Xana Switsundzuxo Swa Yehovha Swa Hi Pfuxa eMoyeni?
1 Mupisalema u dzunise Yehovha, a ku: “Ku ṭunḍuša ka wena i ku anakanya ka mina.” (Ps. 119:99) Rito ra Xiheveru leri nge “ku tsundzuxa” ri kombisa leswaku Yehovha u hi tsundzuxa leswi vuriweke emilawini ya yena, eswilerisweni swa yena, eswiletelweni swa yena, swikongomiso ni le mafambiselweni ya yena. Loko hi yingisa, swi ta hi pfuxa emoyeni ni ku endla leswaku hi tsaka.—Ps. 119:2.
2 Leswi hi nga vanhu va Yehovha, nkarhi na nkarhi ha tshinyiwa ni ku layiwa. Swo tala swa swona ana hi tshame hi swi twa. Hambi leswi hi tlangelaka xikhutazo lexi, hi ni mboyamelo wo rivala. (Yak. 1:25) Yehovha u nyikela switsundzuxo swa rirhandzu hi ku lehisa mbilu. Muapostola Petro u tsale swin’wana swa switsundzuxo leswi leswaku ‘a pfuxa miehleketo ya hina leyi nga ni ku twisisa leswaku hi tsundzuka milawu ya Hosi.’—2 Pet. 3:1, 2.
3 Nkarhi na nkarhi hi tsundzuxiwa hi nkoka wa ku va ni dyondzo ya munhu hi xiyexe ni ku va kona eminhlanganweni. Leswi swi endliwa hikwalaho ka leswi swiendlo leswi swi nga swa nkoka swinene eka vuhlayiseki bya hina bya moya.—1 Tim. 4:15; Hev. 10:24, 25.
4 Ntlhontlho lowukulu eka van’wana i ku endla ntirho wa Vukreste wo chumayela. Swi lava matshalatshala, ku tiyimisela ni ku phikelela. Hambi leswi swi koxaka swo tala eka hina, hi pfuniwa ku ‘tshama hi tiyile’ hi “ku hisekela ku twarisa Evhangeli ya ku rhula ti va tintanghu ta [hi]na.”—Ef. 6:14, 15.
5 Ntirho wa hina wu fanele ku susumetiwa hi leswi tlulaka ku xalamukela swilaveko swa Yehovha emianakanyweni ya hina ntsena. Muapostola Pawulo u hi tsundzuxa leswaku mbilu yi humesa nsusumeto lowu hi wu lavaka ku endla ‘leswaku hi ponisiwa.’ (Rhom. 10:10) Loko hi ri ni ripfumelo leri tiyeke naswona loko timbilu ta hina ti voyamele eka switsundzuxo swa Yehovha, hi ta susumeteleka ku vulavula ni ku dzunisa vito ra yena.—Ps. 119:36; Mt. 12:34.
6 Loko hi tirha hi matimba hi endla mintirho leyinene, swa fanela leswaku hi langutela ku tsakisiwa hi swona. (Ekl. 2:10) Pawulo u kombisa ntsako wu ri mihandzu ya moya wa Yehovha, naswona hi fanele ku lava ku endla swo tala eku wu kombiseni. (Gal. 5:22) Petro u engetele leswaku ‘ku endla hi matimba’ swi ta va ni vuyelo bya vutirheli lebyi nga ni mihandzu, leswi tisaka ntsako.—2 Pet. 1:5-8.
7 Loko hi langutane ni xiphiqo, hi fanele ku tsundzuka xivindzi xa vaapostola loko va te: “Hi nga ka hi nga koti ku tshika ku vula leswi hi swi voneke ni leswi hi swi tweke.” (Mint. 4:20) Hi nyikiwa matimba yo ya emahlweni loko hi tsundzuka leswaku ‘loko hi endlisa sweswo, hi ta tiponisa ni ku ponisa lava hi yingiselaka.’—1 Tim. 4:16.
8 A hi khunguvanyeki kumbe ku titwa hi karhatekile hikwalaho ka leswi hi kumaka switsundzuxo nkarhi na nkarhi. Kambe, hi tlangela nkoka wa swona lowukulu swinene. (Ps. 119:129) Eminkarhini leyi yo tika, hi nkhensa Yehovha hikwalaho ka leswi a hambetaka a hi rhumela switsundzuxo leswi hi pfuxaka emoyeni ni ku hi khutaza leswaku hi hiseka emintirhweni leyinene!—2 Pet. 1:12, 13.