Ndzima 89

Ntirho Wa Musa eYudiya

MAVHIKI ma nga ri mangani emahlweninyana, hi nkarhi wa Nkhuvo wo Tinyiketela eYerusalema, Vayuda va ringete ku dlaya Yesu. Kutani u ye en’walungwini, entiyisweni exivandleni lexi a xi nga ri ekule ni Lwandle ra Galeliya.

Sweswinyana, a a kongoma edzongeni nakambe a langute eYerusalema, a chumayela hi ndlela emitini ya Periya, muganga lowu nga evuxeni bya Nambu wa Yordani. Endzhaku ko va byela xifaniso xa mufuwi na Lazaro, u ya emahlweni a dyondzisa vadyondzisiwa va yena swilo leswi a swi dyondziseke emahlweninyana loko a ri eGaleliya.

Hi xikombiso, u vula leswaku swi ta va swinene eka munhu “loko ribye ra ku sila ri boheleriwa enhan’wini ya yena a hoxiwa lwandle” ku ri ni ku va a khunguvanyisa “un’wana wa lavantsongo” va Xikwembu. Nakambe u kandziyisa xilaveko xa ku rivalela, a ku: “Kungaku loko [makwenu] a ku dyohela ka 7 hi siku rin’we, kutani a tlhelela eka wena ka 7, a ku: ‘Ndza tisola’, n’wi rivalele.”

Loko vadyondzisiwa va kombela, “Hi engetelele ku pfumela,” Yesu u hlamula a ku: “Loko mi ri ni ku pfumela loku ringanaka ni ndzoho ya murhi wa sinapi, a mi ta ku ka murhi wa nkuwa lowu: ‘Tisimule, u ya tisimeka elwandle!’ Kutani a wu ta mi yingisa.” Kutani hambi ku ri ripfumelo lerintsongo ri nga hetisisa swilo leswikulu.

Endzhaku ka sweswo, Yesu u hlamusela xiyimo xa ntiyiso evuton’wini lexi fanekiselaka langutelo lerinene ra nandza wa Xikwembu xa matimba hinkwawo. Yesu wa xiya a ku: “Un’wana wa n’wina a nga va ni nandza la n’wi rimelaka kumbe la n’wi riselaka swifuwo. Loko nandza loyi a vuya hi le masin’wini, xana n’wini wa yena u ta ku ka yena: ‘Hatlisa u ta haleno, u ta tshama eswakudyeni’ xana? Ni kuntsongo! Kambe u ta ku ka yena: ‘Ndzi lunghisele swakudya, kutani u tiboha xisuti, u ndzi tirhela ndzi ri karhi ndzi dya, ndzi nwa; endzhaku ka swona, na wena u ta dya, u nwa!’ Xana u ta nkhensiwa nandza loyi, loko a endlile lexi a nga lerisiwa xona xana? Hi mukhuva wolowo, na n’wina, loko mi hetile hinkwaswo leswi mi lerisiweke swona, vulani mi ku: ‘Hi malandza lama nga faneriki hi ku nkhensiwa, hi endlile ntsena leswi a hi fanele ku swi endla.’” Xisweswo, malandza ya Xikwembu a ya fanelanga ku vona onge ya endlela Xikwembu tintswalo hi ku xi tirhela. Ematshan’wini ya sweswo, ya fanele nkarhi hinkwawo ya tsundzuka lunghelo leri ma nga na rona ro xi gandzela tanihi swirho leswi byarhisiweke yindlu ya xona.

Entiyisweni hi le ndzhakunyana ka loko Yesu a nyikele xifaniso lexi loko ku fika murhumiwa. A a rhume hi Mariya na Marta, vamakwavo va Lazaro, lava tshamaka eBetaniya wa Yudiya. Murhumiwa u ri: “Hosi, loyi u n’wi rhandzaka wa vabya.”

Yesu a hlamula a ku: “Vuvabyi lebyi a byi nga yisi eku feni, kambe i bya ku dzunisa Xikwembu, ni leswaku N’wana wa Xikwembu a dzunisiwa hikwalaho ka byona.” Endzhaku ka ku tshama masiku mambirhi laha a nga kona, Yesu u ri eka vadyondzisiwa va yena: “A hi tlheleleni kambe eYudiya.” Hambi swi ri tano, va n’wi tsundzuxa va ku: “Mufundhisi, ku nga ri khale, Vayuda a va lava ku ku khandla hi maribye. Xana wa ha lava ku tlhelela kona ke?”

Yesu u hlamula hi ku vutisa a ku: “Xana siku rin’we a ri na minkarhi ya 12 xana? Loko munhu a famba ninhlekanhi, a nga khuguriwi, hikuva u vona ku vonakala ka misava leyi, kambe loko munhu a famba ni vusiku, wa khuguriwa, hikuva ku vonakala a ku kona eka yena.”

Leswi Yesu a swi vulaka entiyisweni hi leswaku ‘minkarhi ya siku rin’we,’ kumbe nkarhi lowu Xikwembu xi wu vekeleke vutirheli bya Yesu bya le misaveni, a wu si hundza, naswona ku kondza loko wu hundzile, a ku na munhu la nga n’wi vavisaka. U lava ku tirhisa “siku” leri ro koma leri n’wi saleleke hi laha ku teleke, tanihi leswi endzhaku ka sweswo a ku ta ta “vusiku” lebyi valala va yena a va ta n’wi dlaya ha byona.

Yesu u engetela a ku: “Lazaro murhandziwa wa hina, u etlele, kambe ndzi ya, ndzi ya n’wi pfuxa evurhongweni.”

Entiyisweni hi ku ehleketa leswaku Lazaro u wisile evurhongweni ni leswaku lexi i xikombiso lexinene xa leswaku u ta hlakarhela, vadyondzisiwa va ri: “Hosi, loko a etlele, ú ta hanya.”

Kutani Yesu u va byela erivaleni a ku: “Lazaro u file, kutani, hikwalaho ka n’wina, ndzi tsakile hi leswi a ndzi nga ri kona kwale, leswaku mi ta pfumela. Kambe a hi yeni eka yena!”

Hi ku xiya leswaku Yesu a a ta dlayiwa eYudiya, kambe u navela ku n’wi seketela, Tomasi u khutaza vadyondzisiwa-kulobye a ku: “A hi yeni na hina, leswaku hi ya fa na yena.” Kutani hi ku veka vutomi bya vona ekhombyeni, vadyondzisiwa va heleketa Yesu eka vutirheli lebyi bya musa eYudiya. Luka 13:22; 17:1-10; Yohane 10:22, 31, 40-42; 11:1-16.

▪ Xana Yesu a a dyondzisa kwihi sweswinyana?

▪ I tidyondzo tihi leti Yesu a ti phindhaka, naswona i xiyimo xihi xi nga xa ntiyiso evuton’wini lexi a xi hlamuselaka ku kombisa yinhla yihi?

▪ Xana Yesu u kuma mahungu wahi, naswona u hlamusela yini hi “siku” ni “vusiku”?

▪ Tomasi u vula yini loko a ku, ‘A hi yeni leswaku hi ya fa na yena’?