Swivutiso Swa Vahlayi

Esaya ndzima 53 yi tamele vuprofeta bya Mesiya lebyi tivekaka swinene. Ndzimana 10 yi ri: “Yehovha u tsakele ku n’wi pfotlosa; a n’wi vabyisa.” Xana leswi swi vula yini?

Swa olova ku vona leswaku hikwalaho ka yini ku nga tlakukaka xivutiso hi Esaya 53:10. Vakreste va ntiyiso a va anakanyi leswaku Xikwembu xa hina xa tintswalo ni vunene xi nga tsakela ku pfotlosa kumbe ku endla un’wana a vabya. Bibele yi hi nyika xisekelo xo tshemba leswaku Xikwembu a xi tsakeli ku xanisa munhu la nga riki na nandzu. (Deteronoma 32:4; Yeremiya 7:30, 31) Hi malembe-xidzana swi nga ha endleka leswaku Yehovha u pfumelele ku xaniseka hi swivangelo leswi fambisanaka ni vutlhari ni rirhandzu rakwe. Kambe entiyisweni a nga vangelanga ku xaniseka ka N’wana wa yena la rhandzekaka, Yesu. Kutani, xana xivulwa lexi xi vula yini?

Hi ta pfuniwa ku kuma nhlamuselo loko hi languta ndzimana hinkwayo, hi xiya laha rito ‘tsakela’ ri humelelaka kona kambirhi. Esaya 53:10 yi ri: “Yehovha u tsakele ku n’wi pfotlosa; a n’wi vabyisa. Loko wo veka moya-xiviri wakwe wu va gandzelo ra nandzu, u ta va vona vana vakwe, u ta lehisa masiku yakwe, naswona leswi tsakeriwaka hi Yehovha swi ta humelela evokweni rakwe.”

Mongo hinkwawo wa Bibele wu kombisa leswaku ku ‘tsakela ka Yehovha’ loku vuriweke emakumu ya ndzimana, ku kandziyisa ku hetiseka ka xikongomelo xa yena hi ku tirhisa Mfumo. Hi ku endla leswi Yehovha u ta lwela vuhosi byakwe naswona u ta endla swi koteka ku susa xidyoho eka vanhu lava yingisaka lexi hi xi kumeke tanihi ndzhaka—swidyoho swa hina. (1 Tikronika 29:11; Pisalema 83:18; Mintirho 4:24; Vaheveru 2:14, 15; 1 Yohane 3:8) Yinhla-nkulu eka mhaka leyi hinkwayo hi leswaku N’wana wa Xikwembu a a fanele a hundzuka munhu wa nyama ni ku hi endlela xitlhavelo xa nkutsulo. Tanihi laha hi tivaka hakona, Yesu u xanisekile. Bibele yi hi byela leswaku “u dyondze ku yingisa eka swilo leswi a xanisekeke ha swona.” Kutani Yesu u dyondze swo karhi eka nxaniso wolowo.—Vaheveru 5:7-9.

Yesu u swi tive ka ha ri emahlweni leswaku vutomi byakwe byo hlawuleka a byi ta katsa nhlomulo. Sweswo swi vonaka kahle emaritweni yakwe lama tsariweke eka Yohane 12:23, 24, laha hi hlayaka marito lama nge: “Nkarhi wu fikile wa leswaku N’wana wa munhu a vangamisiwa. Hakunene ndzi tiyisile ndzi ri eka n’wina, Loko ndzoho ya koroni yi nga weli emisaveni yi fa, yi tshama yi ri ndzoho yin’we ntsena; kambe loko yi fa, hi kona yi tswalaka mihandzu yo tala.” Ina, Yesu a a swi tiva leswaku u fanele a tshama a tshembekile hambiloko a langutane ni rifu. Rungula ri ya emahlweni ri ku: “‘Kutani moya-xiviri wa mina wu karhatekile, ndzi ta ku yini? Tatana, ndzi ponise enkarhini lowu. Nilokoswiritano, hi yona mhaka leyi ndzi teke enkarhini lowu. Tatana, vangamisa vito ra wena.’ Hikokwalaho rito ri ta ri huma etilweni: ‘Ndzi ri vangamisile naswona ndzi ta tlhela ndzi ri vangamisa.’”—Yohane 12:27, 28; Matewu 26:38, 39.

Hi le ka mongo lowu laha hi nga twisisaka Esaya 53:10. Yehovha a a swi tiva kahle leswaku ntokoto wa N’wana wa yena a wu ta katsa ku pfotlosiwa. Kambe loko a anakanya hi ku dzuneka ni vunene lebyikulu lebyi nga ta va kona, Yehovha u tsakele leswi a swi ta humelela Yesu. Hi mongo wolowo, Yehovha “u tsakele ku n’wi pfotlosa,” kumbe ku pfotlosiwa ka Mesiya. Naswona Yesu u swi tsakerile leswi a a ta swi endla ni leswi a swi hetisiseke. Entiyisweni, hilaha Esaya 53:10 yi gimetaka hakona, “leswi tsakeriwaka hi Yehovha swi [humelerile] evokweni rakwe.”