‘Xikwembu, Ha Yini U Ndzi Tshika Ndzi Humeleriwa Hi Leswi?’

RICARDO wa ha ri tsundzuka siku leri a a tshame ni nsati wakwe Maria, va rindze dokodela.a A va nga ri na xitiya-nhlana xo hlaya leswi dokodela a swi tsaleke hi ta vuvabyi bya Maria. Hiloko Ricardo a pfula mvhilopho kutani va languta xiviko xa kona hi ku hatlisa. Va vone rito leri nge “vuvabyi bya khensa,” hiloko havambirhi va ku xibuku va rila loko va tsundzuka leswi rito leri ri vulaka swona.

Ricardo u ri: “Dokodela a a ri ni musa kambe a swi ri erivaleni leswaku wa ri tiva khombo ra xiyimo lexi, hikuva a a tshamela ku hi byela leswaku hi fanele hi tshemba Xikwembu.”

Loko a nga si sungula vutshunguri bya nyawuso, dokodela wa Maria u vone nkondzo wa yena wa xinene wu titlangatlangela. Loko a tlhela a kamberiwa ku kumeke leswaku vuvabyi bya khensa byi fike ni le byongweni. Endzhaku ka loko a endliwe nyawuso vhiki rin’we, a va ha tlhelanga va wu endla. Maria u etlerile a nga pfuki kutani endzhaku ka tinh’weti timbirhi a fa. Ricardo wa hlamusela: “Mbilu ya mina yi wile leswi a wise ku xaniseka kambe a ndzi n’wi tsundzuka ngopfu lerova ndzi navela onge na mina ndzi ngo fa. A ndzi tshamela ku rilela Xikwembu ndzi ku: ‘Ha yini u ndzi tshika ndzi humeleriwa hi leswi?’”

Loko Ku Humelela Khombo, Ku Tlakuka Swivutiso Swo Tala

Ku fana na Ricardo, vanhu vo tala emisaveni hinkwayo va boheka ku vona mangava. Minkarhi yo tala ku xaniseka vanhu lava nga riki na nandzu. Anakanya hi gome leri vangiwaka hi tinyimpi leti nga heliki leti hetaka vanhu. Kumbe anakanya hi gome leri nga ni vo tala lava pfinyiweke, vana lava khomiwaka hi ndlela yo biha, madzolonga ya le ndyangwini ni vuhomboloki byin’wana lebyi endliwaka hi munhu. Ematin’wini hinkwawo swi vonaka byi nga heli vuhomboloki ni ku xaniseka loku vavanuna ni vavasati va tsakelaka ku byi endla van’wana. (Eklesiasta 4:1-3) Nakambe ku ni vanhu lava xanisekaka hikwalaho ka makhombo ya ntumbuluko, kumbe ya mintlhaveko, mianakanyo ni vuvabyi. A swi hlamarisi leswi vo tala va vutisaka va ku, “Ha yini Xikwembu xi pfumelela ku xaniseka loku?”

Hambi ku ri eka lava nga ni ripfumelo ra vukhongeri, swa va tikela ku tiyisela ku xaniseka. Na wena u nga ha tivutisa leswaku i yini lexi vangelaka leswaku Xikwembu xa matimba hinkwawo lexi nga ni rirhandzu xi pfumelela leswaku vanhu va xaniseka. Ku kuma nhlamulo leyi enerisaka ni leyi nga ntiyiso ya xivutiso lexi dungaka nhloko i swa nkoka eka ku rhula ka hina ka mianakanyo ni le ka vuxaka bya hina ni Xikwembu. Bibele yi nyika nhlamulo ya xivutiso xexo. Hi kombela u kambisisa leswi yi swi vulaka hilaha swi vekiweke hakona exihlokweni lexi landzelaka.

[Nhlamuselo ya le hansi]

[Swifaniso leswi nga eka tluka 3]

Dokodela a a tshamela ku hi byela leswaku hi fanele hi tshemba Xikwembu