Xana U Nga Tshinela Eka Xikwembu Lexi Nga Vonakiki?

U nga ha tivutisa, ‘Xana ndzi nga byi aka njhani vuxaka lebyikulu ni munhu loyi ndzi nga kotiki ku n’wi vona?’ Xexo xi nga ha vonaka xi ri xivutiso lexi twalaka. Kambe anakanya:

XANA ku vona i ka nkoka ku fikela kwihi loko swi ta emhakeni ya ku hlakulela vuxaka bya rirhandzu ni lebyi khomelelaka? Xana swilo leswi nga voniwiki a swi ringani ni leswi voniwaka, loko swi nga ri swa nkoka ku swi tlula? Kunene i swa nkoka! Hikwalaho ka xivangelo xexo vanhu van’wana va hlakulele vuxaka lebyikulu ni van’wana hi ku tsalelana—mapapila ya vona ma vula leswi va swi rhandzaka, leswi va nga swi rhandziki, tipakani ta vona, misinya ya milawu ya vona, misavu ni vumunhu bya vona kumbe leswi va swi rhandzaka.

Ni vanhu lava nga voniki va kombisa leswaku ku vona a hi nchumu wa nkoka loko swi ta emhakeni ya ku hlakulela vuxaka lebyikulu ni munhu un’wana. Xiya xikombiso xa Edward na Gwen, mpatswa lowu tekaneke lowu nga voniki.a Edward u hlangane na Gwen exikolweni xa mabofu, laha a a ri xichudeni-kulobye lexi kuleke. U rhandze timfanelo ta Gwen, ngopfu-ngopfu ku tshembeka ka yena loko a vulavula, mahanyelo ni langutelo ra yena lerinene hi ntirho. Kasi Gwen yena u tsakisiwe hi Edward hikuva, loko a vula hi marito ya yena u ri “a a kombisa timfanelo hinkwato leti ndzi nga kurisiwa ndzi tiva leswaku i ta nkoka.” Va sungule ku gangisana naswona endzhaku ka malembe manharhu va tekanile.

Edward u ri: “Loko mi ri swin’we, ku nga voni ka n’wina a ku endli leswaku ku va ni ku hambana eku akeni ka vuxaka ni munhu un’wana. Mi nga ha tsandzeka ku vonana, kambe mintlhaveko ya hanya.” Ni sweswi endzhaku ka malembe ya 57 va ha rhandzana swinene. Va hlamusela leswaku xihundla xa vuxaka bya vona byo tsakisa xi katsa swilo swa mune: (1) ku xiya timfanelo ta munhu lowun’wana, (2) ku ehleketa ha tona ni ku kokiwa hi tona, (3) ku hlayisa ku vulavurisana lokunene ni (4) ku endla swilo mi ri swin’we.

Tinhla leti ta mune i ta nkoka eka vuxaka byin’wana ni byin’wana, ku nga ha va exikarhi ka vanghana, vatekani kumbe xa nkoka ngopfu, exikarhi ka vanhu ni Xikwembu. Eka xihloko lexi landzelaka hi ta vona ndlela leyi ku tirhisa tinhla leti swi nga hi pfunaka ha yona ku hlakulela vuxaka lebyikulu ni Xikwembu hambi leswi hi nga kotiki ku xi vona.b

[Tinhlamuselo ta le hansi]