Ku Chumayela Hi Ku Tirhisa Swigolonyana “Leswaku Byi Va Vumbhoni eMatikweni Hinkwawo”

Se swi endla malembe ya kwalomu ka khume swigolonyana swi ri karhi swi koka vanhu rinoko entirhweni wa hina wo chumayela. Swigolonyana swi vonaka hi ku olova emisaveni hinkwayo. Ndlela leyi swi endliweke hayona a yo koka rinoko ntsena kambe swi tlhela swi olova ku swi tirhisa. U nga pfumelelana na Asenata, makwerhu wa xisati wa le Poland, loyi a nga te: “Swigolonyana swi endliwe hi ndlela yo olova kambe swi koka rinoko. Swa olova ku swi tirhisa.”

Xana u tshame u tivutisa leswaku swigolonyana swi endliwe njhani?

Swi Endliwe Kahle

Hi 2001, vamakwerhu va le France va nyikiwe mpfumelelo hi Huvo leyi Fumaka wo sungula ku chumayela etindhawini ta mani na mani ku katsa ni ku tirhisa swigolonyana. Va ringete tindlela to hambanahambana. Hi xikombiso, a va tirhisa tibege ta mindzhwalo ni titiroli ta swakudya ku navetisa ni ku veka mikandziyiso. Eku heteleleni, rhavi ra le France ri hlawule muxaka wo karhi wa xigolonyana lexi vamakwerhu va xi tirhiseke malembe yo tala.

Vamakwerhu va le France a va tsakile hikwalaho ka vuyelo byo chumayela etindhawini ta mani na mani. Kutani hi 2011, Huvo leyi Fumaka yi pfumelele leswaku ku chumayeriwa etindhawini ta mani na mani edorobeni ra New York le U.S.A., hi ku tirhisa swigolonyana ni matafula. Maphayona lama katsekeke eka ku chumayela koloko, hi ku hatlisa ma swi xiyile leswaku swigolonyana swi ni vuyelo byo tala lebyinene naswona swa olova ku swi tirhisa. Maphayona ma tlhele ma nyikela swiringanyeto swa ndlela leyi swigolonyana swi nga antswisiwaka hayona. Swigolonyana swo sungula leswi a swi endliwe hi mapulanga a swi tika swinene, leswi a swi endla swi nga olovi ku swi tlakula eswitepisini. Kutani swi tlhele swi endliwa leswaku swi nga tiki naswona swi nga wi loko ku ba moya. Lexintshwa xi endliwe xi va xikulunyana xi ri ni mavhilwa lama tiyeke leswi a swi endla swi olova leswaku xi famba endhawini leyi nga ni maribye. Ku engetela kwalaho, a xi ri ni xibokisana xo veka mikandziyiso leyi engetelekeke.

Ku chumayela hi ku tirhisa swigolonyana swi ve ni vuyelo lebyinene! Kutani hi 2012, Huvo leyi Fumaka yi nyike mpfumelelo wa ku tirhisiwa ka swigolonyana emisaveni hinkwayo. Vamakwerhu va kume ndhawu leyi a swi endliwa eka yona, laha a swi ta endliwa swi tele ku tirhisiwa swilo leswi nga tikiki kambe swi tiyile.

Loko malembe ma ri karhi ma famba, swigolonyana swi ye swi antswisiwa. Hi xikombiso, hi 2015 ku engeteriwe xo sivela mpfula eka swigolonyana lexi nga ni plasitiki leyi vonikelaka emahlweni ka xona. Dina loyi a tshamaka eGeorgia, wa xi rhandza xo sivela mpfula lexi nga eka xigolonyana. U ri: “Xigolonyana xi ni xo sivela mpfula lexi sirhelelaka mikandziyiso.” Hi 2017, ku endliwe tiphostara leti nga ni timaginete leti kumekaka hi tindzimi tin’wana. Tomasz, makwerhu wa xinuna wa le Poland, u ri: “A swi tika swinene ku cinca tiphostara ta khale loko ti kala ti namarhetiwa. Leti a ti nameketiwa hi ku tirhisa maginete ti hi phule byi hola.” Hi 2019, ku ve ni ku cinca kun’wana loku engetelekeke eka leswi a swi tirhisiwa ku endla swigolonyana ni laha a swi endleriwa kona hambi ku ri ku endla leswaku swi tiya swinene.

Ku Endliwa Ka Swigolonyana Swa Mikandziyiso

Swigolonyana swa mikandziyiso swi endliwa endhawini yin’we kutani swi rhumeriwa emavandlheni emisaveni hinkwayo. Sweswi, xigolonyana xin’we xi durha tidolara ta 43 ta le Amerika hi nga katsi ku rhumeriwa ka xona ni swikoxo swin’wana. Ku fikela sweswi, ku tirhisiwe tidolara to tlula 16 wa timiliyoni ta le Amerika leswaku ku xaviwa swigolonyana naswona swo tlula 420 000 swi rhumeriwile emavandlheni emisaveni hinkwayo.

Leswaku mali leyi nyikeriwaka yi tirhisiwa kahle, swigolonyana swa mikandziyiso swi odiwa swi tele. Ku engetela kwalaho, sweswi mavandlha ma nga oda tiphatsi leti engetelekeke leswaku ma ta lunghisa swigolonyana leswi onhakeke ku ri ni ku va ma oda swin’wana.

Ku Chumayela Hi Ku Tirhisa Swigolonyana

Vahuweleri emisaveni hinkwayo va tiphina hi ku tirhisa xigolonyana. Martina wa le Ghana u ri: “Mikarhi yo tala loko hi ri entirhweni wo chumayela, hi hlangana na vanhu. Lexi ndzi xi rhandzaka hi ku chumayela hi ku tirhisa xigolonyana hileswaku vanhu va ta eka hina. Hambi ku ri vahundzi va ndlela va nga chumayeriwa.”

Etikweni rin’wana ra le Afrika, wanuna u ye eka xigolonyana a fika a teka mikandziyiso ya ririmi rakwe. U tlhele a vuya endzhaku ka vhiki, ivi a ku: “Ndzi yi hlaye hinkwayo mikandziyiso. Rungula leri nga eka yona i ra nkoka. Ndzi ta ya ndzi ya ri byela ndyangu wa ka hina eximutanini xa ka hina,” lexi nga ekule hi tikhilomitara ta kwalomu ka 500. U tlhele a vuya endzhakunyana ka tin’hweti timbirhi kutani a ku: “Vanhu va le ximutanini xa ka hina va yi hlaye hinkwayo mikandziyiso naswona rungula ra yona va ri rhandzile swinene. Va lava ku va Timbhoni ta Yehovha. Kambe va ni swivutiso. Hi xikombiso, va swi twisisa leswaku loko va khuvuriwa va fanele va nyuperisiwa ematini. Hambiswiritano, a ku na nambu ekusuhi ni ximutana lexi hi tshamaka eka xona. Xana hi fanele hi ta laha leswaku hi ta khuvuriwa?” Vahuweleri va hlanganise wanuna yoleyo ni phayona leri vulavulaka ririmi rakwe. Ku sukela kwalaho, havambirhi a va tiphina hi ku dyondza nkarhi na nkarhi.

Swa tsakisa ku vona swigolonyana swi tirhisiwa ku chumayela “emisaveni hinkwayo leswaku byi va vumbhoni ematikweni hinkwawo.” (Matewu 24:14) Xana mali yo swi xava yi huma kwihi? Yi huma eka minyikelo ya misava hinkwayo, leyi yo tala ya yona yi nyikeriwaka hi ku tirhisa donate.jw.org. Ha ku khensa ku hanana ka n’wina.