Ndlela Leyi Ku Va Noni Ku Khumbeke Vavasati Vambirhi Ha Yona

SANDRA i noni leyi tshamaka eAustralia. Loko nuna wa yena a fa malembe lama hundzeke, sweswo swi n’wi tseme nhlana Sandra. “Ku lemuka leswaku hi xitshuketa ndzi lahlekele hi nuna tlhelo munghana wa mina lonkulu swi ndzi karhatile. A ndzi tsundzuki nikatsongo leswaku ndzi swi kotise ku yini ku tlhelela ekaya loko ndzi suka exibedlhele kumbe leswaku ndzi kote ku endla yini siku rero hinkwaro. Eka mavhiki ma nga ri mangani lama landzeleke ku chava ka mina ku pfuxe switlhavi swa nkarhi na nkarhi.”

Sandra u ni munghana lonkulu, Elaine loyi se a nga ni malembe ya kwalomu ka tsevu a ri noni. Elaine u ongole nuna wa yena David, tinh’weti ta tsevu a nga si fa a dlawa hi vuvabyi bya khensa. Mbitsi wa yena a wu ri wukulu swinene lerova endzhakunyana ka rifu ra nuna wa yena, u hundzuke bofu swa xinkarhana. Endzhaku ka malembe mambirhi u wile emahlweni ka vanhu. Dokodela wa yena a nga kumanga nchumu lexi kombisaka leswaku wa vabya. Kambe, u kume leswaku Elaine a a fukamele gome ra yena, kutani a n’wi byela leswaku a ya ekaya a ya ringeta ku rila. Elaine u ri ngopfu-ngopfu loko ndzi ri swanga “swi ndzi teke nkarhi ku langutana ni gome ra mina, a ndzi ya ekamareni ro etlela kutani ndzi tifunengeta nhloko hi tinguvu ta David.”

Ina, rifu ra munghana wa vukati la rhandzekaka ri nga endla leswaku munhu a titwa hi ndlela yo hambana-hambana, hikuva ku va noni a swi katsi ku hanya u nga ri na nuna ntsena. Hi xikombiso, nkarhi wun’wana Sandra a titwa onge u lahlekele hi xindzhuti. Ku fana ni tinoni leti ta ha ku feriwaka, u tlhele a titwa onge u hlaseleka hi ku olova, a nga sirhelelekanga. Sandra wa tsundzuka: “Leswi a ndzi tolovele leswaku nuna wa mina hi yena a endlaka swiboho, hi xitshuketa ndzi tikume ndzi sale ndzexe leswaku ndzi tiendlela swiboho sweswo. A ndzi kavanyeteka loko ndzi etlele. A ndzi karhele no va ni matshimbi. A swi tika ku tiva ntsena leswaku ndzi fanele ndzi endla yini.”

Siku ni siku ku ni timhaka leti fanaka ni ta Sandra na Elaine emisaveni hinkwayo. Vuvabyi, timhangu, tinyimpi, ku yayarheriwa ka rixaka ni madzolonga swi hoxa xandla eka nhlayo ya tinoni leyi andzaka.a Vo tala va vavasati lava va fa na swona embilwini, va nga tivi leswaku va ta swi byela mani. Xana vanghana ni maxaka va nga endla yini ku pfuna lava nga tinoni leswaku va kota ku swi amukela? Xihloko lexi landzelaka xi ni swiringanyeto leswi swi nga pfunaka.

[Nhlamuselo ya le hansi]