A Dyondzisa Eperiya Loko A Ri Endleleni Yo Ya Eyudiya

Se swi ni nkarhi Yesu a ri ePeriya entsungeni wa “Yordani.” (Yohane 10:40) Sweswi u kongoma edzongeni wa Yerusalema.

Yesu a nga yexe. U famba ni vadyondzisiwa vakwe, swin’we ni “mitshungu,” ku katsa ni valuvisi ni vadyohi. (Luka 14:25; 15:1) Vafarisi ni vatsari lava solaka leswi Yesu a swi vulaka ni ku swi endla, na vona va kona. Swi tele leswi va nga ehleketaka ha swona endzhaku ko twa Yesu a vulavula hi xifaniso xa nyimpfu leyi lahlekeke, jaha leri lahlekeke ni xifumi na Lazaro.—Luka 15:2; 16:14.

Loko Yesu a tsundzuka leswi vakaneti vakwe va ha ku n’wi solaka hi swona, u hundzuluka a languta vadyondzisiwa vakwe. U boxa tinhla tin’wana leti a va dyondziseke tona eGaleliya.

Hi xikombiso, Yesu u ri: “Swikhunguvanyiso a swi papalateki. Kambe, khombo eka loyi a khunguvanyisaka van’wana! . . . Tivoneleni. Loko makwenu a endla xidyoho n’wi tshinye, loko a hundzuka, n’wi rivalele. Hambiloko o ku dyohela ka nkombo hi siku ivi a vuya eka wena ka nkombo a ku, ‘Ndzi rivalele,’ u fanele u n’wi rivalela.” (Luka 17:1-4) Leswi a swi vuleke ro hetelela swi nga endleka swi tsundzuxe Petro xivutiso lexi a xi vutiseke mayelana ni ku rivalela ka nkombo.—Matewu 18:21.

Xana vadyondzisiwa va ta swi kota ku endla leswi Yesu a swi vulaka? Loko va byela Yesu leswaku a va “[nyika] ripfumelo leri engetelekeke,” Yesu u va tiyisekisa a ku: “Loko a mi ri ni ripfumelo leri ringanaka ni ndzoho ya sinapi, a mi ta byela murhi lowu wa murubeyila mi ku, ‘Simuka u ya mila elwandle,’ naswona a wu ta mi yingisa.” (Luka 17:5, 6) Entiyisweni, ripfumelo leritsongo ri nga endla swilo leswikulu.

Yesu u ya emahlweni a dyondzisa hi nkoka wo titsongahata ni ku va ni langutelo lerinene hi hina vini hi ku byela vaapostola vakwe a ku: “I mani eka n’wina loyi a nga ni nandza loyi a n’wi rimelaka masimu kumbe a n’wi riselaka swifuwo, kutani loko a vuya hi le masin’wini a nga ta n’wi byela a ku, ‘Tana hi ta dya swin’we’? Xana a nge vuli a ku, ‘Ndzi lunghiselele swakudya leswi ndzi nga ta lalela ha swona, u ambala fasikoti u ndzi phamela kukondza ndzi heta ku dya ni ku nwa, endzhaku ka sweswo na wena u nga dya ni ku nwa’? Xana u ta n’wi khensa nandza wakwe hikwalaho ka leswi a endleke ntirho wakwe? Doo! Kutani na n’wina, loko mi endle mitirho hinkwayo leyi mi nyikiweke yona, vulani mi ku: ‘Hi malandza lama nga pfuniki nchumu. Leswi hi nga swi endla hi leswi a hi fanele ku swi endla.’”—Luka 17:7-10.

Nandza un’wana ni un’wana wa Xikwembu u fanele a twisisa nkoka wo rhangisa ku endla ku rhandza ka Xikwembu ku sungula. Ku engetela kwalaho, un’wana ni un’wana u fanele a tsundzuka nkateko lowu a nga na wona wo gandzela Xikwembu a ri xirho xa ndyangu wa xona.

Endzhakunyana ka leswi, ku nghena murhumiwa loyi a rhumiweke hi Mariya na Marta. I vamakwavo vaxisati va Lazaro naswona va tshama eBetaniya wa Yudiya. Murhumiwa u ri: “Hosi, munghana wa wena loyi u n’wi rhandzaka wa vabya.”—Yohane 11:1-3.

Yesu a nga na gome hambileswi a twaka leswaku munghana wakwe Lazaro wa vabya. Ematshan’weni ya sweswo, u ri: “Xikongomelo xa vuvabyi lebyi a hi rifu kambe i ku dzunisa Xikwembu, leswaku N’wana wa Xikwembu a ta dzunisiwa hikwalaho ka byona.” U tshama masiku mambirhi laha a nga kona ivi a byela vadyondzisiwa vakwe a ku: “A hi tlheleleni eYudiya.” Hikwalaho ko vilela, va ri: “Rabi, a hi khale vanhu va le Yudiya va lava ku ku khandla hi maribye, xana wa ha lava ku tlhelela kona?”—Yohane 11:4, 7, 8.

Yesu a hlamula a ku: “Xana dyambu a ri voningi tiawara ta 12 hi siku? Loko munhu a famba dyambu ri tlhavile a nge wi, hikuva ra n’wi voningela. Kambe loyi a fambaka nivusiku, u ta wa, hikuva a nga voni laha a yaka kona.” (Yohane 11:9, 10) U vula leswaku nkarhi lowu Xikwembu xi n’wi nyikeke wona wo endla ntirho wakwe wa laha misaveni a wu nga si hela. Loko wu nga si fika, Yesu u fanele a wu tirhisa hi xitalo nkarhinyana lowu saleke.

Yesu u engetela a ku: “Lazaro u etlele, kambe ndzi ya eku n’wi pfuxeni.” Swi le rivaleni leswaku leswi va ehleketaka leswaku Lazaro u lo etlela, u ta pfuka kutani vadyondzisiwa va ri: “Hosi, loko a etlele u ta pfuka.” Yesu u va byela hi ku kongoma a ku: “Lazaro u file . . . A hi yeni eka yena.”—Yohane 11:11-15.

Leswi a tivaka leswaku Yesu a nga tshuka a dlayiwa eYudiya, Tomasi u lava ku n’wi seketela kutani u kombela vadyondzisiwakulobye a ku: “Na hina a hi fambeni, leswaku hi ta fa na yena.”—Yohane 11:16.