka—ku nga Adamu—u hlawule ku nga yingisi Yehovha Xikwembu. Hi ku endla tano, u tixavisile exidyohweni ni le ku feni swin’we ni vana va yena lava a va nga si tswariwa. Xisweswo Adamu ni vana va yena hinkwavo, va lahlekeriwe hi nyiko ya vutomi bya munhu la hetisekeke.—Varhoma 5:12, 18, 19; 7:14.

Le Israyele wa khale, Xikwembu a xi lunghiselele leswaku swidyoho swa vanhu swi rihiwa kumbe swi funengetiwa hi switlhavelo swa swiharhi. (Levhitika 1:4; 4:20, 35) Entiyisweni, vutomi bya xiharhi lexi ku endliwaka xitlhavelo ha xona a byi siva vutomi bya mudyohi. (Levhitika 17:11) Xisweswo, “siku ra ku kombela ku rivaleriwa” ri nga ha vuriwa “siku ra ku kutsuriwa.”—Levhitika 23:26-28.

Hambiswiritano, tanihi leswi swiharhi swi nga ringaniki na munhu, a swi nga “koteki leswaku ngati ya tinkunzi ni ya timbuti yi susa swidyoho [hi ku helela].” (Vaheveru 10:1-4) Leswaku xitlhavelo xi va ni ntikelo wa ku riha kumbe ku susa swidyoho hi ku helela, a xi fanele xi ringana hi ntikelo ni leswi Adamu a lahlekeriweke hi swona. Vululami a byi lava leswaku munhu la hetisekeke (Yesu Kreste) a hetisisa leswi munhu un’wana la hetisekeke (Adamu) a swi lahleke. I vutomi bya munhu la hetisekeke ntsena lebyi a byi ta riha nkutsulo wa ku ponisa vana va Adamu evuhlongeni lebyi tata wa vona wo sungula a va xaviseke eka byona. Vululami bya ntiyiso a byi ta fikeleriwa hi ku humesa “moya-xiviri hi moya-xiviri.”—Eksoda 21:23-25.

Loko Adamu a dyoha kutani a gweviwa rifu, u fe ni vana va yena lava a va ha ri emasengeni ya yena. Yesu munhu wo hetiseka ku nga “Adamu lowo hetelela” a nga swi tsakelanga ku va ni ndyangu. (1 Vakorinto 15:45) A ri ni vana lava nga siki tswariwaka emasengeni ya yena loko a fa tanihi xitlhavelo xa munhu la hetisekeke. Hikwalaho, ku nga ha vuriwa leswaku rixaka ra vanhu leri a ri ri endzeni ka masenge ya yena ri fe na yena. Yesu u titekele ndyangu wa Adamu lowu dyoheke wu tlhela wu fa wu va wa yena. U tshike mfanelo yo va ni ndyangu wa yena. Hi ku nyikela hi vutomi bya yena lebyi hetisekeke, Yesu u xave vanhu hinkwavo lava humaka eka Adamu leswaku va ta va ndyangu wa Yena, va N’wi endla “Tatana La Nga Riki Na Makumu” wa vona.—Esaya 9:6, 7.

Xitlhavelo xa nkutsulo xa Yesu xi pfulele vanhu lava yingisaka ndlela yo kuma tintswalo ta Xikwembu ni vutomi lebyi nga heriki. Xisweswo, muapostola Pawulo u tsarile: “Hakelo leyi tisiwaka hi xidyoho i rifu, kambe nyiko leyi nyikiwaka hi Xikwembu i vutomi lebyi nga heriki ha Kreste Yesu Hosi ya hina.” (Varhoma 6:23) Hi susumeteleka ku dzunisa Yehovha hikwalaho ka rirhandzu ni ntwela-vusiwana lowu fambisanaka ni nkutsulo lowu a wu lunghiseleleke, lowu koxeke yena ni N’wana wa yena la rhandzekaka swinene. (Yohane 3:16) Kunene Yesu u tikombise a ri “mupfuni eka Tatana” loko a pfuxeriwa evuton’wini bya le tilweni naswona u nyikele ntikelo wa xitlhavelo xa yena xa nkutsulo eka Xikwembu ematilweni.a (Vaheveru 9:11, 12, 24; 1 Petro 3:18) Kambe Yesu Kreste u swi kombisa njhani sweswi leswaku i mupfuni wa hina ematilweni?

[Nhlamuselo ya le hansi]

[Xifaniso lexi nga eka tluka 4]

Vutomi bya Yesu a ri munhu wa nyama la hetisekeke byi ve nxavo wo kutsula vana va Adamu