Swikhekhana Leswi A Swi Nyikiwa Swimakwa Swa Mina
NICK loyi a tshamaka eOregon, U.S.A u tsale a ku: “Hi ximun’wana xa 2014, ndzi sungule ku fambisa swimbyanyana swa mina hi ya edorobeni. Hi ntolovelo Timbhoni a ti yima edorobeni ni swigolonyana swa tona swa mikandziyiso. A ti ambala kahle naswona a ti n’wayitela loko vanhu va hundza.
“Timbhoni a ti kombisanga leswaku ti khathala hi vanhu ntsena kambe ti kombise leswaku ta khathala na hi timbyana ta mina. Siku rin’wana, Elaine loyi a a yime etlhelo ka xigolonyana, u nyike timbyana ta mina swikhekhana. Endzhaku ka sweswo, timbyana ta mina a ti hamba ti ndzi kokela exigolonyanini loko hi ri ekusuhi na xona leswaku ti ya kuma ‘swikhekhana.’
“Ku hundze tin’hweti. Timbyana ta mina a ti swi rhandza swikhekhana leswi Timbhoni a ti ti nyika swona kasi mina a ndzi tiphina hi ku bula katsongo na tona. Kambe a ndzi nga swi lavi ku ti tolovela ngopfu Timbhoni. A ndzi ri ni malembe yo tlula 70 naswona a ndzi nga tiyiseki leswaku Timbhoni ti pfumela eka yini. Leswi a ndzi nga ha lavi ku twa nchumu hi tikereke ta Maprotestente, ndzi vone swi antswa ku tihlayela Bibele hi ndzexe.
“Hi nkarhi wolowo, ndzi vone Timbhoni tin’wana ti yime ni swigolonyana etindhawini to hambanahambana edorobeni. Na tona a ti ri ni xinghana. Ti hlamule swivutiso swa mina hi ku tirhisa Bibele naswona sweswo swi endle leswaku ndzi ya ndzi ti tshemba.
“Siku rin’wana Elaine u ndzi vutise a ku, ‘Xana wa tshemba leswaku swiharhi i nyiko leyi humaka eka Xikwembu?’ Ndzi hlamule ndzi ku: ‘Ina ndza tshemba!’ Hiloko Elaine a ndzi hlayela Esaya 11:6-9. Ku sukela kwalaho ndzi sungule ku lava ku tiva swo tala kambe a ndza ha kanakana ku teka tibuku ta vona.
“Eka masiku lama landzeleke, ndzi tiphine hi ku va ni mabulo yo koma kambe lama tsakisaka na Elaine ni nuna wakwe Brent. Va ringanyete leswaku ndzi hlaya Matewu ku ya fika eka Mitirho leswaku ndzi ta twisisa leswi ku va Mukreste swi vulaka swona. Ndzi endle tano. Endzhaku ka sweswo, a swi tekanga nkarhi leswaku ndzi pfumela ku dyondza Bibele na Brent na Elaine. Sweswo swi endleke hi ximumu xa 2016.
“A ndzi swi langutela hi mahlongati ku dyondza Bibele vhiki rin’wana ni rin’wana ni ku va kona etinhlengeletanweni ta vandlha eHolweni ya Mfumo. A ndzi tsaka ni ku titwa ndzi katekile ku dyondza leswi Bibele yi swi dyondzisaka. Endzhaku ka lembe, ndzi khuvuriwile ndzi va Mbhoni. Sweswi ndzi ni malembe ya 79 naswona ndza swi tiva leswaku ndzi le ka vukhongeri bya ntiyiso. Yehovha u ndzi katekisile hi ku ndzi pfuna ndzi va xiphemu xa ndyangu wakwe lowu kumekaka emisaveni hinkwayo.”