Pfuna Vanhu Lava Feke Mahlo Leswaku Va Dyondza Hi Yehovha
1. Yesu u wu kombise njhani ntwelavusiwana eka vanhu lava feke mahlo?
1 A ku sele masiku ma nga ri mangani leswaku Yesu a dlayiwa. Loko a suka emutini wa Yeriko, vavanuna vambirhi lava feke mahlo lava a va hanya hi ku kombela va n’wi huwelerile va ku: “Hosi, vana ni tintswalo eka hina!” Hambileswi Yesu a a anakanya hi miringo yo tika leyi a a ta langutana na yona, u yimile, a va vitana leswaku va ta eka yena kutani a va hanyisa. (Mat. 20:29-34) Hi nga wu kombisa njhani ntwelavusiwana wo fana ni wa Yesu eka vanhu lava feke mahlo?
2. I yini lexi nga hi pfunaka leswaku hi kota ku chumayela munhu la feke mahlo loyi hi nga hlanganaka na yena etindhawini ta mani na mani?
2 Va Pfune: Loko u hlangana ni munhu la feke mahlo, kumbexana etindhawini ta mani na mani, titivise eka yena kutani u n’wi byela leswaku u nga tsakela ku n’wi pfuna. Tanihi leswi vanhu lava feke mahlo va talaka ku khomiwa hi ndlela yo biha, munhu yoloye swi nga ha endleka a nga ku tshembi eku sunguleni. Hambiswiritano, loko u n’wi kombisa xinghana swi huma embilwini u tlhela u khathala hi yena, sweswo swi nga ha n’wi endla a ntshunxeka. Nakambe u nga rivali leswaku tindlela leti vanhu va feke mahlo ha tona ta hambana, kutani ku tiva swoleswo swi nga ku pfuna leswaku u tiva ndlela leyi u nga n’wi pfunaka ha yona. Endzhaku ka loko u n’wi pfunile, kumbexana u nga n’wi byela leswaku u endla ntirho wo dyondzisa vanhu Bibele. Kombela ku n’wi hlayela tsalwa ro tanihi Pisalema 146:8 kumbe Esaya 35:5, 6. Loko a swi kota ku hlaya Braille, n’wi vutise loko a nga swi tsakela ku tiseriwa minkandziyiso ya Braille leyi nga ta n’wi pfuna ku dyondza swo tala hi Bibele. U nga tlhela u n’wi pfuna ku kopa rungula leri ngo yingiseriwa kunene leri nga eka jw.org. Loko khompyuta yakwe yi ri ni progreme leyi kotaka ku hlaya rungula leri nga exikrinini, a nga ha swi tsakela loko wo n’wi tisela swihloko leswi kandziyisiweke leswi kumekaka eka jw.org swin’we ni minkandziyiso leyi nga kopiwaka hi xivumbeko xa RTF (Rich Text Format).—Vona bokisi leri nge “Loko U Pfuna Munhu La Feke Mahlo . . . ”
3. Hi nga va lavisisa njhani vanhu lava feke mahlo ensin’wini ya hina?
3 Lavisisa Vanhu Lava Feke Mahlo: A hi ko tala hi hlangana ni vanhu lava feke mahlo loko hi chumayela hi yindlu ni yindlu hikuva vo tala va vona a va titwi va ntshunxekile ku vulavula ni vanhu lava nga va tiviki lava taka emakaya ya vona. Hikwalaho, hi fanele hi endla matshalatshala lamakulu leswaku hi ‘lavisisa’ vanhu vo tano leswaku hi ta va chumayela. (Mat. 10:11) Xana ku ni munhu loyi u tirhaka na yena kumbe loyi u nghenaka na yena xikolo loyi a feke mahlo? Burisana na yena. Loko ensin’wini ya n’wina ku ri ni xikolo xa lava feke mahlo, kombela ku yisa yin’wana ya minkandziyiso ya hina ya Braille elayiburari ya xikolo xolexo. Xana u kona munhu loyi u n’wi tivaka loyi endyangwini wa yena ku nga ni munhu la feke mahlo? Xana ensin’wini ya n’wina ku ni minhlangano leyi pfunaka vanhu lava feke mahlo kumbe leyi se yi pfuneke tindhawu leti ku tshamaka vanhu lava feke mahlo? Hlamusela xirho xa ndyangu, munhu la tirhaka ku hlamula tinqingho kumbe mufambisi wa ndhawu yoleyo leswaku Timbhoni ta Yehovha ti swi tsakela swinene ku pfuna vanhu lava feke mahlo, kutani u kombela ku tisa minkandziyiso ya Braille kumbe rungula leri rhekhodiweke leri ngo yingiseriwa kunene. N’wi kombe xitshembiso xa Bibele xa leswaku ku nga ri khale Xikwembu xi ta ku herisela makumu ku fa mahlo. U nga ha tlhela u n’wi tlangela vhidiyo leyi kumekaka eka jw.org/ts leyi nge, “Handle Ka Yona A Ndzi Ta Titwa Ndzi Lahlekile,” leyi vulavulaka hi ntokoto wa wanuna la feke mahlo loyi a vuyeriweke hi ku va ni Bibele ya Braille. Loko u hlamusela xikongomelo xa riendzo ra wena, u nga ha pfulekeriwa hi nkarhi wa ku burisana ni vanhu van’wana lava feke mahlo.
4. Ntokoto wa Janet wu hi dyondzisa yini?
4 Makwerhu wa xisati la feke mahlo la vuriwaka Janet u endzele ndhawu leyi ku tshamaka vanhu lava feke mahlo. U sungule ku burisana ni wanhwana un’wana. Janet u te, “Yesu u hanyise vanhu lava feke mahlo a kombisa leswi a nga ta swi endlela vanhu hinkwavo lava feke mahlo.” Va hlaye swin’we Nhlavutelo 21:3, 4 kutani Janet a n’wi hlamusela ndlela leyi Mfumo wa Xikwembu wu nga ta xi hetisisa ha yona xitshembiso xolexo. Wanhwana loyi u miyerile ivi endzhaku a ku: “A ndzi nga si tshama ndzi yi twa mhaka leyi yi vuriwa hi munhu la feke mahlo. Vanhu vo tala lava vonaka va anakanya leswaku vanhu va fa mahlo hikwalaho ka swilo swo karhi leswi vona kumbe vakokwa wa vona va swi endleke.” Janet u rhumelele wanhwana yoloye linki hi e-mail, leyi endleke leswaku a kota ku pfula buku leyi nge Leswi Bibele Yi Swi Dyondzisaka, naswona sweswi va dyondza swin’we Bibele kambirhi hi vhiki.
5. Hambileswi hi nga ta ka hi nga swi koti ku hanyisa vanhu lava feke mahlo ku fana na Yesu, hi yihi mikateko leyi hi nga yi kumaka loko hi kombisa leswaku ha khathala hi vona?
5 I ntiyiso leswaku a hi nge swi koti ku hanyisa vanhu lava feke mahlo ku fana na Yesu, kambe hi nga pfuna vanhu hinkwavo lava mianakanyo ya vona yi dlayiweke hi xikwembu xa mafambiselo lawa ya swilo, ku katsa ni vanhu lava feke mahlo, leswaku va twisisa ntiyiso wa Rito ra Xikwembu. (2 Kor. 4:4) Yesu u hanyise vavanuna vambirhi ekusuhi ni le Yeriko hileswi a a ‘va twela vusiwana.’ (Mat. 20:34) Loko hi khathala hi ndlela leyi fanaka hi lava feke mahlo, hi nga va ni lunghelo ra ku pfuna van’wana leswaku va dyondza hi Yehovha, loyi a nga ta ku herisela makumu ku fa mahlo.