Ku Pfuleka Mahlo Eka Mahungu Lamanene

XIVURISO xa Xidenixi xi ri: “Tilo ri tshama ri ri ra wasi, hambi loko munhu lowo-fe-mahlo a nga ri voni.” Kambe leswi hi khomekeke evuton’wini bya hina bya siku na siku, xana ha ha swi vona leswaku xibakabaka xa ha ri xa wasi? Xana hi languta vumundzuku hi ri ni ntshembo? Xana ha ma tshemba mahungu lamanene lawa Rito ra Xikwembu ku nga Bibele, ri ma vulaka?

Exihlokweni lexi hundzeke, hi vulavule hi ku fa mahlo ka xiviri. Sweswi a hi kambisiseni muxaka wun’wana wa ku vona, lowu wu nga wa nkoka swinene. Wu khumba ntsako wa hina lowu nga heriki ni vumundzuku bya varhandziwa va hina.

Handle ko kanakana, hi langutane ni “minkarhi yo nonon’hwa.” (2 Timotiya 3:1) Xana ku humelela yini loko vanhu va ri karhi va ringeta ku kuma xo tihanyisa, va tiyiselela swiphiqo swa rihanyo ni swiphiqo swa ndyangu, naswona va langutana ni vuhomboloki swin’we ni ku pfumaleka ka rirhandzu? Lexi khomisaka gome, vo tala va kuma leswaku ku tshemba ka vona vanhu-kulobye, vukhongeri ni hulumendhe ku ya ku vuna. Loko va nga kumi ntlhantlho, van’wana va gimeta hi ku vula leswaku swiphiqo swa vona a swi nge ntlhantlhiwi hi ndlela leyi tolovelekeke. Eka phepha-hungu ra le Brazil leri nge Jornal da Tarde, Jacob Pinheiro Goldberg u ri: “Vanhu lava langutaneke ni ku xaniseka lokukulu, va hlundzukisiwa swinene hi swihoxo leswi va vonaka onge swi endliwa hi vomu, kutani va titshega hi vukhongeri lebyi nga ni mihivahivana, lebyi hetaka matimba.” Kambe, hambi loko swilo swi nga fambi kahle, hi fanele hi anakanyisisa kahle na hi vutlharhi, a swi tano ke?

Ehleketa swa xinkarhana u ri karhi u lava yindlu ya ndyangu wa wena, naswona u nga ri na mhaka ni leswaku yi xavisiwa hi mali muni. Kumbexana u languta etindhawini to hambana-hambana naswona u endzela tindlu to hambana-hambana leti nga emigangeni leyi nga ekusuhi. Hambi loko vaxavisi va tindlu ta manyunyu va ringeta ku ku kumela leyi u yi lavaka, kambe yindlu leyi u yi lavaka a wu yi kumi. Kambe, tanihi leswi u lavaka ku enerisa ni ku tsakisa ndyangu wa wena, a wu lan’wi, a swi tano ke? Sweswi ehleketa hi ntsako lowu u nga ta va na wona loko eku heteleleni u kuma yindlu leyi ku enerisaka ngopfu.

Ha yini u nga heti nkarhi u kambisisa Bibele, ku fana ni loko u heta nkarhi u lava kaya lerintshwa? Tanihi hi leswi hi ehleketisisaka kahle loko hi ri karhi hi endla swiboho malunghana ni ku kuma yindlu, hi ndlela leyi fanaka hi fanele hi ehleketa kahle hi leswi hi swi hlayaka eRitweni ra Xikwembu. Naswona xin’wana xa nkoka ngopfu ku tlula ku kuma yindlu, i ku kuma ka hina ntiyiso malunghana na Yehovha Xikwembu na Yesu Kreste ni ku wu amukela. Yesu u te: “Leswi swi vula vutomi lebyi nga heriki‚ ku nghenisa ka vona vutivi ha wena‚ Xikwembu xin’we xa ntiyiso‚ na hi loyi u n’wi rhumeke‚ Yesu Kreste.”—Yohane 17:3, NW.

Kambe loko rungula ra Bibele ri ri ra nkoka swonghasi, ha yini vo tala swonghasi va nga si ma vona mahungu ya yona lamanene? Xivangelo xin’wana hi lexi, naswona xi nga ha hlamarisa vanhu vo tala, “misava hinkwayo yi le hansi ka matimba ya Lowo biha.” (1 Yohane 5:19) Hikokwalaho, Sathana Diyavulosi u “pfarile miehleketo ya vanhu lava va nga pfumeriki; [u] va sive mahlo leswaku va nga voni ku vangama ka Mahungu Lamanene lama twarisaka ku kwetsima ka Kriste, yena loyi a nga xifaniso xa Xikwembu.” (2 Vakorinto 4:4) Hambi loko hi vona hi mahlo ya hina, kambe i byongo lebyi endlaka leswaku ku vonakala loku nghenaka etihlweni ku twisiseka. Hikwalaho, ku fa mahlo ku tlhela ku hlamuseriwa ku ri ku “tsandzeka kumbe ku nga lavi ku twisisa.” Leswi swi hi tsundzuxa xivulavulelo lexi tolovelekeke lexi nge: “Ku hava lava nga mabofu ku fana ni lava va nga swi laviki ku va wona hi vomu.”

Munhu wo fe mahlo a nge swi voni leswi nga emahlweni ka yena, kutani a nga ha va ekhombyeni ro vaviseka. Ku fa mahlo ka xiviri ka vanhu vo tala a ku nge tshunguriwi sweswi, kambe ku hava na un’we la bohekaka ku tshama a ri bofu hi tlhelo ra moya.

Ku Hlula Vubofu Bya Moya

Tanihi leswi ku pfumaleka ka nkululo ku nga hungutaka ku vona kahle, ndhawu leyi nga ni mahanyelo yo biha yi nga endla vanhu va va mabofu hi tlhelo ra mahanyelo. Ku tlula kwalaho, Yesu Kreste u tsundzuxile mayelana ni tidyondzo ni mikhuva leyi endliwaka hi vanhu. U swi veke erivaleni leswaku varhangeri va vukhongeri hi nkarhi wolowo a va hambukisa ntlhambi: “Hi lavo-fe-mahlo lava fambisaka lavo-fe-mahlo. Loko lowo-fe-mahlo a fambisa lowo-fe-mahlo, va ta wela ekheleni hi vumbirhi bya vona.”—Matewu 15:14.

Ematshan’weni yo kanganyisiwa hi varhangeri lavo lavo-fe-mahlo, vona ntsako lowu wu nga ni lava mahlo ya vona ma pfulekeke leswaku va vona mahungu lamanene ya Mfumo wa Xikwembu! Yesu u te: “Ndzi tile emisaveni leyi ku ta avanyisa vanhu, leswaku lava nga voniki va kota ku vona.” (Yohane 9:39) Xisweswo, xana lavo-fe-mahlo hi tlhelo ra moya va nga swi kota njhani ku vona? A hi yeni emahlweni hi kambisisa vubofu bya xiviri.

Sweswi ku ni malunghiselelo yo hambana-hambana ya vanhu lava nga voniki kahle. A swi nga ri tano enkarhini lowu hundzeke. A ku nga si endliwa matshalatshala ya nkoka yo pfuna lavo-fe-mahlo emahlweni ka ku va Valentin Haüy a simeke xikolo xo hlawuleka xa lavo-fe-mahlo hi 1784. Endzhakunyana, Louis Braille u sungule ntsalo wa mabofu lowu vitaniwaka hi vito rakwe; a a endlela lava nga voniki leswaku va ta kota ku hlaya.

Ku vuriwa yini hi lava nga voniki hi tlhelo ra moya? Emalembeni ya sweswinyana ku endliwe matshalatshala ya nkoka swinene yo chumayela mahungu lamanene hambi ku ri etindhawini ta le kule swinene emisaveni. (Matewu 24:14) Timbhoni ta Yehovha ti tsakela ku tisa ntshembo eka vanhu lava nga mabofu ya xiviri ni yo fanekisela.

Wansati wa le Brazil u tsale a ku: “Ndzi rhandza ku vula leswaku ku nga khathariseki leswi ndzi feke mahlo, kambe ndza swi kota ku vona—hi tlhelo ra moya. Vona ndlela leyi Xikwembu xi nga xinene ha yona! Ha tsaka ku tiva leswaku ‘Yehovha u [ta] funungula xandla xa yena, a xurisa hinkwaswo leswi hanyaka.’” (Pisalema 145:16) Na Jorge, loyi a nga bofu, wa tsundzuka: “Vutomi bya mina byi nga avanyisiwa kahle hi swiphemu swimbirhi: xa le mahlweni ka ku hlangana ni Timbhoni ni xa le ndzhaku ka kona. . . . Hikwalaho ka tona, ndzi sungule ku vona misava hi ndlela leyi vonakalaka swinene. Ndzi tsakela vuxaka lebyinene ngopfu ni un’wana ni un’wana evandlheni.” Hambi leswi swi tsakisaka, Bibele ya hi tshembisa leswaku ku nga ri khale, ku hava la nga ta va bofu emisaveni—hi tlhelo ra nyama kumbe ra moya. Xana sweswo swi ta tisa ku yini? Xana swi ta kotekisa ku yini emisaveni hinkwayo leswaku “Yehova [a] hanyanyisa mahlo ya la’v̌o-fe-mahlo”?—Pisalema 146:8.

Murhi Wa Xiviri—I Mfumo Wa Xikwembu Ntsena

Ku nga khathariseki vuswikoti byo tshungula hi ndlela leyinene, vuvabyi byo tala byi ya emahlweni byi vanga vubofu, switlhavi ni rifu. Kutani, i yini lexi lavekaka, lexi nga ta herisa ndlala, ku pfumaleka ka nkululo ku katsa ni nhlomulo lowu vangaka vubofu ni ku heta ntsako evuton’wini? Lexi tsakisaka, ku pfula ka Yesu mahlo ya lavo-fe-mahlo ni van’wana a ku ri xikombiso lexitsongo xa leswi nga ta humelela enkarhini lowu taka. Tidyondzo takwe ni ntirho wakwe wo hanyisa a swi kombisa mikateko leyi nga ta ta emisaveni ehansi ka hulumendhe ya Mfumo wa Xikwembu.

Ku hanyisa loku nga ta hlanganisa misava hinkwayo ku tshinele.a Muapostola Yohane u ma kombise kahle mahanyiselo lawa ya Xikwembu: “Yi ndzi komb[e] nambu wa mati ya vutomi lowu vangamaka ku fana ni ‘kristala,’ wu khuluka wu huma exiluvelweni xa Xikwembu ni xa Xinyimpfana. Exikarhi ka xivava xa muti ni le matlhelweni ya nambu hala ni hala, ku ni murhi wa vutomi lowu nyikaka mihlovo ya 12 ya mihandzu, wu tswala mihandzu ya kona n’hweti yin’wana ni yin’wana; kutani matluka ya murhi i yo tshungula vanhu va matiko hinkwawo.”—Nhlavutelo 22:1, 2.

Xiga xo fana ni lexi nge “mati ya vutomi” ni lexi nge “murhi wa vutomi” swi kombisa leswaku endzhaku ka loko fambiselo lero biha ra swilo ra namuntlha ri herile, malunghiselelo ya ku hanyisa ya Mfumo wa Xikwembu ma ta yisa vanhu eku hetisekeni hakatsongo-tsongo. Kahle-kahle, mimpfuno ya gandzelo ra Yesu ra nkutsulo (ku katsa ni ku rivaleriwa ka swidyoho hi laha ku heleleke), ni ku tiva Yesu Kreste ni Tatana wakwe, swi ta tisa rihanyo leri hetisekeke ni vutomi lebyi nga heriki.—Yohane 3:16.

Ntsako eMisaveni Leyintshwa Ya Xikwembu

Kutani ehleketa hi misava leyi nga hava vugevenga, nthyakiso kumbe vusweti. Anakanya hi ndyangu wa wena wu hanya hi ku rhula aParadeyisini leyi pfuxetiweke. (Esaya 32:17, 18) Mawaku ndlela leyi swi nga ta tsakisa ha yona ku vona mihlovo yo hambana-hambana hi miehleketo ni switwi leswi hetisekeke!

Faber Birren mutivi wa mivala u ri: “Xiyimo xa ntumbuluko xa munhu i ku hanya ehansi ka swiyimo leswi cinca-cincaka—hi ku vonakala, muhlovo ni swiyimo. A yi kona ndhawu leyi nga cinca-cinciki hi ntumbuluko. Muhlovo i nchumu wun’wana wa ntumbuluko lowu tsakisaka emisaveni leyi. I nchumu lowu faneleke eka ntumbuluko, hi ntumbuluko muhlovo wu humelela hinkwako-nkwako, naswona vutomi lebyi tsakisaka byi titshege hi wona.”

Mawaku ndlela leyi yi nga ya risima ha yona nyiko ya ku vona! Vona ndlela leyi swi nga ta tsakisa ha yona loko mahlo ya lava tshameke va va mabofu—hi tlhelo ra nyama kumbe hi ra moya—ma vona!

Ina, aParadeyisini leyi nga ta pfuxetiwa, ku fa mahlo ni vugono byin’wana a swi nge he tlheli swi vanga nhlomulo! Ku hava loyi a nga ta tlhela a hambukisiwa. Tanihi leswi ku nga ta va ni rirhandzu ra ntiyiso, hinkwavo va ta voningeriwa emoyeni. Sweswo ni leswi engetelekeke, swi kwala nyongeni, kambe sweswi i nkarhi wa ku amukeriwa hi yena N’wini, la nga ta hetisisa xitshembiso lexi profetiweke: “Hi [nkarhi wolowo] mahlo ya lavo-fe-mahlo [ma] ta hanyanya”!—Esaya 35:5.

[Nhlamuselo ya le hansi]

[Xifaniso lexi nga eka tluka 7]

Hi nkarhi wolowo mahlo ya lavo-fe-mahlo ma ta hanyanya!