“Nkarhi Wakwe A wu Nga Si Fika”
“A nga kona loyi a n’wi khomeke, hikuva nkarhi wakwe a wu nga si fika.”—YOHANE 7:30.
1. I swivangelo swihi swimbirhi leswi lawuleke swiendlo swa Yesu?
YESU KRESTE u byele vaapostola va yena a ku: ‘N’wana wa munhu a nga telangi ku tirheriwa, kambe u tele ku tirhela ni ku nyikela moya-xiviri wakwe wu va nkutsulo wa lavo tala.’ (Matewu 20:28) Loko a byela mufumi wa Rhoma Pontiyo Pilato, u te: “Leswi ndzi velekeriweke swona, ni leswi ndzi teleke swona emisaveni i ku ta nyikela vumbhoni malunghana ni ntiyiso.” (Yohane 18:37) Yesu a a xi tiva kahle xikongomelo xa ku fa ka yena swin’we ni ntirho lowu a a fanele a wu endla loko a nga si fa. A a wu tiva kahle ni nkarhi lowu a a ri na wona wo hetisisa vurhumiwa bya yena. Vutirheli bya yena emisaveni tanihi Mesiya a byi ta teka malembe manharhu ni hafu ntsena. Byi sungule loko a khuvuriwa hi mati eNambyeni wa Yordani (hi 29 C.E.) eku sunguleni ka mavhiki ya 70 yo fanekisela lama profetiweke, ivi byi hela loko a fa emhandzini ya nxaniso exikarhi ka vhiki rolero (hi 33 C.E.). (Daniyele 9:24-27; Matewu 3:16, 17; 20:17-19) Hikwalaho, swiendlo swa Yesu hinkwaswo emisaveni a swi lawuriwa swinene hi swivangelo swimbirhi: ku nga xikongomelo xa ku ta ka yena ni ku endla swilo hi nkarhi lowu vekiweke.
2. Xana Tievhangeli ti n’wi hlamusela njhani Yesu Kreste, naswona u swi kombise ku yini leswaku wa byi xiya vurhumiwa bya yena?
2 Rungula leri nga eka Tievhangeli ri kombisa Yesu Kreste tanihi wanuna wa migingiriko loyi a fambeke etikweni hinkwaro ra Palestina, a twarisa mahungu lamanene ya Mfumo wa Xikwembu a tlhela a endla mintirho yo tala ya matimba. Malunghana ni xiphemu xo sungula xa vutirheli bya Yesu bya matimba, ku vuriwa leswi landzelaka ha yena: “Nkarhi wakwe a wu nga si fika.” Yesu u vule marito lawa: “Nkarhi wa mina lowu faneleke a wu si fika hi ku helela.” Loko vutirheli bya yena se byi ri kusuhi ni ku hela, u tirhise marito lama nge “nkarhi wu fikile.” (Yohane 7:8, 30; 12:23) Ku tiva ka Yesu nkarhi wa ntirho lowu a averiweke wona, ni nkarhi wa rifu ra yena ra gandzelo, ku fanele ku khumbe leswi a swi vuleke ni ku swi endla. Ku twisisa leswi swi nga hi endla hi kota ku twisisa vumunhu bya yena ni ndlela leyi a a anakanya ha yona, leswi nga ta hi pfuna ku “landzelerisisa mikondzo yakwe.”—1 Petro 2:21.
Ku Tiyimisela Ku Endla Ku Rhandza Ka Xikwembu
3, 4. (a) Ku humelela yini enkhubyeni wa vukati eKana? (b) Ha yini N’wana wa Xikwembu a bakanya xiringanyeto xa Mariya xa leswaku a endla swo karhi malunghana ni leswi vhinyo yi heleke, naswona hi nga dyondza yini eka leswi?
3 I lembe ra 29 C.E. Ka ha ku hundza masiku ma nga ri mangani ntsena Yesu a hlawule vadyondzisiwa va yena vo sungula. Hinkwavo ka vona va te enkhubyeni wa vukati lowu a wu ri emutini wa Kana emugangeni wa Galeliya. Mariya, mana wa Yesu na yena u kona kwalaho. Vhinyo ya hela. Hi ku vona leswaku n’wana wa yena u fanele a endla xo karhi, Mariya u ri eka yena: “A va na vhinyo.” Kambe Yesu wa hlamula: “Xana ndzi na yini na wena, wansati? Nkarhi wa mina a wu si fika.”—Yohane 1:35-51; 2:1-4.
4 Nhlamulo ya Yesu ya leswaku, “Xana ndzi na yini na wena, wansati?” i xivutiso xa ndlela ya khale leyi a yi kombisa ku nga pfumelelani ni leswi ringanyetiwaka kumbe leswi komberiwaka. Ha yini Yesu a nga pfumelelani ni marito ya Mariya? Se u ni malembe ya 30 hi vukhale. Mavhiki ma nga ri mangani emahlweninyana, u khuvuriwile, a totiwa hi moya lowo kwetsima ivi Yohane Mukhuvuri a n’wi vula “Xinyimpfana xa Xikwembu lexi susaka xidyoho xa misava.” (Yohane 1:29-34; Luka 3:21-23) Sweswi nkongomiso wa yena wu fanele wu huma eka Mulawuri Lonkulu la n’wi rhumeke. (1 Vakorinto 11:3) Ku hava munhu, hambi ku ri xaka lerikulu, loyi a nga pfumeleriwaka ku kavanyeta ntirho lowu Yesu a a tele ku ta wu endla emisaveni. Ndlela leyi Yesu a hlamulaka Mariya ha yona yi kombisa kahle leswaku a a tiyimisele ku endla ku rhandza ka Tata wa yena hakunene! Onge na hina hi nga tiyimisela hilaha ku fanaka ku hetisisa “mfanelo hinkwayo” ya hina eka Xikwembu.—Eklesiasta 12:13.
5. I singita rihi leri Yesu Kreste a ri endlaka eKana, naswona ri endla leswaku ku va ni vuyelo byihi eka van’wana?
5 Hi ku twisisa yinhla ya marito ya n’wana wa yena, hi ku hatlisa Mariya u tshika ku nghenelela ivi a lerisa valanguteri a ku: “Xin’wana ni xin’wana lexi a mi byelaka xona, xi endleni.” Kutani Yesu u tlhantlha xiphiqo lexi. U lerisa valanguteri leswaku va tata makhuwana hi mati, ivi a hundzula mati ma va vhinyo yo nandziha ngopfu. Leswi swi va masungulo ya matimba ya Yesu yo endla masingita, swi nyikela xikombiso xa leswaku moya wa Xikwembu wu le henhla ka yena. Loko vadyondzisiwa lavantshwa va vona singita leri, ripfumelo ra vona ra tiyisiwa.—Yohane 2:5-11.
Ku Hisekela Yindlu Ya Yehovha
6. Ha yini Yesu a hlundzukisiwa hi leswi a swi vonaka etempeleni eYerusalema, naswona i goza rihi leri a ri tekaka?
6 Ximun’wana xa 30 C.E. se xi fikile, naswona Yesu ni vanakulobye va yena va le ndleleni yo ya eYerusalema va ya tlangela Paseka. Loko va ri kwalaho, vadyondzisiwa va vona Murhangeri wa vona a endla swilo swin’wana leswi kumbexana va nga si tshamaka va n’wi vona a swi endla. Van’wamabindzu lava nga ni makwanga va Vayuda va xavisa swiharhi ni swinyenyana swo endla magandzelo ha swona endzeni ka tempele. Naswona va va durhisela ngopfu vagandzeri vo tshembeka lava nga Vayuda. Hikwalaho ko hlundzuka, Yesu u teka goza ro karhi. U endla nkharisa wa mapindza ivi a hlongola vaxavisi. U chulule timali ta nsimbi ta vacincisi va mali, a wisetela ni matafula ya vona. U lerisa lava va xavisaka matuva a ku: “Susani swilo leswi laha!” Loko vadyondzisiwa va Yesu va n’wi vona a hiseka hi ndlela leyi, va tsundzuka vuprofeta lebyi vulavulaka hi N’wana wa Xikwembu, lebyi nge: “Ndzi ta dyiwa hi ku hisekela yindlu ya wena.” (Yohane 2:13-17; Pisalema 69:9) Na hina hi fanele hi hisekela ku bakanya mimboyamelo ya misava leswaku yi thyakisa vugandzeri bya hina.
7. (a) I yini lexi susumetelaka Nikodema leswaku a endzela Mesiya? (b) Hi dyondza yini eka leswi Yesu a nyikeleke vumbhoni eka wansati wa Musamariya?
7 Loko Yesu a ri eYerusalema, u endla masingita yo hlamarisa naswona vanhu vo tala va pfumela eka yena. Hambi ku ri Nikodema, xirho xa Sanedri, kumbe huvo leyi tlakukeke ya Xiyuda, u tsakisiwa hi Yesu kutani u ta eka yena nivusiku leswaku a ta dyondza swo tala. Endzhaku ka sweswo, Yesu ni vadyondzisiwa va yena va tshama “etikweni ra le Yudiya” ku ringana tin’hweti ta nhungu, va ri karhi va chumayela va tlhela va endla vadyondzisiwa. Hambiswiritano, endzhaku ka ku khotsiwa ka Yohane Mukhuvuri, va suka eYudiya va ya eGaleliya. Loko va ri karhi va famba emugangeni wa Samariya, Yesu u tirhisa nkarhi lowu n’wi pfulekeleke ku nyikela vumbhoni eka wansati wa Musamariya. Leswi swi pfulela Vasamariya vo tala ndlela ya ku va vapfumeri. Na hina a hi xalamukeleni minkarhi leyi hi pfulekelaka ya ku vulavula hi Mfumo.—Yohane 2:23; 3:1-22; 4:1-42; Marka 1:14.
Ku Dyondzisa Swinene eGaleliya
8. I ntirho wihi lowu Yesu a wu sungulaka eGaleliya?
8 Loko “nkarhi” wa ku fa ka Yesu wu nga si fika, u ni swo tala swo swi endla entirhweni wa Tata wa yena wa le tilweni. Le Galeliya, Yesu u sungula vutirheli lebyikulu swinene ku tlula lebyi a byi endleke eYudiya ni le Yerusalema. U ya “[etikweni] hinkwaro ra Galeliya, a dyondzisa emasinagogeni ya vona ni ku chumayela mahungu lamanene ya mfumo ni ku herisa swifo swa mixaka hinkwayo ni vulema bya mixaka hinkwayo evanhwini.” (Matewu 4:23) Marito ya yena lama tlhontlhaka lama nge: “Hundzukani, hikuva mfumo wa matilo wu tshinele,” ma hangalaka emugangeni hinkwawo. (Matewu 4:17) Etin’hwetini ti nga ri tingani, loko vadyondzisiwa vambirhi va Yohane Mukhuvuri va ta eka Yesu leswaku va ta titwela xiviko hi ta vona, u va byele leswi: “Khomani ndlela, mi ya vikela Yohane leswi mi swi voneke ni ku swi twa: lava feke mahlo va sungula ku vona, lava khutaka va famba, va nhlokonho va basisiwa naswona lava feke tindleve va twa, ni lava feke va pfuxiwa, swisiwana swona swi karhi swi byeriwa mahungu lamanene. Kutani wa tsaka loyi a nga khunguvanyekangiki ha mina.”—Luka 7:22, 23.
9. Ha yini mintshungu yi khitikanela eka Kreste Yesu, naswona hi nga dyondza yini eka leswi?
9 ‘Ndhuma ya Yesu leyinene yi hangalaka emugangeni hinkwawo wa le kusuhi,’ naswona mintshungu leyikulu yi khitikanela eka yena—yi huma eGaleliya, eDekapolisi, eYerusalema, eYudiya ni le tlhelweni lerin’wana ra Nambu wa Yordani. (Luka 4:14, 15; Matewu 4:24, 25) Yi ta eka yena ku nga ri hikwalaho ka ku horisa ka yena hi singita ntsena kambe ni hikwalaho ka tidyondzo ta yena leti hlamarisaka. Rungula ra yena ra tsakisa ri tlhela ri khutaza. (Matewu 5:1–7:27) Marito ya Yesu ma tsakisa naswona ma phyuphyisa. (Luka 4:22) Mintshungu yi “hlamarisiwa hi ndlela yakwe yo dyondzisa,” hikuva u vulavula hi Matsalwa kukota munhu la nga ni vulawuri. (Matewu 7:28, 29; Luka 4:32) Xana u kona munhu loyi a a nga ta kokiwa hi munhu wo tano? Onge na hina hi nga hlakulela vutshila byo dyondzisa leswaku vanhu va timbilu to tshembeka va ta kokeriwa entiyisweni.
10. Ha yini vanhu va le mutini wa Nazareta va ringeta ku dlaya Yesu, naswona ha yini va tsandzeka?
10 Hambiswiritano, a hi vayingiseri hinkwavo va Yesu lava yingiseke marito ya yena. Ni le ku sunguleni ka vutirheli bya yena, loko a ri karhi a dyondzisa esinagogeni ra le tikweni ra ka vona eNazareta, ku endliwe matshalatshala yo n’wi dlaya. Hambileswi vanhu va muti wolowo va hlamarisiwaka hi “marito lamanene” ya yena, va lava ku vona masingita ya yena. Hambiswiritano, ematshan’weni yo endla mintirho yo tala ya matimba, Yesu u paluxa vutianakanyi bya vona ni ku pfumala ka vona ripfumelo. Hi ku hlundzuka, lava nga esinagogeni va yima, va khoma Yesu, ivi va n’wi tsutsumisela entshaveni leswaku va ta n’wi cukumetela erigiyagiyeni hi nhloko. Kambe wa va balekela ivi a famba a sirhelelekile. “Nkarhi” wa rifu ra yena a wu nga si fika.—Luka 4:16-30.
11. (a) Ha yini varhangeri van’wana va vukhongeri va tile ku ta yingisela Yesu? (b) Ha yini Yesu a hehliwa hi leswaku u tlule Savata?
11 Varhangeri va vukhongeri—vatsari, Vafarisi, Vasaduki ni van’wana—na vona va tala ku va kona laha Yesu a chumayelaka kona. Vo tala va vona a va telanga ku ta yingisela ni ku dyondza, kambe va tele ku ta kuma swihoxo ni ku ta ringeta ku n’wi phasa. (Matewu 12:38; 16:1; Luka 5:17; 6:1, 2) Hi xikombiso, loko a ri endleleni yo ya ePasekeni ya 31 C.E. eYerusalema, Yesu u hanyisa munhu loyi a vabyeke malembe ya 38. Varhangeri va vukhongeri va Vayuda va hehla Yesu hi leswaku u tlule Savata. Wa va hlamula: “Tata wa mina u ya emahlweni a tirha ku fikela sweswi, na mina ndzi ya emahlweni ndzi tirha.” Sweswi Vayuda va n’wi hehla hi xisandzu xo tivula N’wana wa Xikwembu hi ku xi vitana Tatana. Va lava ku dlaya Yesu, kambe yena ni vadyondzisiwa va yena va suka eYerusalema va ya eGaleliya. Hilaha ku fanaka, hi ta va hi tlharihile loko hi papalata ku jamelana loku nga fanelangiki ni vakaneti loko hi ri karhi hi tirha hi matimba eku chumayeleni ka Mfumo ni le ntirhweni wo endla vadyondzisiwa.—Yohane 5:1-18; 6:1.
12. Xana Yesu u endle nsimu ya le Galeliya hi mpimo wo fikela kwihi?
12 Kwalomu ka lembe leri tlhandlamaka ni hafu, Yesu u endla vutirheli bya yena byo tala eGaleliya, a a endzela eYerusalema ntsena loko a ya eminkhubyeni yinharhu ya lembe ni lembe ya Vayuda. Loko ma helerile, u endle mapfhumba manharhu yo chumayela eGaleliya: ro sungula a ri ni vadyondzisiwa lavantshwa va mune, ra vumbirhi a ri ni vaapostola va 12 naswona pfhumba lerikulu ra kona u ri endle ni vaapostola lava leteriweke lava na vona va rhumiweke ku ya chumayela. Mawaku vumbhoni lebyikulu lebyi nyikeriwaka malunghana ni ntiyiso eGaleliya!—Matewu 4:18-25; Luka 8:1-3; 9:1-6.
Ku Nyikela Vumbhoni Hi Xivindzi eYudiya Ni Le Periya
13, 14. (a) Xana Vayuda va lava ku khoma Yesu hi nkarhi wihi? (b) Ha yini tindhuna ti tsandzekile ku khoma Yesu?
13 I xixikana xa 32 C.E., naswona “nkarhi” wa Yesu a wu si fika. Nkhuvo wa Titabernakela wu tshinele. Vamakwavo va Yesu hi manana va n’wi khongotela va ku: “Hundza u ya eYudiya.” Va lava leswaku Yesu a kombisa matimba ya yena ya masingita eka hinkwavo lava hlengeletaneke enkhubyeni eYerusalema. Kambe, Yesu u vona khombo. Kutani u byela vamakwavo a ku: “Mina a ndzi si tlhandlukela enkhubyeni lowu, hikuva nkarhi wa mina lowu faneleke a wu si fika hi ku helela.”—Yohane 7:1-8.
14 Endzhaku ko hlwelanyana eGaleliya, Yesu u ya eYerusalema “a famba exihundleni ku nga ri eku vonakaleni.” Kunene Vayuda va n’wi lava enkhubyeni, va ku: “Xana munhu luyani u kwihi?” Loko nkhuvo wu ri exikarhi, Yesu u ya etempeleni ivi hi xivindzi a sungula ku dyondzisa. Va lava ku n’wi khoma, kumbexana va n’wi hoxa ekhotsweni kumbe leswaku a dlayiwa. Kambe, a va swi koti hikuva ‘nkarhi wa yena a wu nga si fika.’ Vo tala sweswi va kombisa ripfumelo eka Yesu. Hambi ku ri tindhuna leti rhumiweke hi Vafarisi leswaku ti ya n’wi khoma ti tlhele ximandlamandla, ti ku: “Ku hava munhu un’wana la tshameke a vulavula hi ndlela leyi.”—Yohane 7:9-14, 30-46.
15. Ha yini Vayuda va rhola maribye leswaku va hoxetela Yesu, naswona i tsima rihi ro chumayela leri a ri sungulaka endzhaku ka sweswo?
15 Ku hambana exikarhi ka Yesu ni vakaneti va yena va Vayuda ku ya emahlweni loko a ri karhi a dyondzisa malunghana ni Tata wa yena etempeleni hi nkarhi wa nkhuvo. Hi siku ro hetelela ra nkhuvo, hikwalaho ko nyangatsiwa hi marito ya Yesu lama vulavulaka hi vukona bya yena a nga si va munhu wa nyama, Vayuda va rhola maribye ya ku n’wi hoxetela ha wona. Kambe wa tumbela ivi a famba a nga vavisekanga. (Yohane 8:12-59) Yesu u ya ehandle ka Yerusalema ivi a sungula tsima lerikulu ro nyikela vumbhoni eYudiya. U hlawula vadyondzisiwa va 70, naswona endzhaku ko va letela u va rhuma havambirhi-mbirhi leswaku va ya ensin’wini. Va rhanga emahlweni va ya endhawini yin’wana ni yin’wana ni le mutini wun’wana ni wun’wana lowu Yesu, loyi a fambaka ni vaapostola va yena a kunguhataka ku ya eka wona.—Luka 10:1-24.
16. Xana Yesu u balekela khombo rihi hi nkarhi wa Nkhuvo wa ku Nyiketela, naswona u gingiriteka entirhweni wihi nakambe?
16 Hi vuxika bya 32 C.E., “nkarhi” wa Yesu wa tshinela. U ya eYerusalema eNkhubyeni wa ku Nyiketela. Vayuda va ha lava ku n’wi dlaya. Loko Yesu a ri karhi a famba erikupakupeni ra tempele, va n’wi rhendzela. Endzhaku ko n’wi hehla hi xisandzu nakambe, va rhola maribye leswaku va n’wi dlaya hi wona. Kambe hilaha a endleke hakona eminkarhini leyi hundzeke, Yesu wa baleka. Endzhakunyana ka kwalaho se u le ndleleni a ri karhi a dyondzisa, sweswi u dyondzisa hi muti ni muti ni hi ximutana ni ximutana emugangeni wa Periya, entsungeni wa Yordani a suka eYudiya. Naswona vo tala va pfumela eka yena. Kambe rungula ra malunghana ni munghana wa yena la rhandzekaka Lazaro ri endla leswaku a tlhelela eYudiya.—Luka 13:33; Yohane 10:20-42.
17. (a) I rungula rihi ra xihatla leri Yesu a ri kumaka loko a ri karhi a chumayela ePeriya? (b) I yini lexi kombisaka leswaku Yesu wa xi xiya xikongomelo xa xiendlo lexi a faneleke a xi endla ni xa ku fambisana ni minkarhi?
17 Rungula ra xihatla ri huma eka Marta na Mariya, vamakwavo va xisati va Lazaro, lava tshamaka eBetaniya wa Yudiya. Vanhu lava rhumiweke va ri: “Hosi, waswivo, loyi u nga ni xinakulobye eka yena wa vabya.” Yesu wa hlamula: “Xikongomelo xa vuvabyi a hi rifu kambe i ku vangamisa Xikwembu, leswaku N’wana wa Xikwembu a vangamisiwa ha swona.” Leswaku a hetisisa xikongomelo lexi, Yesu u tshama laha a nga kona hi vomu ku ringana masiku mambirhi. Kutani u byela vadyondzisiwa va yena a ku: “A hi tlheleleni eYudiya.” Va hlamurile va ri karhi va kanakana, va ku: “Rabi, ku nga ri khale Vayudiya a va lava ku ku khandla hi maribye, kambe wa ha tlhelela kona ke?” Kambe Yesu wa swi xiya leswaku ‘nkarhi wa ku vonakala ka siku’ lowu seleke, kumbe nkarhi lowu Xikwembu xi wu vekeleke vutirheli bya yena bya laha misaveni, wu komile. U swi tiva kahle leswi a faneleke a swi endla ni xivangelo xa ku va a swi endla.—Yohane 11:1-10.
Singita Leri Ri Nga Ta Ka Ri Nga Honisiwi Hi Munhu
18. Loko Yesu a fika eBetaniya, xiyimo xi njhani kwalaho, naswona ku humelela yini loko a fika kona?
18 Le Betaniya, Marta hi yena wo sungula ku hlanganisa Yesu, a ku: “Hosi, loko a wu ri kona laha, makwerhu ingi a nga fanga.” Mariya swin’we ni lava a va tile ekaya ra vona na vona va landzela. Hinkwavo va le ku rileni. Yesu wa vutisa: “Mi n’wi veke kwihi?” Va n’wi hlamula va ku: “Hosi, tana u ta vona.” Loko va fika eka sirha-bako ra xitsundzuxo—ku nga bako leri nga ni ribye enon’wini wa rona—Yesu u ri: “Susani ribye.” Hi ku va a nga twisisi leswi Yesu a lavaka ku swi endla, Marta wa ala a ku: “Hosi, u fanele se a nun’hwa hikuva swi endla mune wa masiku.” Kambe Yesu wa vutisa: “Xana a ndzi ku byelanga leswaku loko u kholwa u ta vona ku vangama ka Xikwembu?”—Yohane 11:17-40.
19. Ha yini Yesu a khongele erivaleni loko a nga si pfuxa Lazaro?
19 Loko ribye leri pfaleke nomu wa sirha ra Lazaro ri ri karhi ri khunguluxiwa, Yesu u khongelela ehenhla leswaku vanhu va ta tiva leswaku leswi a lavaka ku swi endla swi hetisisiwa hi matimba ya Xikwembu. Kutani wa huwelela a ku: “Lazaro, huma!” Lazaro wa huma milenge ni mavoko ya yena swa ha tsondzeriwile hi malapi naswona xikandza xa yena na xona xi tsondzeriwe hi lapi. Yesu u ri: “N’wi ntshunxeni, mi n’wi tshika a famba.”—Yohane 11:41-44.
20. Xana lava vonaka Yesu a pfuxa Lazaro va angurisa ku yini?
20 Loko Vayuda vo tala lava teke ku ta chavelela Marta na Mariya va vone singita leri, va pfumele eka Yesu. Van’wana va suka va ya byela Vafarisi leswi humeleleke. Xana va angula njhani? Hi ku hatlisa, vona ni vaprista lavakulu va endla nhlangano wa xihatla wa Sanedri. Hi ku chava va ri: “Xana hi ta endla yini, hikuva munhu loyi u endla masingita yo tala? Loko hi n’wi tshika hi ndlela leyi, hinkwavo va ta pfumela eka yena, kutani Varhoma va ta fika va teka ndhawu ya hina ni tiko ra hina.” Kambe Muprista Lonkulu Kayafasi u ri eka vona: “A mi anakanyi leswaku swi pfuna n’wina loko munhu un’we a fela vanhu, ematshan’weni ya leswaku tiko hinkwaro ri lovisiwa.” Hikwalaho, ku sukela hi siku rolero hi loko va boha xikungu xo dlaya Yesu.—Yohane 11:45-53.
21. Xana singita ra ku pfuxiwa ka Lazaro i masungulo ya yini?
21 Kutani hi ku hlwela ku fika eBetaniya, Yesu u kota ku endla singita leri ku nga riki na munhu la nga ri honisaka. Hi ku nyikiwa matimba hi Xikwembu, Yesu u pfuxa wanuna loyi a a ri ni masiku ya mune a file. Hambi ku ri Sanedri leyi nga ni ndhuma swinene yi boheka ku swi xiya ni ku humesa xigwevo xa rifu eka Muendli wa Singita! Hikwalaho singita leri i masungulo ya ku cinca ka nkoka evutirhelini bya Yesu—ku suka eka nkarhi lowu “nkarhi wakwe a wu nga si fika” ku ya eka nkarhi lowu ‘nkarhi wu fikeke.’
A Wu Ta Hlamurisa Ku Yini?
• Xana Yesu u swi kombise njhani leswaku a a wu xiya ntirho lowu a wu nyikiweke hi Xikwembu?
• Ha yini Yesu a bakanya xiringanyeto xa mana wa yena malunghana ni vhinyo?
• Hi nga dyondza yini malunghana ni ndlela leyi Yesu a a tala ku yi tirhisa eka vakaneti?
• Ha yini Yesu a hlwele ku teka goza malunghana ni vuvabyi bya Lazaro?
[Swifaniso leswi nga eka tluka 12]
Yesu u tirhise matimba ya yena eka vutihlamuleri lebyi a a byi nyikiwe hi Xikwembu