Ndlela Leyi U Nga Tshinelaka Ha Yona Eka Xikwembu
Yakobo 4:8 yi ri: “Tshinelani eka Xikwembu, kutani xi ta tshinela eka n’wina.” Ku kombisa leswaku Yehovha Xikwembu u swi rhandza ku fikela kwihi leswaku vanhu va va ni vuxaka lebyikulu na yena, u nyikele hi N’wana wa yena hikwalaho ka hina.
LOKO muapostola Yohane a angula eka marito wolawo ya rirhandzu u tsarile: “Hi ni rirhandzu [eka Xikwembu], hikuva hi xona xi nga sungula xi hi rhandza.” (1 Yohane 4:19) Kambe leswaku hi tshinela ekusuhi ni Xikwembu hi fanele hi teka magoza yo karhi. Ma yelana ni tindlela letiya ta mune leti hi ti tekaka loko hi lava ku va ni vuxaka ni vanhu van’wana, hilaha swi hlamuseriweke hakona eka xihloko lexi hundzeke. Sweswi a hi ma kambisiseni.
Xiyisisa Timfanelo Leti Hlamarisaka Ta Xikwembu
Xikwembu xi ni timfanelo to tala letinene, naswona tin’wana ta tona leti tivekaka ngopfu i rirhandzu, vutlhari, vululami ni matimba ya xona. Vutlhari bya xona ni matimba ya xona swi kombisiwa hi xitalo evuakweni hinkwabyo ni le misaveni, ku suka eka swirimele leswikulu ku ya eka tiatomo letitsongo. Mupisalema u tsarile: “Matilo ma twarisa ku vangama ka Xikwembu; ni xibakabaka xi vula ntirho wa mavoko ya xona.”—Pisalema 19:1; Varhoma 1:20.
Ntumbuluko wu tlhela wu kombisa rirhandzu ra Xikwembu. Hi xikombiso, ndlela leyi hi vumbiweke ha yona yi kombisa leswaku Xikwembu xi lava hi tsakela vutomi. Xi hi nyike vuswikoti byo kota ku vona mivala, ku nantswa ni ku nun’hweta, ku tlangela vuyimbeleri, ku hleka, ku tsakela vuxongi xi tlhela xi hi nyika vuswikoti byin’wana byo tala ni swilo leswi nga riki swa nkoka ngopfu evuton’wini. Ina, Xikwembu xa hanana hakunene, xi ni musa ni rirhandzu—ku nga timfanelo leti handle ko kanakana ti endlaka leswaku xi va “Xikwembu lexi tsakeke.”—1 Timotiya 1:11; Mintirho 20:35.
Yehovha wa tinyungubyisa hikuva vuhosi bya yena ni ku seketeriwa ka byona hi swivumbiwa leswo tlhariha swi sekeriwe swinene erirhandzwini. (1 Yohane 4:8) I ntiyiso leswaku Yehovha i Hosi ya Vuako Hinkwabyo, kambe u tirhisana ni vanhu ngopfu-ngopfu malandza ya yena layo tshembeka, tanihi tatana wa rirhandzu la khathalelaka vana va yena. (Matewu 5:45) A nga va tsoni nchumu leswi nga va vuyerisaka. (Varhoma 8:38, 39) Hilaha se ku vuriweke, u kale a nyikela hi vutomi bya N’wana wa yena la nga tswariwa a ri swakwe hikwalaho ka hina. Ina, sweswi ha hanya hikwalaho ka rirhandzu ra Xikwembu naswona hi langutele ku hanya hilaha ku nga heriki.—Yohane 3:16.
Yesu u hi nyike ku twisisa loku enteke hi vumunhu bya Xikwembu hikuva u n’wi tekelele hilaha ku heleleke Tata wakwe. (Yohane 14:9-11) A a nga ri na vutianakanyi, naswona a a anakanyela hilaha ku heleleke. Eka xiendlakalo xin’wana, Yesu u tiseriwe munhu la feke tindleve naswona a ri ni rihika ra ku vulavula. U nga ha va u swi ehleketa leswaku wanuna loyi a a nga ntshunxeki loko a ri exikarhi ka mintshungu. Lexi tsakisaka hi leswaku Yesu u teke wanuna loyi a ya na yena endhawini leyi nga riki na vanhu kutani a n’wi hanyisa. (Marka 7:32-35) Xana wa va rhandza vanhu lava khumbekaka hi mintlhaveko ya wena va tlhela va xixima xindzhuti xa wena? Loko swi ri tano, hilaha ku tiyeke u ta titshineta ekusuhi na Yehovha na Yesu loko u ri karhi u dyondza swo tala hi vona.
Anakanyisisa Hi Timfanelo Ta Xikwembu
Munhu un’wana a nga ha va ni timfanelo letinene, kambe hi fanele hi ehleketisisa hi munhu yoloye leswaku hi ta kokeleka eka yena. Swi tano na hi Yehovha. Ku anakanyisisa hi timfanelo ta yena i goza ra vumbirhi ra nkoka ra ku tshinela ekusuhi na yena. Hosi Davhida wanuna loyi a a rhandza Yehovha swinene naswona a “amukelekaka embilwini ya [Yehovha]” u te: “Ndzi tsundzuke masiku ya khale swinene; ndzi anakanyisise hi ntirho wa wena hinkwawo; ndzi hambete ndzi anakanyisisa hi ntirho wa mavoko ya wena hi ku tirhandzela.”—Mintirho 13:22; Pisalema 143:5.
Loko u vona swihlamariso swa ntumbuluko kumbe u hlaya Rito ra Xikwembu Bibele, xana u anakanyisisa hi leswi u swi vonaka ni ku swi hlaya, ku fana na Davhida? Ehleketa hi n’wana wa mufana la kumeke papila leri humaka eka tata wakwe la n’wi rhandzaka swinene. Xana u ta ri languta njhani papila rero? Hakunene a nge ri hlayi hi ku tsutsuma kutani a ri cukumetela edirowareni. Ematshan’weni ya sweswo, u ta ri hlaya, a kuma vuxokoxoko hinkwabyo, a vona ni laha ri tsakisaka kona. Hilaha ku fanaka Rito ra Xikwembu ri fanele ri va ra nkoka eka hina tanihi laha a ri ri hakona eka mupisalema, la yimbeleleke a ku: “Ndzi wu rhandza swinene nawu wa wena! Ndzi anakanya ha wona siku hinkwaro.”—Pisalema 119:97.
Hlayisa Mbulavurisano Lowunene
Mbulavurisano lowunene i xihlovo xa vuxaka byin’wana ni byin’wana. Wu katsa ku vulavula ni ku yingisela—naswona ku nga ri hi mianakanyo ntsena kambe ni hi mbilu. Hi vulavula ni Muvumbi hi ku tirhisa xikhongelo ku nga ndlela ya vugandzeri yo vulavula hi ku kongoma ni Xikwembu. Yehovha wa tsaka hi swikhongelo swa lava va n’wi rhandzaka ni ku n’wi tirhela ni lava va tekaka Yesu Kreste a ri muyimeri wa Yena lonkulu.—Pisalema 65:2; Yohane 14:6, 14.
Enkarhini lowu hundzeke Xikwembu xi vulavule ni vanhu hi tindlela to hambana, ku katsa ni hi swivono, milorho ni ku tirhisa tintsumi. Hambiswiritano, masiku lawa xi tirhisa Rito ra xona ku nga Bibele yo Kwetsima. (2 Timotiya 3:16) Rito leri tsariweke ri pfuna eka swo tala. U nga ya eka rona nkarhi wihi ni wihi. Ku fana ni papila, ri nga kambisisiwa hi ku phindha-phindha. Naswona a ri soholotiwanga ku fana ni mintsheketo. Kutani teka Bibele tanihi nhlengeleto lowukulu wa mapapila lama humaka eka Tata wa wena la rhandzekaka wa le tilweni, naswona hi ku tirhisa mapapila lawa n’wi pfumelele leswaku a vulavula na wena siku ni siku.—Matewu 4:4.
Hi xikombiso, Bibele yi ri veka erivaleni langutelo ra Yehovha hi leswinene ni leswo biha. Yi hlamusela xikongomelo xa yena hi vanhu ni hi misava. Naswona yi paluxa ku tirhisana ka yena ni vanhu swin’we ni tinxaka hi ku hambana-hambana ka tona, ku suka eka vagandzeri vo tshembeka ku ya eka valala va tihanyi. Hi ku va ni nchumu wo kota ku tirhisana ni vanhu lowu tsariweke hi mukhuva lowu, Yehovha u byi hlamusele hi ndlela yo hlawuleka vumunhu bya yena. U paluxa rirhandzu ra yena, ntsako, nhlomulo, ku khomisiwa tingana, ku hlundzuka, tintswalo, nkhathalelo—ina nxaxamelo wa leswi a swi ehleketaka ni ndlela leyi a titwaka ha yona ni xivangelo-nkulu xa sweswo—hinkwaswo hi ndlela leyi vanhu va nga kotaka ku swi twisisa ha yona.—Pisalema 78:3-7.
Xana u nga pfuneka njhani endzhaku ko hlaya xiphemu xo karhi xa Rito ra Xikwembu? Naswona, ngopfu-ngopfu, xana u nga tshinela njhani eka Xikwembu? Xo sungula, ehleketa hi leswi u nga swi hlaya ni ku swi dyondza hi Xikwembu tanihi munhu, kutani u pfumelela tinhla teto ti fikelela mbilu ya wena. Kutani hi xikhongelo byela Yehovha leswi u swi ehleketaka ni ndlela leyi u titwaka ha yona hi rungula leri u ri hlayeke ni leswaku hi wahi matshalatshala lawa u nga ta ma endla yo ri tirhisa. Sweswo i mbulavurisano. Ina, loko u ri ni swin’wana emianakanyweni ya wena, na swona u nga swi vula exikhongelweni xa wena.
Endla Swilo Kun’we Ni Xikwembu
Bibele yi vulavula hi vanhu van’wana vo tshembeka va khale lava fambeke ni Xikwembu xa ntiyiso kumbe va fambeke emahlweni ka xona. (Genesa 6:9; 1 Tihosi 8:25) Xana sweswo swi vula yini? Xa nkoka ngopfu hi leswaku a va hanya siku ha rin’we onge hi loko Xikwembu xi ri swin’we na vona. I ntiyiso, a va ri ni xidyoho. Kambe a va rhandza milawu ni misinya ya milawu ya Xikwembu naswona a va hanya hi ku pfumelelana ni xikongomelo xa Xikwembu. Yehovha wa va rhandza vanhu vo tano naswona wa va khathalela hilaha swi kombisiweke hakona eka Pisalema 32:8: “Ndzi ta endla leswaku u va ni ku twisisa naswona ndzi ku letela hi ndlela leyi u faneleke u famba ha yona. Ndzi ta ku tsundzuxa ndzi veke tihlo ra mina ri ri ehenhla ka wena.”
Na wena u nga va munghana wa Yehovha—loyi a fambaka na wena, a ku khathalelaka ni ku ku nyika ndzayo leyi fanaka ni ya tatana. Muprofeta Esaya u hlamusele Yehovha tanihi “Loyi a ku dyondziselaka ku ku pfuna, Loyi a ku fambisaka endleleni leyi u faneleke u famba hi yona.” (Esaya 48:17) Loko hi ri karhi hi vuyeriwa, hi titwa hi ri na Yehovha ‘evokweni ra hina ra xinene,’ hi ndlela yo fanekisela, hilaha a swi ri hakona eka Davhida.—Pisalema 16:8.
Vito Ra Xikwembu —Ri Kandziyisa Timfanelo Ta Yena
Vukhongeri byo tala ni vuhundzuluxeri byo tala bya Bibele bya tsandzeka ku tirhisa vito ra Xikwembu ni ku endla leswaku ri tiviwa. (Pisalema 83:18) Kambe eka matsalwa yo sungula ya Xiheveru vito rero—Yehovha—ri humelela minkarhi ya kwalomu ka 7 000! (Hi laha ku hambaneke, loko va ri karhi va susa vito ra Xikwembu vahundzuluxeri vo tala va Bibele va tshike mavito ya swikwembu swa mavunwa swo tala leswi ku vulavuriwaka ha swona eka matsalwa yo sungula, swo fana na Bali, Bel, Merodaki hambi ku ri Sathana!)
Van’wana va vona onge ku susiwa ka vito ra Xikwembu a swi vuli nchumu. Kambe ehleketa hi leswi: Xana swa tika kumbe swa olova ku hlakulela vuxaka lebyikulu ni munhu la nga riki na vito? Swithopo swo tanihi Xikwembu ni Hosi (leswi swi tirhisiwaka ni le ka swikwembu swa mavunwa) swi nga kombisa matimba ya Yehovha, vulawuri kumbe xikhundla xa yena, kambe i vito ra yena ntsena leri n’wi hlawulaka hilaha ku hambaneke. (Eksoda 3:15; 1 Vakorinto 8:5, 6) Vito ra Xikwembu xa ntiyiso ri kombisa timfanelo ta xona ni swihlawulekisi swa xona. Bixopo Walter Lowrie u vule hilaha ku faneleke a ku: “Munhu la nga tiviki Xikwembu hi vito ra xona a nga xi tivi hi xiviri tanihi munhu.”
Anakanya hi xikombiso xa Maria, Mukhatoliki la tinyiketeleke la tshamaka eAustralia. Loko Timbhoni ta Yehovha ti sungula ku hlangana na yena u pfumelele Timbhoni leswaku ti n’wi komba vito ra Xikwembu eBibeleni. U titwe njhani? “Ndzi khapakhape mihloti loko ndzi vona vito ra Xikwembu ro sungula eBibeleni. Ku tiva leswaku ndzi nga ri tiva ndzi tlhela ndzi ri tirhisa vito ra Xikwembu swi ndzi khumbe swinene.” Maria u ye emahlweni a dyondza Bibele naswona a ku ri ro sungula evuton’wini bya yena, ku tiva Yehovha tanihi munhu naswona u kote ku aka vuxaka bya vutomi hinkwabyo na yena.
Ina, hi nga “tshinela ekusuhi ni Xikwembu” hambi leswi hi nga ta ka hi nga xi voni hi mahlo ya nyama. Hi nga byi “vona” vumunhu bya xona lebyo hlawuleka emianakanyweni ni le timbilwini ta hina hikwalaho ndlela leyi hi n’wi rhandzaka ha yona ya kula. Rirhandzu ra muxaka wolowo “i xiboho lexi hetisekeke xa vun’we.”—Vakolosa 3:14.
[Swifaniso leswi nga eka tluka 7]
Ku xiyisisa ntumbuluko wa Yehovha hi yin’wana ya tindlela to tshinela ekusuhi na yena