NHLOKO-MHAKA YA XIFUNENGETO | U NGA VA MUNGHANA WA XIKWEMBU
A Ku Na Ndlela Yo Antswa eVuton’wini Ku Tlula Leyi
U nga endla yini leswaku u va ekusuhi ni Xikwembu? Hi kambisise tindlela leti landzelaka leti u nga ti tekaka leswaku u va ni vunghana na xona:
Tiva u tlhela u tirhisa vito ra Xikwembu ku nga Yehovha.
Vulavurisana na xona minkarhi hinkwayo hi xikhongelo ni ku hlaya Rito ra xona ku nga Bibele.
Minkarhi hinkwayo endla leswi tsakisaka Yehovha.
Tshinela eka Xikwembu hi ku tirhisa vito ra xona, u khongela eka xona, u hlaya Rito ra xona u tlhela u endla leswi xi swi tsakelaka
Hi ku ya hi leswi nga laha henhla, xana u nga vula leswaku u endla leswi lavekaka leswaku u va ekusuhi ni Xikwembu? Xana ku kona laha u nga antswisaka kona? I ntiyiso leswaku ku laveka matshalatshala kambe anakanya hi vuyelo bya kona.
Jennifer wa le United States u te: “Matshalatshala man’wana ni man’wana lawa munhu a ma endlaka leswaku a va ni vuxaka ni Xikwembu, i ya nkoka swinene. Vuxaka lebyi byi tisa mikateko yo tala: ku tshemba Xikwembu, ku twisisa ngopfu timfanelo ta xona, kambe ku tlula hinkwaswo, u ta ya u xi rhandza swinene. A ku na ndlela yo antswa evuton’wini ku tlula leyi!”
Loko u lava ku va ni vuxaka ni Xikwembu, Timbhoni ta Yehovha ta swi tsakela ku ku pfuna. Ti nga hlela leswaku ti dyondza Bibele na wena mahala. Wa rhambiwa ku va u hlanganyela na tona eHolweni ya Mfumo leyi nga kusuhi na wena, laha u nga ta tsakela vunghana ni vanhu lava vuxaka bya vona ni Xikwembu va byi tekaka byi ri bya nkoka.a Loko u endla tano, u ta titwa hilaha mupisalema a titweke hakona loko a ku: “Loko ku ri mina, ku tshinela eka Xikwembu i swinene eka mina.”—Pisalema 73:28.
a Leswaku u kombela ku dyondzeriwa Bibele kumbe ku kuma Holo ya Mfumo leyi nga ekusuhi ni laha u tshamaka kona, hi kombela u vulavula ni munhu loyi a ku nyikeke magazini lowu kumbe u nghena eka Web site ya hina ya www.jw.org/ts kutani u pfula laha ku tsariweke, TIHLANGANISE NA HINA emakumu ka tluka.