Wa Tsundzuka Xana?

Xana u vuyeriwile hi ku hlaya timagazini ta sweswinyana ta Xihondzo xo Rindza? Kutani, a hi vone loko u nga swi kota ku hlamula swivutiso leswi landzelaka:

• I yini lexi endleke leswaku Khisimusi yi amukeriwa hi ku olova le Korea?

A ku ri ni dyondzo ya khale le Korea ni le matikweni man’wana malunghana ni xikwembu xa khixi lexi a ku ehleketiwa leswaku xi ta hi chimele xi tisa tinyiko hi December. Nakambe, endzhaku ka Nyimpi ya Vumbirhi ya Misava, masocha ya United States ma ave tinyiko ni mphalalo etikerekeni ta kwalaho.—12/15, matluka 4, 5.

• Hi ku hetiseka ka Esaya 21:8, i “murindzi” wihi loyi Xikwembu xi nga na yena enkarhini wa hina?

Vakreste lava totiweke hi moya, lava tirhaka tanihi ntlawa wa murindzi, va xalamukise vanhu hi leswi swiendlakalo swa misava leswi hetisisaka vuprofeta bya Bibele swi vulaka swona. Va tlhele va pfuna swichudeni swa Bibele ku vona ni ku papalata tidyondzo ni swiendlo leswi nga riki swa matsalwa.—1/1, matluka 8, 9.

• Xana a va ri vamani “Vamakwavo Va Le Poland”?

A va ri ntlawa lowutsongo wa vukhongeri hi lembe-xidzana ra vu-16 ni ra vu-17 ePoland lowu a wu khutaza ku namarhela Bibele hikwalaho wu ala tidyondzo-nkulu ta kereke, to tanihi Vunharhu-n’we, ku khuvuriwa ka tincece ni ndzilo wa tihele. Hi ku famba ka nkarhi, va xanisiwe hi tihanyi kutani va boheka ku balekela ematikweni man’wana.—1/1, matluka 21-3.

• Ha yini vuprofeta bya Bibele byi fanele byi tshembiwa ku ri ni ku tshemba ku vhumbha ka vativi va vumundzuku kumbe vangoma va swilo swa le mpfhukeni?

Vanhu lava tivitanaka vaprofeta va tikombe va nga tshembeki hikuva va honisa Yehovha ni Bibele. I vuprofeta bya Bibele ntsena lebyi nga ku pfunaka ku tiva ndlela leyi swiendlakalo swi fambisanaka ha yona ni xikongomelo xa Xikwembu, byi vuyerisa wena ni ndyangu wa wena hilaha ku nga heriki.—1/15, tluka 3.

• Hi swihi swilo swin’wana leswi nyikaka vumbhoni bya leswaku hi hanya emasikwini ya makumu?

Hi nga vona vuyelo bya ku hlongoriwa ka Sathana etilweni. (Nhlavutelo 12:9) Hi hanya enkarhini wa “hosi” yo hetelela leyi boxiweke eka Nhlavutelo 17:9-11. Nhlayo ya Vakreste va xiviri lava totiweke ya hunguteka, kambe swi vonaka onge van’wana va vona va ta va va ha ri kona emisaveni loko nhlomulo lowukulu wu sungula.—1/15, matluka 12, 13.

• Xana buku ya Habakuku yi tsariwe rini, naswona ha yini hi fanele hi yi rhandza?

Buku leyi ya Bibele yi tsariwe kwalomu ka 628 B.C.E. Yi tamele vuavanyisi bya Yehovha eka Yuda wa khale ni le ka Babilona. Yi tlhela yi vulavula hi vuavanyisi bya Xikwembu bya mafambiselo lawa yo homboloka lebyi nga le kusuhi.—2/1, tluka 8.

• Hi kwihi eBibeleni laha hi nga kumaka ndzayo ya manana ya vutlhari mayelana ni vavasati lava fanelekaka?

Ndzima yo hetelela ya buku ya Swivuriso, ndzima 31, i xihlovo lexinene xa ndzayo yo tano.—2/1, matluka 30, 31.

• Ha yini hi fanele hi tsaka leswi Yehovha a hi paluxeleke “mianakanyo ya Kreste”? (1 Vakorinto 2:16)

Hi ku tirhisa rungula ra Evhangheli, Yehovha u endle leswaku hi kota ku dyondza hi mianakayo, mintlhaveko, mintirho ni swilo leswi a swi ri swa nkoka eka Yesu. Leswi swi nga hi pfuna leswaku hi fana na Yesu swinene, ngopfu-ngopfu eka nkoka lowu hi wu vekaka entirhweni wo chumayela lowu ponisaka vutomi.—2/15, tluka 25.

• Xana Xikwembu xa swi hlamula swikhongelo namuntlha?

Ina. Hambileswi Bibele yi kombisaka leswaku Xikwembu a xi hlamuli swikhongelo hinkwaswo, mintokoto ya manguva lawa yi komba leswaku hakanyingi xi hlamule vanhu lava khongeleleke nchavelelo ni mpfuno etimhakeni to fana ni ku ololoxa swiphiqo swa vukati.—3/1, matluka 3-7.

• Xana hi nga endla yini leswaku hi kuma matimba ya Xikwembu?

Hi nga ma kombela hi xikhongelo, hi nga kuma matimba ya moya hi ku ya eBibeleni ni ku tiyisiwa hi xinakulobye xa Vukreste.—3/1, matluka 15, 16.

• Xana vatswari va nga va pfuna njhani vana va vona leswaku va vuyeriwa swinene eminhlanganweni ya Vukreste?

Va nga pfuna vana va vona ku tshama va xalamukile, kumbexana hi ku va pfumelela va etlela va nga si ya eminhlanganweni. Vana va nga khutaziwa ku tsala “tinotsi,” tanihi ku tsala marito lama tolovelekeke kumbe mavito lava tirhisiwaka.—3/15, matluka 17, 18.

• Hi swihi swilo swin’wana leswi hi nga swi dyondzaka eka xikombiso xa Yobo?

Yobo u rhangise vuxaka bya yena ni Xikwembu emahlweni, loko a tirhisana ni vanhu van’wana a a nga yi hi nghohe, u lwele ku tshembeka hilaha ku tiyeke eka nsati wa yena, u kombise ku tikarhatela vumoya bya ndyangu wa yena naswona u tiyisele hi ku tshembeka emiringweni.—3/15, matluka 25-7.

• Xana Bibele yi ni xihundla lexi nga paluxaka marungula lama tumbeleke?

Doo. Ku nga ha vuriwa leswi fanaka eka tibuku to karhi ta misava malunghana ni xihundla lexi ku vuriwaka leswaku xi kona. Swihundla leswi ku vuriwaka leswaku swi kona eBibeleni a swi ta tekiwa swi nga pfuni nchumu hikwalaho ka ku hambana-hambana loku nga kona eka mapeletelo ya matsalwa ya voko ya Xiheveru.—4/1, matluka 30, 31.