Ha Yini Timbhoni Ti Hambeta Ti Endzela Vanhu?

‘HI LAVAYA nakambe! Kambe a va ri laha mavhiki ma nga ri mangani lama hundzeke!’ Xana u anakanya tano loko un’wana wa Timbhoni ta Yehovha a ku endzela? Vanhu va timiliyoni namuntlha va endzeriwa hi Timbhoni ta Yehovha nkarhi na nkarhi. U nga ha vutisa, Hikwalaho ka yini va phikelela, loko va swi tiva leswaku vanhu vo tala va ni vukhongeri bya vona, kumbe a va swi tsakeli? Xivutiso xolexo xi lava nhlamulo.

Vutihlamuleri eMahlweni Ka Xikwembu

Timbhoni ta Yehovha ti swi dyondze eMatsalweni leswaku ku sukela hi 1914, ku nga lembe leri Nyimpi yo Sungula ya Misava yi sunguleke ha rona, swiendlakalo swa misava a swi ri karhi swi hetisisisa vuprofeta bya Bibele malunghana ni makumu ya mafambiselo ya misava ya namuntlha, ni vulawuri lebyi taka bya Mfumo wa Xikwembu ehenhla ka misava leyi. Nkarhi wa madzolonga, ku halatiwa ka ngati ni rivengo lowu lavaka ku va dzana ra malembe, wu vonaka wu yise vanhu ekule swinene ku suka eka ntlhantlho wa tipolitiki ku ya eswiphiqweni swa vona. Tinyimpi ni vutherorisi, leswi swa ha xanisaka ndyangu wa vanhu, i swikombiso swa leswaku vulawuri bya vanhu byi tsandzekile ku cinca timbilu, mianakanyo ni malangutelo ya munhu. Rivengo leri enteke leri vangiweke hi swiendlakalo leswi humeleleke khale, ri onhe vuxaka exikarhi ka tinxaka ni mintlawa ya vukhongeri. Sweswo i ntiyiso etindhawini ta le kule to tanihi Afghanistan, Afrika Dzonga, India, Middle East, Northern Ireland na le khale ka Yugoslavia. Kutani, hi wihi ntlhantlho wa hi laha ku nga heriki?

I Yini Lexi Susumetaka Timbhoni?

Timbhoni ta Yehovha ta swi tiva leswaku ntlhantlho wa Xikwembu—Mfumo wa xona lowu tshembisiweke ha Kreste Yesu—hi wona ntlhantlho wa xiviri. Yesu u katse ni xikombelo xa ku fuma ka Mfumo wolowo eka xikhongelo xa yena xa xikombiso lexi tiviwaka swinene: “N’wina ke, khongelani hi mukhuva lowu, mi ku: ‘Tata wa hina la nge matilweni, vito ra wena a ri hlawuleke; a ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.’” Timbhoni ti tshemba leswaku xikhongelo lexi hakunene xi kombela leswaku Xikwembu xi nghenelela etimhakeni ta vanhu.—Matewu 6:9, 10.

Kutani ha yini Timbhoni ta Yehovha ti vona swi fanerile ku hambeta ti famba hi yindlu na yindlu ti ringeta ku yisa marungula wolawo? Hikwalaho ka swileriso swimbirhi leswi Yesu a swi kandziyiseke loko a ku: “‘Rhandza Hosi Xikwembu xa wena hi mbilu ya wena hinkwayo, ni moya wa wena hinkwawo, ni ku anakanya ka wena hinkwako.’ Lowu hi wona nawu lowukulu, lowo rhanga; kutani lowa vumbirhi, lowu fanaka na wona, hi lowu nge: ‘Rhandza munhu-kuloni, kukota loko u tirhandza.’”—Matewu 22:37-39.

Timbhoni ti lava nkateko wa Xikwembu, kutani hikwalaho ka ku va ti rhandza vanhu-kulobye, ti lava leswaku na vona va kuma nkateko lowu fanaka. Kutani, hi ku landzelela xikombiso xa Yesu, ti titwa ti boheka ku endzela vanhu-kulobye hi rirhandzu ro pfumala vutianakanyi. Ti lava leswaku va tiva leswi “Xikwembu lexi tsakeke” xi swi tshembiseke vanhu lava yingisaka emisaveni leyi basisiweke.—1 Timotiya 1:11, NW; 2 Petro 3:13.

Murhumiwa wa Mukreste Pawulo, a a tiyiseka hi switshembiso swa Xikwembu, xisweswo u tsarile a ku: “Mina Pawulo, nandza wa Xikwembu ni muapostola wa Kriste Yesu, ndzi rhumiwile ku seketela ku pfumela ka vanhu lava hlawuriweke hi Xikwembu, ni ku va pfuna ku tiva ntiyiso lowu dyondzisiwaka hi vukhongeri bya hina, byi nga lebyi akiweke ehenhla ka ku tshemba vutomi lebyi nga heriki. Xikwembu lexi nga riki na ku hemba xi hi tshembisile vutomi lebyi minkarhi yi nga si va kona.” Ina, Xikwembu “lexi nga riki na ku hemba,” xi “tshembisile” vutomi lebyi nga heriki eka lava hi ku titsongahata va lavaka ku xi tiva ni ku xi tirhela.—Tito 1:1, 2; Sofoniya 2:3.

Xana Timbhoni Ta Holeriwa?

Minkarhi yin’wana, van’wana va vule leswaku Timbhoni ta holeriwa hikwalaho ka vutirheli bya tona. Leyi i mianakanyo leyi hoxeke. Ti ma teka ma ri ya nkoka marito ya Pawulo lama yaka evandlheni ra le Korinto lama nge: “A hi fani ni lavo tala, lava endlaka bindzu lero biha hi Rito ra Xikwembu; kambe hi vulavula kukotisa vanhu va timbilu leto tenga, kukota lava rhumiweke hi Xikwembu; hi vulavula emahlweni ka Xikwembu hi ri va ka Kriste.”—2 Vakorinto 2:17.

Varhangeri van’wana va vukhongeri va chumayela hi xikongomelo xo kuma mali, ku nga ha va hakelo ya mintirho ya vukhongeri, kumbe ya ku yisa emahlweni minhlangano ya mabindzu hi vutirheli bya vona eka TV. Vukhongeri byo tala byi na vafundhisi lava holeriwaka.

Ku hambana ni sweswo, Timbhoni a ti na vafundhisi lava holeriwaka, naswona hakanyingi ti lava lava lavaka ntiyiso hi mbilu hinkwayo ti va nyika tibuku ta vona ta Bibele mahala, hambi leswi vo tala va vona va titwaka va susumeteleka ku nyikela hi ku tirhandzela. Minyikelo leyi yi tirhisiwa ku hakelela ntirho wa ku chumayela wa misava hinkwayo. Ku pfumelelana ni xitsundzuxo xa Yesu lexi nge: “Mi nyikiwile ntsena; na n’wina, nyikani ntsena,” Timbhoni ti tirhisa swilo swa tona, leswi katsaka nkarhi na matimba, eku nyikeleni ka tiawara ta timiliyoni entirhweni wa Xikwembu lembe na lembe. Kutani, ti dyondzisa vanhu lava tsakelaka hi yindlu na yindlu ni hi ku tirhisa tidyondzo ta le kaya ta Bibele.—Matewu 10:8; 28:19, 20; Mintirho 20:19, 20.

Ntiyiso wu komba leswaku xikongomelo xa Timbhoni ta Yehovha ha yin’we-yin’we, kumbe mavandlha ya vona kumbe Sosayiti ya Watch Tower a hi ku kuma mali. Ku hava loyi a kumaka muholo hikwalaho ko famba hi yindlu na yindlu. Kutani, xana ntirho lowu wu hakeleriwa njhani? Wu hakeleriwa hi minyikelo yo tirhandzela leyi humaka eka vanhu va misava hinkwayo lava tlangelaka. Ku hava mihlengo leyi tekiwaka.

Vuyelo Bya Ku Veka Ka Vona Vumbhoni

Xana vanhu va byi xiyile vutirheli bya yindlu na yindlu xikan’we ni ku veka vumbhoni hi xitshuketa ka Timbhoni? Vumbhoni bya swihaxa-mahungu byi ri ina la twalaka eka xivutiso xolexo. Timbhoni ta Yehovha ti boxiwile hi nkarhi wa minongonoko ya TV ni le tibayiskopeni, loko ku kombisiwa un’wana a ri karhi a gongondza enyangweni. Tiphophayi na tona ti ti boxile Timbhoni. Ku hisekela ka tona ntirho ku tiviwa swinene, lerova vaendli va tiphophayi va misava hinkwayo va katsile tihlamuselo ta Timbhoni ta Yehovha. Swi nga ha vonaka tanihi leswi hlekulaka, kambe hakanyingi swi sekeriwe entiyisweni lowu tiyeke—wa leswaku Timbhoni ti tiviwa hi ku hambeta ti chumayela hi yindlu na yindlu.—Mintirho 20:20.

Nkombiso wun’wana wa sweswinyana wu kombise wanuna a khandziya ntshava ku ya vutisa “guru [mudyondzisi wa moya].” U te: “Ndzi byele swilo leswi hlamarisaka leswi nga ta humelela!” Xana “guru” u hlamule njhani? “A hi vone . . . Ku ta va ni tindlala, mintungu ni ku tsekatseka ka misava. Dyambu ri ta hundzuka munyama, ni n’weti wu ta tshwuka kukota ngati.” Muvutisi u vutisile: “Hi wahi mahungu lamanene?” “Guru” u te: “Xikwembu xi ta hlangula mihloti hinkwayo . . . kutani a ku nga nga ha vi na rifu hambi nhlomulo kumbe ku vaviseka!” Muendzi u vutisile: “Xana u swi tivisa ku yini swilo swo tano?” Nhlamulo yi ve yihi ke? “Ku hava loyi a balekelaka Timbhoni ta Yehovha!” Kutani, leswi vuriweke hi mutshila wa tiphophayi swi fanele swi humelele ni le ka yena!

Yinhla ya nkoka ya nkombiso wa tiphophayi leti ni yin’wana yo fana na wona hi leswaku a wu paluxi ku hambeta ka maendzo ya Timbhoni ntsena, kambe ni ku tiya ka rungula ra tona. Hi marito ma nga ri mangani, mutshila u nyikele xikongomelo-nkulu xa ntirho wa tona wo nyikela vumbhoni hi yindlu na yindlu ni matsalwa lama tshahiwaka hi tona.—Ringanisa Matewu 24:7, 29; Nhlavutelo 21:3, 4.

Ku ala ka vanhu vo tala rungula ra tona a ku endli leswaku Timbhoni ti hela matimba kumbe ti nga ha hisekeli ntirho wa tona. Muapostola Petro u tsundzuxile: “Emasikwini yo hetelela, ku ta humelela vasandzi lava fambisiwaka hi ku navela ka vona loko biha; va ta mi sandza, va ku: ‘Swi helele kwihi, swa loyi ku nga tshembisiwa leswaku ú ta ta, xana? Hi mpfhuka vatatana va nga tietlelela, swilo hinkwaswo swa ha ya emahlweni hilaha a swi famba hakona, ku sukela loko misava yi tumbuluka.’” Ku nga khathariseki leswi, hi ku susumetiwa hi rirhandzu, Timbhoni ti ya emahlweni ti endzela vanhu-kulobye, naswona ti ta endlisa sweswo ku kondza loko Xikwembu xi herisa mafambiselo lawa yo homboloka.—2 Petro 3:3, 4.

Yesu u vule leswaku, emasikwini ya makumu, mahungu lamanene ma ta fanela ku rhanga ma twarisiwa. Loko u lava nkambisiso lowu engetelekeke wa leswaku ha yini naswona njhani, vona swihloko swimbirhi leswi landzelaka.—Marka 13:10.

[Swifaniso leswi nga eka tluka 9]

Timbhoni ta Yehovha a ti na ntlawa wa vafundhisi lava va hakeriwaka—hinkwavo i vatirheli vo tirhandzela