Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w02 12/15 matl. 23-25
  • Languta Timhaka Hi Langutelo Ra Xikwembu

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Languta Timhaka Hi Langutelo Ra Xikwembu
  • Xihondzo xo Rindza Xi Huwelela Mfumo Wa Yehovha—2002
  • Swihloko
  • Tinhlokomhaka Tin'wana Leti Yelana Na Yona
  • Languta Timhaka Hi Langutelo Ra Xikwembu
  • Ndzayo Leyi Tirhaka Eka Ku Languta Timhaka Hi Langutelo Ra Xikwembu
  • Tsakani Hi Ntshembo Wa Mfumo!
    Xihondzo xo Rindza Xi Huwelela Mfumo Wa Yehovha—2001
  • Moya Wa Ku Tirhandzela Wu Susumetela Vanhu Ku Ya eGilead
    Xihondzo xo Rindza Xi Huwelela Mfumo Wa Yehovha—2001
  • Tsaka Ha Yehovha U Tlhela U Tsakisisa
    Xihondzo xo Rindza Xi Huwelela Mfumo Wa Yehovha—1999
  • Va Susumeteleke Ku Va Vatirheli
    Xihondzo xo Rindza Xi Huwelela Mfumo Wa Yehovha—2000
Vona Swo Tala
Xihondzo xo Rindza Xi Huwelela Mfumo Wa Yehovha—2002
w02 12/15 matl. 23-25

Languta Timhaka Hi Langutelo Ra Xikwembu

LE NEW YORK, U.S.A., September 14, 2002, a ri ri siku leri kufumelaka naswona dyambu a ri tlhavile. Hi siku rero, ntshungu lowu humaka ematikweni hinkwawo wa vanhu va 6 521 wu hlengeletanile le Patterson Educational Center ni le miakweni mimbirhi ya Timbhoni ta Yehovha endhawini yoleyo. Ntshungu lowu a wu hlengeletanile leswaku wu ta vona ku thwasa ka ntlawa wa vu-113 wa le Xikolweni xa Bibele xa Gilead xa Watchtower. Swichudeni leswi a swi huma ematikweni ya 14 naswona swi hete tin’hweti ta ntlhanu leti hundzeke swi ti lunghiselela ntirho wa vurhumiwa ematikweni ya 19 lawa swi averiweke eka wona.

Carey Barber, loyi a nga ni malembe ya 98 tlhelo a nga xirho xa Huvo leyi Fumaka ya Timbhoni ta Yehovha, a a ri mutshama-xitulu wa nongonoko lowu. U kokele nyingiso eka ndzhaka ya malembe ya kwalomu ka 60 ya Xikolo xa Gilead, lexi hlomiseke vanhu va magidi leswaku va ya va varhumiwa. Makwerhu Barber u te: “A ku hundzeletiwi loko ku vuriwa leswaku ku ve ni vuyelo lebyikulu eka ndzetelo wa vona lowu engetelekeke. Vanhu va timbilu letinene va madzana ya magidi emisaveni hinkwayo va nyiketele vutomi bya vona eka Yehovha naswona va amukele vugandzeri bya yena bya ntiyiso ni ntirho wo kwetsima hikwalaho ko pfuniwa hi varhumiwa lava leteriweke.”

Swichudeni swo tala swi ndlandlamuxe vutirheli bya swona loko swi nga si ta eGilead. Mpatswa wun’wana wu hete nkarhi lowu tlulaka lembe wu ri karhi wu dyondza Ximandarin leswaku wu ta kota ku chumayela vanhu vo tala lava humaka eChayina lava a va tshama etikweni ra ka vona eCanada. Kasi mpatswa wun’wana wu sungule ku dyondza Xialbaniya hi woxe kutani eku heteleleni wu rhurhela eAlbania leswaku wu ya pfuna vanhu lava a va yi tsakela swinene Bibele. Van’wana lava a va ri kona eka ntlawa wolowo a wu ri eGilead a va huma eHungary, Guatemala ni le Dominican Republic, ku nga matiko lawa a va rhurhele eka wona leswaku va ya tirha laha ku nga ni xilaveko lexikulu xa vadyondzisi va Rito ra Xikwembu.

Loko swi nga si ya eswiavelweni swa swona eAfrika, eYuropa Vuxa, eAmerika Xikarhi ni le Dzongeni ni le Vuxa Mpfungwe, swichudeni hinkwaswo leswi thwasaka swi khutaziwe ku nghenisa Xikwembu eka hinkwaswo leswi swi swi endlaka.

Languta Timhaka Hi Langutelo Ra Xikwembu

Endzhaku ka marito ya yena yo pfula, Makwerhu Barber u tivise leswaku u ta landzeriwa hi Maxwell Lloyd, loyi a nga xirho xa Komiti ya Rhavi ya le United States. U vulavule hi nhloko-mhaka leyi nge “Languta Timhaka Hinkwato Hi Ku Ya Hi Langutelo Ra Xikwembu.” Makwerhu Lloyd u kokele nyingiso eka xikombiso xa Davhida ni xa Yesu, N’wana wa Xikwembu. (1 Samuwele 24:6; 26:11; Luka 22:42) Endzhaku ko tsundzuxa swichudeni leswaku ku dyondza ka swona Bibele ku ringana tin’hweti ta ntlhanu swi swi letele leswaku swi languta swilo hi ku ya hi langutelo ra Xikwembu, xivulavuri xi te: “Loko mi fambisa tidyondzo ta Bibele ni vanhu exiavelweni xa n’wina lexintshwa, xana mi ta va pfuna leswaku va languta timhaka hi ku ya hi langutelo ra Xikwembu?” Malunghana ni ku tsundzuxa van’wana, xi tsundzuxe swichudeni xi ku: “Mi nga vuli mi ku, ‘Ndzi vona onge . . . ’ Ku ri na sweswo, va pfuneni ku twisisa leswi langutelo ra Xikwembu ri nga swona. Loko mi landzela ndlela leyi, mi ta va nkateko wa xiviri eka lava mi hlanganaka na vona exiavelweni xa n’wina.”

Endzhaku ka sweswo ku landzele Gerrit Lösch, xirho xa Huvo leyi Fumaka. Loko a vulavula hi nhloko-mhaka leyi nge “Ndzi Na Wena” u kokele nyingiso eka swiendlakalo swo tala loko Yehovha a byela malandza ya yena yo tshembeka a ku, “Ndzi na wena.” (Genesa 26:23, 24; 28:15; Yoxuwa 1:5; Yeremiya 1:7, 8) Esikwini ra hina, hi nga ha va ni ntshembo wo tano eka Yehovha loko hi tshama hi tshembekile. Makwerhu Lösch u te: “Xana wa karhateka hi leswaku u ta va kuma vanhu lava u nga ta dyondza na vona Bibele? Tsundzuka, Yehovha u te, ‘Ndzi na wena.’ Xana ma karhateka hi ku va ni swilo leswi ringaneke leswi vonakaka? Yehovha u te: ‘Ndzi nga ka ndzi nga [mi] tshiki naswona ndzi nga ka ndzi nga [mi] fularheli.’” (Vaheveru 13:5) Makwerhu Lösch u gimete hi ku tsundzuxa swichudeni leswaku Yesu u tshembise ku va ni valandzeri va yena lava tshembekaka entirhweni wo endla vadyondzisiwa.—Matewu 28:20.

Nhloko-mhaka ya nkulumo ya Lawrence Bowen muleteri wa le Gilead a yi ku, “Xana Nsirhelelo Wa Wena Wu Ta Va Eka Miringo Leyi Fanaka Ni Ndzilo?” U vule leswaku hikwalaho ka mphikamakaneta leyi sunguriweke le Edeni, hinkwavo lava va tsakeleke ku tinyiketela hi ku helela eka Yehovha va langutane ni ku nonon’hweriwa naswona minkarhi yin’wana va langutana ni miringo leyi fanaka ni ndzilo. U khutaze swichudeni leswi thwasaka ku landzela xikombiso xa Yesu, loyi a kumeke nsirhelelo wa xiviri hi ku titshega hi Yehovha hi ku helela ni ku amukela miringo leyi fanaka na ndzilo leyi Yehovha a yi pfumeleleke leswaku yi hetisekisa ku yingisa ka N’wana wa yena. (Vaheveru 5:8, 9) Yehovha a nga ha fanisiwa ni mutengisi wa nsuku, loyi a tirhisaka ku hisa loku faneleke leswaku a susa thyaka. Ina, ripfumelo leri ringiweke hi ndzilo ri nyikela nsirhelelo lowukulu ku tlula nsuku lowu tengisiweke. Ha yini? Makwerhu Bowen u te: “Hikuva ripfumelo leri tengisiweke ri nga ha tiyisela ndzingo wun’wana ni wun’wana, naswona ri hi hlomisela ku tiyisela ku ya fika ‘emakumu.’”—Matewu 24:13.

Muleteri un’wana wa le Gilead, ku nga Mark Noumair, u vutisile: “Xana U Ta Rhandzeka?” Nhloko-mhaka ya yena a yi vulavula hi marito ya 1 Samuwele 2:26 lama hlamuselaka Samuwele tanihi loyi a “rhandzeka . . . hi ku ya hi langutelo ra Yehovha ni ra vanhu.” Endzhaku ko kambisisa xikombiso xa Samuwele, Makwerhu Noumair, loyi a heteke malembe yo tlula khume a ri entirhweni wa vurhumiwa eAfrika, u te: “Na n’wina mi nga va lava rhandzekaka swinene ematihlweni ya Xikwembu hi ku va mi tirha hi ku tshembeka entirhweni lowu Xikwembu xi mi nyikeke wona leswaku mi wu endla. Xi mi nyike xiavelo xa risima xa vurhumiwa.” Kutani Makwerhu Noumair u khutaze ntlawa lowu thwasaka ku languta swiavelo swa wona tanihi ntirho wo kwetsima lowu va nyikiweke hi Xikwembu ni ku amukela mianakanyo ya Xikwembu loko va ri karhi va endla swiavelo swa vona.

Loko swi ri exikolweni xa Gilead, swichudeni swi ve ni nkarhi wo tala hi mahelo-vhiki wo ya avelana ni vanhu va le ndhawini yoleyo “swilo leswikulu ngopfu swa Xikwembu,” leswi hlamuseriweke eBibeleni. (Mintirho 2:11) Entiyisweni, a va swi kota ku vulavula hi swilo leswi hi tindzimi ta khume. Wallace Liverance muleteri un’wana wa le Gilead u vulavurisane ni ntlawa wa swichudeni lowu wu hlamuseleke mintokoto ya wona ehansi ka nhloko-mhaka leyi nge: “‘Swilo Leswikulu Ngopfu Swa Xikwembu’ Swi Susumetela Vanhu Ku Teka Goza.” U te: “Moya wu susumetele vanhu lava a va ri ekamareni ra le henhla hi Pentekosta ku vulavula hi ‘swilo leswikulu ngopfu swa Xikwembu.’ Ninamuntlha moya wolowo wa ha tirha eka malandza hinkwawo yo tshembeka ya Xikwembu.” Van’wana va susumeteleke ku dyondza tindzimi letintshwa leswaku va ta chumayela vanhu vo tala swinene.

Ndzayo Leyi Tirhaka Eka Ku Languta Timhaka Hi Langutelo Ra Xikwembu

Endzhaku ka tinkulumo to pfula, Gary Breaux na William Young, swirho swa ndyangu wa Bethele wa le United States, va vulavurisane ni swirho swa komiti ya rhavi swo hambana-hambana leswi humaka ematikweni lawa ku nga ni varhumiwa, va tlhela va vulavurisana ni mpatswa lowu heteke 41 wa malembe entirhweni wa vurhumiwa. Mhaka yin’wana leyi vuriweke hi leyi nge: “Lava nga laviki swilo swo tala va tshama nkarhi wo leha. Va yisa nyingiso wa vona eka lexi endleke va va eswiavelweni swa vona. Va swi tiva leswaku va tele ku ta chumayela mahungu lamanene ni ku pfuna vanhu leswaku va tiva Yehovha.”

David Splane, xirho xin’wana xa Huvo leyi Fumaka, u gimete nongonoko hi nkulumo leyi nga ni nhloko-mhaka leyi nge, “A Mi Yi Kule!” Xana a a vula yini hi marito wolawo, kasi mathwasana ya 46 a ma rhumeriwa ematikweni ya misava hinkwayo? U te: “Ku nga khathariseki leswaku mi le kwihi emisaveni, minkarhi hinkwayo mi ta va mi ri endlwini ya Xikwembu ntsendze loko ma ha tshembekile.” Ina, Vakreste hinkwavo vo tshembeka, ku nga khathariseki leswaku va le kwihi, va tirha etempeleni leyikulu ya moya ya Xikwembu, kumbe yindlu ya xona, leyi sunguleke ku va kona loko Yesu a khuvuriwa hi lembe-xidzana ro sungula. (Vaheveru 9:9) Lava a va ri kona swi va chavelele swinene ku tiva leswaku Yehovha u le kusuhi ni malandza ya yena hinkwawo lama tshembekaka emisaveni! Tanihi leswi Yehovha a a khathala hi Yesu loko a ha ri laha emisaveni, Wa khathala hi hina hinkwerhu ni hi ntirho lowu hi N’wi endlelaka wona, ku nga khathariseki leswaku hi le kwihi. Kutani emhakeni ya vugandzeri, a hi le kule ni vamakwerhu na Yehovha na Yesu.

Endzhaku ko tlangela marungula lama humaka emisaveni hinkwayo, ku tivisiwa ka swiavelo swa swichudeni ni ku hlayiwa ka papila leri tsariweke hi swichudeni ra ku kombisa ku tlangela ndzetelo lowu va wu kumeke eGilead, mutshama-xitulu u gimete nongonoko. U khutaze varhumiwa lavantshwa ku hambeta ni ntirho wa vona lowunene ni ku tsaka entirhweni wa Yehovha.—Vafilipiya 3:1.

[Bokisi leri nga eka tluka 23]

TINHLAYO TA NTLAWA

Nhlayo ya matiko lama yimeriweke: 14

Nhlayo ya matiko lawa va averiweke eka wona: 19

Nhlayo ya swichudeni: 46

Xiringaniso xa malembe: 35,0

Xiringaniso xa malembe entiyisweni: 17,2

Xiringaniso xa malembe evutirhelini bya nkarhi hinkwawo: 13,7

[Xifaniso lexi nga eka tluka 24]

Ntlawa Wa Vu-113 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Ligthart, M.; Hosoi, S.; Berktold, A.; Liem, C.; Aoki, J. (2) Baglyas, J.; Bouqué, S.; Bossi, A.; Alton, J.; Escobar, I.; Escobar, F. (3) Stoica, A.; Stoica, D.; Freimuth, S.; Karlsson, M.; LeBlanc, R. (4) Bianchi, R.; Bianchi, S.; Kaminski, L.; Joseph, L.; Paris, S.; LeBlanc, L. (5) Paris, M.; Skidmore, B.; Horton, J.; Horton, L.; Skidmore, G. (6) Liem, B.; Alton, G.; Quirici, E.; Langlois, M.; Steininger, S.; Aoki, H. (7) Langlois, J.; Steininger, M.; Bossi, F.; Kaminski, J.; Bouqué, J.; Ligthart, E.; Hosoi, K. (8) Baglyas, J.; Quirici, M.; Karlsson, L.; Freimuth, C.; Berktold, W.; Joseph, R.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela