Xana U Rhandza Switsundzuxo Swa Yehovha Swinene?
“Moya-xiviri wa mina wu hlayise switsundzuxo swa wena, naswona ndzi swi rhandza swinene.”—PISALEMA 119:167.
1. Hi kwihi laha ngopfu-ngopfu ku vulavuriwaka hi ku phindha-phindha hi switsundzuxo swa Yehovha?
YEHOVHA u lava leswaku vanhu va yena va tsaka. Ina, leswaku hi kuma ntsako wa xiviri hi fanele hi famba hi milawu ya Xikwembu hi tlhela hi hlayisa swileriso swa xona. Xi hi nyika switsundzuxo leswaku hi kota ku endla sweswo. Switsundzuxo swoleswo swi boxiwa ko tala eMatsalweni, ngopfu-ngopfu eka Pisalema 119, leyi kumbexana yi tsariweke hi Hosi Hezekiya lontsongo wa le Yuda. Risimu leri ro saseka ri sungula hi marito lawa: “Va tsaka lava pfumalaka xihoxo endleleni ya vona, lava fambaka enawini wa Yehovha. Va tsaka lava hlayisaka switsundzuxo swakwe; va hambeta va n’wi lavisisa hi mbilu hinkwayo.”—Pisalema 119:1, 2.
2. Xana switsundzuxo swa Xikwembu swi fambisana njhani ni ntsako?
2 Loko hi nghenisa vutivi lebyi kongomeke bya Rito ra yena hi tlhela hi byi tirhisa evuton’wini, hi ndlela yoleyo hi ‘famba enawini wa Yehovha.’ Kambe, leswi hi nga hetisekangiki ha swi lava switsundzuxo. Rito ra Xiheveru leri hundzuluxeriweke ri va “switsundzuxo” ri kombisa leswaku Xikwembu xi hi tsundzuxa milawu ya xona ni swileriso swa xona. (Matewu 10:18-20) Hi ta tshama hi tsakile ntsena loko hi hlayisa switsundzuxo swoleswo, hikuva swi hi pfuna ku papalata swirimbana swa moya leswi vangelaka khombo kumbe nhlomulo.
Namarhela Switsundzuxo Swa Yehovha
3. Hi ku ya hi Pisalema 119:60, 61, hi wihi ntshembo lowu hi nga na wona?
3 Switsundzuxo swa Xikwembu a swi ri swa risima eka mupisalema la yimbeleleke a ku: “Ndzi hatlisile, a ndzi hlwelanga ku hlayisa swileriso swa wena. Mapindza ya lavo homboloka ma ndzi rhendzerile. Nawu wa wena a ndzi wu rivalanga.” (Pisalema 119:60, 61) Switsundzuxo swa Yehovha swi hi pfuna ku tiyisela nxaniso hikuva ha tiyiseka leswaku Tata wa hina wa le tilweni a nga tsema mapindza lama hi sivelaka lawa valala va hina va hi bohaka ha wona. Hi ku famba ka nkarhi, wa hi ntshunxa eka swihinga swo tano leswaku hi ta ya emahlweni ni ntirho wo chumayela hi Mfumo.—Marka 13:10.
4. Hi fanele hi angurisa ku yini eka switsundzuxo swa Xikwembu?
4 Minkarhi yin’wana, switsundzuxo swa Yehovha swi hi vuyisa endleleni. Onge hi nga tlangela ndzulamiso wolowo minkarhi hinkwayo, hilaha mupisalema a endleke hakona. U khongele hi vuenti eka Xikwembu a ku: “Switsundzuxo swa wena ndza swi rhandza . . . Ndzi rhandze switsundzuxo swa wena.” (Pisalema 119:24, 119) Hina hi ni switsundzuxo swo tala swa Xikwembu swo tlula leswi kumiweke hi mupisalema. Mintshaho ya madzana ya Matsalwa ya Xiheveru leyi kumekaka eka Matsalwa ya Xigriki yi hi tsundzuxa hi swiletelo swa Yehovha eka vanhu va yena, lava a va ri ehansi ka Nawu swin’we ni swikongomelo swa yena malunghana ni vandlha ra Vukreste. Loko Xikwembu xi swi vona swi fanerile ku hi tsundzuxa hi swilo leswi fambisanaka ni milawu ya xona, ha wu tsakela nkongomiso wolowo. Naswona loko hi ‘namarhela switsundzuxo swa Yehovha,’ hi papalata ku yengiwa hi swirimbana swa vudyoho leswi hlundzukisaka Muvumbi wa hina swi tlhela swi hi tekela ntsako.—Pisalema 119:31.
5. Hi nga sungula ku rhandza switsundzuxo swa Yehovha swinene hi ndlela yihi?
5 Xana hi fanele hi swi rhandza ku fikela kwihi switsundzuxo swa Yehovha? Mupisalema u yimbelerile: “Moya-xiviri wa mina wu hlayise switsundzuxo swa wena, naswona ndzi swi rhandza swinene.” (Pisalema 119:167) Hi ta rhandza switsundzuxo swa Yehovha swinene loko hi swi teka tanihi ndzayo ya Tatana loyi a hi khathalelaka swinene hi tlhela hi swi amukela. (1 Petro 5:6, 7) Ha swi lava switsundzuxo swa yena, naswona ndlela leyi hi swi rhandzaka ha yona yi ta kula loko hi vona ndlela leyi swi hi pfunaka ha yona.
Lexi Endlaka Hi Lava Switsundzuxo Swa Xikwembu
6. Hi xihi xivangelo lexi endlaka hi lava switsundzuxo swa Yehovha, naswona i yini lexi nga ta hi pfuna leswaku hi swi tsundzuka?
6 Xivangelo xin’wana lexi endlaka hi lava switsundzuxo swa Yehovha hi leswi hi rivalaka. The World Book Encyclopedia yi ri: “Vanhu hi ntolovelo va rivala swinene hi ku famba ka nkarhi. . . . Kumbexana u tshame u tsandzeka ku tsundzuka vito kumbe rungula ro karhi leri a wu ri tiva kahle. . . . Ku rivala koloko ka xinkarhana, loku talaka ku humelela, ku vitaniwa xinamu. Vativi va sayense va ku fanisa ni ku ringeta ku lava nchumu wo karhi ekamareni leri hlangahlanganeke. . . . Ndlela leyinene yo tiyisekisa leswaku wa ri tsundzuka rungula ro karhi i ku ri hlaya hambiloko u ehleketa leswaku u ri tiva hi ku helela.” Ku dyondza hi ku hiseka ni hi ku phindha-phindha swi ta hi pfuna leswaku hi tsundzuka switsundzuxo swa Xikwembu ivi hi fambisana na swona leswaku hi vuyeriwa.
7. Ha yini switsundzuxo swa Xikwembu swi laveka swinene namuntlha ku tlula rini na rini?
7 Namuntlha hi lava switsundzuxo swa Yehovha ku tlula rini na rini hikuva vuhomboloki byi nyanye ku tlula mpimo ematin’wini ya vanhu. Loko hi nyikela nyingiso eka switsundzuxo swa Xikwembu, hi kuma vutlhari lebyi lavekaka leswaku hi papalata ku yengiwa hi tindlela to biha ta misava. Mupisalema u te: “Ndzi kume ku twisisa lokukulu ku tlula vadyondzisi va mina hinkwavo, hikuva ndzi anakanyisisa hi switsundzuxo swa wena. Ndzi tikhoma hi ku twisisa lokukulu ku tlula vakulukumba, hikuva ndzi hlayise swileriso swa wena. Milenge ya mina ndzi yi siverile leswaku yi nga yi endleleni yin’wana ni yin’wana yo biha, hi xikongomelo xa leswaku ndzi hlayisa rito ra wena.” (Pisalema 119:99-101) Loko hi yingisa switsundzuxo swa Xikwembu, hi ta suka “endleleni yin’wana ni yin’wana yo biha” naswona a hi nge fani ni mintshungu ya vanhu, leyi nga “emunyameni hi mianakanyo, ni ku hambana ni vutomi lebyi nga bya Xikwembu.”—Vaefesa 4:17-19.
8. Xana hi nga hlomisiwa njhani hi ndlela leyinene leswaku hi kota ku langutana ni miringo ya ripfumelo hilaha ku humelelaka?
8 Switsundzuxo swa Xikwembu swa laveka nakambe hikuva swa hi tiyisa leswaku hi tiyisela miringo ya hina yo tala “enkarhini [lowu] wa makumu.” (Daniyele 12:4) Loko a hi nga ri na switsundzuxo swoleswo a hi ta va ‘vatwi lava rivalaka.’ (Yakobo 1:25) Kambe ku dyondza Matsalwa hi ku hiseka hi ri hexe ni loko hi ri evandlheni hi tirhisa tibuku leti humesiweke hi “hlonga ro tshembeka ni ro tlhariha,” swi ta hi pfuna ku langutana ni miringo ya ripfumelo hilaha ku humelelaka. (Matewu 24:45-47) Malunghiselelo yo tano ya moya ma ta endla leswaku hi kota ku vona leswi hi faneleke hi swi endla leswaku hi tsakisa Yehovha loko hi tikuma hi ri eswiyin’weni leswi ringaka.
Nkoka Wa Minhlangano Ya Hina
9. I vamani “tinyiko leti nga vanhu,” naswona ti va pfuna njhani vapfumeri-kulobye?
9 Ku lava ka hina switsundzuxo swa Xikwembu ka fikeleriwa hi ndlela yo karhi eminhlanganweni ya Vukreste, laha vakulu lava vekiweke va nyikelaka swiletelo. Muapostola Pawulo u tsale leswaku loko Yesu “a tlhandlukela ehenhla u teke makhumbi; u nyike tinyiko leti nga vanhu.” Pawulo u engeterile: “[Kreste] u nyike van’wana ku va vaapostola, van’wana ku va vaprofeta, van’wana ku va vaevhangeli, van’wana ku va varisi ni vadyondzisi, hi xikongomelo xa ku ololoxa vakwetsimi, hikwalaho ka ntirho wa vutirheli, leswaku va aka miri wa Kreste.” (Vaefesa 4:8, 11, 12) Ha tsaka swinene leswi “tinyiko leti nga vanhu”—vakulu lava vekiweke—ti kongomisaka nyingiso wa hina eka switsundzuxo swa Yehovha loko hi hlanganile leswaku hi gandzela!
10. Hi yihi yinhla-nkulu ya Vaheveru 10:24, 25?
10 Ku tlangela malunghiselelo ya le tilweni swi ta hi susumetela ku va kona eminhlanganweni ya hina ya ntlhanu ya vhiki ni vhiki. Pawulo u kandziyise xilaveko xa ku hlangana nkarhi ni nkarhi. U tsarile: “A hi khathalelaneni leswaku hi khutazana erirhandzwini ni le mintirhweni leyinene, hi nga fularheli ku hlengeletana ka hina, hilaha ku nga ntolovelo wa van’wana, kambe hi khutazana, naswona hi endla tano hilaha ku engetelekeke ngopfu tanihi leswi mi vonaka siku ri tshinela.”—Vaheveru 10:24, 25.
11. Xana nhlangano wun’wana ni wun’wana wa hina wa vhiki ni vhiki wu hi pfuna njhani?
11 Xana wa swi tlangela leswi hi swi kumaka eminhlanganweni ya hina? Dyondzo ya Xihondzo xo Rindza ya vhiki ni vhiki yi tiyisa ripfumelo ra hina, yi hi pfuna ku pfumelelana ni switsundzuxo swa Yehovha, yi tlhela yi hi tiyisa leswaku hi lwisana ni “moya wa misava.” (1 Vakorinto 2:12; Mintirho 15:31) Eka Nhlangano wa le Rivaleni, swivulavuri swi nyikela swiletelo leswi humaka eRitweni ra Xikwembu, ku katsa ni switsundzuxo swa Yehovha ni “marito ya vutomi lebyi nga heriki” yo tsakisa ya Yesu. (Yohane 6:68; 7:46; Matewu 5:1–7:29) Vutshila bya hina byo dyondzisa bya lotiwa eXikolweni Xa Vutirheli Bya Le Tilweni. Nhlangano wa Ntirho i wa nkoka eku hi pfuneni leswaku hi antswisa swingheniso swa hina swa mahungu lamanene hi yindlu ni yindlu, loko hi endla maendzo yo vuyela, loko hi fambisa tidyondzo ta Bibele ni le ka swiyenge swin’wana swa vutirheli bya hina. Ntlawa lowutsongo eka Dyondzo ya Buku ya Vandlha wu hi nyika lunghelo lerikulu ro vula tinhlamuselo to karhi leti hakanyingi ti katsaka switsundzuxo swa Xikwembu.
12, 13. Xana vanhu va Xikwembu va le tikweni rin’wana ra le Asiya va ku kombise njhani ku tlangela minhlangano ya Vukreste?
12 Ku va kona nkarhi ni nkarhi eminhlanganweni ya vandlha swi hi tsundzuxa hi swileriso swa Xikwembu naswona swi hi pfuna ku tshama hi tiyile hi tlhelo ra moya loko hi langutane ni tinyimpi, swiphiqo swa ikhonomi ni miringo yin’wana ya ripfumelo ra hina. Nkoka wa minhlangano wu voniwe kahle hi Vakreste va kwalomu ka 70 va le tikweni rin’wana ra le Asiya lava a va hlongoriwile emakaya ya vona ivi va boheka ku tshama endzeni-ndzeni ka khwati. Leswi a va tiyimiserile ku hambeta va hlangana nkarhi ni nkarhi, va tlhelele edorobeni ra ka vona leri hlakatiweke hi nyimpi, va tlhantlha masalela ya Holo ya Mfumo, ivi va ya yi aka ekhwatini.
13 Endzhaku ko tiyisela malembe yo hlaya ya nyimpi va ri endhawini yin’wana etikweni rolero, vanhu va Yehovha va ha n’wi tirhela hi ku hiseka. Nkulu un’wana endhawini yoleyo u vutisiwile: “I yini lexi va pfuneke swinene vamakwerhu leswaku va tshama va hlanganile?” U hlamule njhani? “Ku ringana malembe ya 19, a hi si tshama hi nga vi na wona nhlangano. Minkarhi yin’wana hikwalaho ka ku hoxiwa ka tibomo kumbe swiphiqo swin’wana, vamakwerhu van’wana a va nga swi koti ku ta endhawini leyi hi hlanganaka eka yona, kambe a hi kalanga hi nga vi na wona nhlangano.” Hakunene vamakwerhu lava va rhandzekaka va tlangela nkoka wa ku ‘nga fularheli ku hlengeletana ka vona.’
14. Hi nga dyondza yini eka mukhuva wa Ana la dyuhaleke?
14 Ana, noni ya malembe ya 84 hi vukhale “a a nga kali etempeleni.” Hikokwalaho, a a ri kona loko Yesu a tisiwa a ha ri ricece endzhakunyana ka ku velekiwa ka yena. (Luka 2:36-38) Xana u lwela ku ka u nga xwi eminhlanganweni? Xana u ringeta hilaha u nga kotaka hakona leswaku u va kona eka nongonoko wun’wana ni wun’wana wa tinhlengeletano ni mintsombano ya hina? Swiletelo leswi vuyerisaka swa moya leswi kumiwaka eminhlanganweni leyi swi hi nyika vumbhoni lebyi nga erivaleni bya leswaku Tata wa hina wa le tilweni wa va khathalela vanhu va yena. (Esaya 40:11) Minkarhi yo tano yi tlhela yi kondletela ntsako, naswona ku va kona ka hina ku kombisa leswaku ha swi tlangela switsundzuxo swa Yehovha.—Nehemiya 8:5-8, 12.
Hi Va Lava Hlawulekeke Hi Ku Yingisa Switsundzuxo Swa Yehovha
15, 16. Xana ku yingisa switsundzuxo swa Yehovha swi yi khumba njhani ndlela leyi hi tikhomaka ha yona?
15 Ku hlayisa switsundzuxo swa Xikwembu swa hi pfuna eku hi hlawuleni emisaveni leyi yo homboloka. Hi xikombiso, ku yingisa switsundzuxo swa Xikwembu swi hi sivela ku hlanganyela eka ku tikhoma loko biha hi tlhelo ra rimbewu. (Deteronoma 5:18; Swivuriso 6:29-35; Vaheveru 13:4) Ndzingo wa ku hemba, ku nga tshembeki, kumbe ku yiva wu nga siveriwa hilaha ku humelelaka loko hi namarhela switsundzuxo swa Xikwembu. (Eksoda 20:15, 16; Levhitika 19:11; Swivuriso 30:7-9; Vaefesa 4:25, 28; Vaheveru 13:18) Ku yingisa switsundzuxo swa Yehovha swi tlhela swi hi sivela leswaku hi nga rihiseli, hi nga vi na xikhomela, kumbe ku lumbeta van’wana.—Levhitika 19:16, 18; Pisalema 15:1, 3.
16 Loko hi yingisa switsundzuxo swa Xikwembu, hi tshama hi kwetsimisiwile, kumbe hi hlawuleriwe ntirho wa xona. Kutani i swa nkoka swinene ku va hi nga fani ni misava leyi! Exikhongelweni lexi yaka eka Yehovha eka vusiku bya yena byo hetelela bya vutomi bya yena bya laha misaveni, Yesu u kombelele valandzeri va yena, a ku: “Ndzi va nyike rito ra wena, kambe misava yi va vengile, hileswi va nga riki xiphemu xa misava, tanihi leswi na mina ndzi nga riki xiphemu xa misava. Ndza ku kombela leswaku u nga va susi emisaveni, kambe u va rindza hikwalaho ka lowo homboloka. Vona a hi xiphemu xa misava, tanihi leswi mina ndzi nga riki xiphemu xa misava. Va kwetsimise hi ntiyiso; rito ra wena i ntiyiso.” (Yohane 17:14-17) A hi hambeteni hi rhandza Rito ra Xikwembu, leri hi endlaka hi fanelekela ntirho wa xona wo kwetsima.
17. Xana ku nga humelela yini loko hi honisa switsundzuxo swa Xikwembu, kutani hi fanele hi endla yini?
17 Leswi hi nga malandza ya Yehovha, hi lava ku tshama hi amukeleka eka ntirho wa yena. Hambiswiritano, loko a ho honisa switsundzuxo swa Xikwembu a hi ta hluriwa hi moya wa misava leyi, lowu kondleteriwaka eka mavulavulelo yo tala, tibuku, vuhungasi ni mahanyelo ya kona. Naswona entiyisweni a hi lavi ku va varhandzi va mali, lava titivaka, lava titlakusaka, lava nga nkhensiki, lava nga tshembekiki, lava nga ni tihanyi, lava omeke tinhloko, lava tikukumuxaka hi ku tinyungubyisa, lava rhandzaka mintsako ku ri ni ku rhandza Xikwembu—loko hi boxa mikhuva yi nga ri yingani leyi kombisiwaka hi lava va tihambaniseke ni Xikwembu. (2 Timotiya 3:1-5) Tanihi leswi hi hanyaka endzeni-ndzeni ka masiku yo hetelela ya mafambiselo lawa ya swilo, a hi hambeteni hi khongelela mpfuno wa Xikwembu leswaku hi ta ya emahlweni hi yingisa switsundzuxo swa Yehovha xisweswo hi ‘tshama hi rindzile hi ku landza rito ra yena.’—Pisalema 119:9.
18. Ku hlayisa switsundzuxo swa Xikwembu swi ta hi susumetela ku teka magoza wahi lamanene?
18 Switsundzuxo swa Yehovha a swi hi xalamukiseli swilo leswi hi nga fanelangiki hi swi endla ntsena. Ku yingisa switsundzuxo swa yena swi ta endla leswaku hi teka goza lerinene, swi hi susumetela ku tshemba Yehovha hi ku hetiseka ni ku n’wi rhandza hi mbilu ya hina, moya-xiviri wa hina, mianakanyo ya hina ni matimba ya hina hinkwawo. (Deteronoma 6:5; Pisalema 4:5; Swivuriso 3:5, 6; Matewu 22:37; Marka 12:30) Switsundzuxo swa Xikwembu swi tlhela swi hi susumetela ku rhandza vaakelani va hina. (Levhitika 19:18; Matewu 22:39) Hi kombisa leswaku hi rhandza Xikwembu ni vaakelani, ngopfu-ngopfu loko hi endla ku rhandza ka Xikwembu ni ku byela van’wana “vutivi bya Xikwembu” lebyi nyikaka vutomi.—Swivuriso 2:1-5.
Ku Yingisa Switsundzuxo Swa Yehovha Swi Vula Vutomi!
19. Hi nga va kombisa njhani van’wana leswaku swa pfuna naswona swa vuyerisa ku yingisa switsundzuxo swa Yehovha?
19 Loko hi yingisa switsundzuxo swa Yehovha hi tlhela hi pfuna van’wana leswaku na vona va swi yingisa, hi ta tiponisa hi tlhela hi ponisa lava hi yingisaka. (1 Timotiya 4:16) Hi nga va kombisa njhani van’wana leswaku ku yingisa switsundzuxo swa Yehovha swa pfuna swi tlhela swi vuyerisa hakunene? Hi ku tirhisa misinya ya milawu ya Bibele evuton’wini bya hina. Lava va nga ni “mboyamelo lowunene eka vutomi lebyi nga heriki” va ta va ni vumbhoni bya leswaku ndlela leyi hlamuseriweke eRitweni ra Xikwembu hi yona ndlela leyinene ngopfu yo yi landzela. (Mintirho 13:48) Va ta tlhela va swi vona leswaku ‘Xikwembu xi le xikarhi ka hina hakunene’ naswona va ta susumeteleka ku ta hlanganyela na hina eku gandzeleni Hosi Leyikulu Yehovha.—1 Vakorinto 14:24, 25.
20, 21. Switsundzuxo swa Xikwembu ni moya wa xona swi ta hi pfuna leswaku hi kota ku endla yini?
20 Loko hi hambeta hi dyondza Matsalwa, hi tirhisa leswi hi swi dyondzaka, naswona hi ma tirhisa hilaha ku teleke malunghiselelo ya Yehovha ya moya, hi ta rhandza switsundzuxo swa yena swinene. Loko hi yingisa switsundzuxo leswi, swi ta hi pfuna ku ambala “vumunhu lebyintshwa lebyi tumbuluxiweke hi ku ya hi ku rhandza ka Xikwembu hi ku lulama ka ntiyiso ni vutshembeki.” (Vaefesa 4:20-24) Switsundzuxo swa Yehovha swin’we ni moya wa yena lowo kwetsima swi ta endla leswaku hi kota ku kombisa rirhandzu, ntsako, ku rhula, ku va ni mbilu yo leha, musa, vunene, ripfumelo, ku olova, ku tikhoma—ku nga timfanelo leti hambaneke swinene ni mikhuva ya misava leyi nga ehansi ka matimba ya Sathana! (Vagalatiya 5:22, 23; 1 Yohane 5:19) Hikwalaho, hi nga tsaka swinene loko hi tsundzuxiwa hi swilaveko swa Yehovha, eka dyondzo ya Bibele ya munhu hi xiyexe, hi vakulu lava vekiweke, ni le minhlanganweni ya hina, etinhlengeletanweni ni le mintsombanweni.
21 Loko hi yingisa switsundzuxo swa Yehovha, ha swi kota ku tsaka, hambiloko hi xaniseriwa vululami. (Luka 6:22, 23) Hi languta eka Xikwembu leswaku xi hi ponisa eka swiyimo leswi xungetaka swinene. Sweswo i swa nkoka ngopfu-ngopfu sweswi matiko hinkwawo ma nga karhi ma hlengeleteriwelaka “siku lerikulu ra Xikwembu xa Matimba Hinkwawo” eHar–Magedoni.—Nhlavutelo 16:14-16.
22. Hi fanele hi tiyimisela yini malunghana ni switsundzuxo swa Yehovha?
22 Leswaku hi kuma nyiko leyi nga fanelangiki ya vutomi lebyi nga heriki, hi fanele hi rhandza switsundzuxo swa Yehovha swinene hi tlhela hi swi hlayisa hi mbilu hinkwayo. Hikwalaho onge hi nga va ni moya wa mupisalema loyi a yimbeleleke a ku: “Ku lulama ka switsundzuxo swa wena i ka hilaha ku nga riki na makumu. Ndzi endle ndzi twisisa, leswaku ndzi ta hambeta ndzi hanya.” (Pisalema 119:144) Naswona onge hi nga kombisa ku tiyimisela loku vonakaka eka marito ya mupisalema: “Ndzi vitane wena [Yehovha]. Oho ndzi ponise! Ndzi ta hlayisa switsundzuxo swa wena.” (Pisalema 119:146) Ina, a hi swi kombiseni hi marito na hi swiendlo leswaku ha swi rhandza swinene switsundzuxo swa Yehovha.
A Wu Ta Hlamurisa Ku Yini?
• Xana mupisalema a a swi languta njhani switsundzuxo swa Yehovha?
• Ha yini hi lava switsundzuxo swa Xikwembu?
• Minhlangano ya hina yi hi pfuna njhani etimhakeni ta switsundzuxo swa Xikwembu?
• Xana switsundzuxo swa Yehovha swi hi endla njhani hi va lava hambaneke ni misava leyi?
[Xifaniso lexi nga eka tluka 15]
Mupisalema a a rhandza switsundzuxo swa Yehovha swinene
[Swifaniso leswi nga eka tluka 16, 17]
Hi ku landza xikombiso xa Ana, xana u tiyimisele ku nga xwi eminhlanganweni?
[Xifaniso lexi nga eka tluka 18]
Ku yingisa switsundzuxo swa Yehovha swi hi endla hi va lava baseke ni lava amukelekaka entirhweni wa yena