Swifuwo—Tsakela Vunghana Na Swona Hilaha Ku Nga Heriki

MAWAKU swifuwo swo hambana-hambana leswi nga kona, ha xin’we xi ri ni timfanelo ta xona! Ku swi rhandza ni ku swi twela vusiwana swi endla leswaku munhu a tshinela eka Muvumbi wa swona. Leswi swi vonake emhakeni ya Maria.

Kwalomu ka malembe manharhu lama hundzeke, loko Maria a ha tshama eLisbon, le Portugal, mbyana yakwe leyi a a yi rhandza yi lahlekile, naswona u endle leswaku swi tivisiwa eka xiya-ni-moya. Mbhoni ya Yehovha yin’wana leyi a yi tiyiseka leswaku yi yi vonile mbyana leyi fanaka ni leyi ku vulavuriweke ha yona, yi tihlanganise na Maria. Loko lava vambirhi va hlangana, va yi kumile mbyana leyi, naswona Mbhoni leyi yi vule leswaku leswi Maria a a rhandza swifuwo, kunene u ta swi tsakela ku hanya emisaveni leyintshwa leyi Xikwembu xi yi tshembiseke. Mbhoni leyi yi hlamusele leswaku hi nkarhi wolowo vanhu va ta hanya hi ku rhula ni swiharhi.

Maria u amukele xirhambo xa ku va kona enhlanganweni wa Timbhoni. Leswi a swi tweke ni leswi a swi voneke kwalaho swi endle leswaku a lava ku dyondzeriwa Bibele. Loko dyondzo yi ri karhi yi ya emahlweni, Maria u swi tsakele ngopfu leswi a swi dyondzeke ha Yehovha Xikwembu ni xitshembiso xakwe xa vutomi lebyi nga heriki emisaveni leyintshwa ya ku lulama. (Pisalema 37:29; Yohane 17:3) Eku heteleleni, hi February 16, 2002, u kombise ku tinyiketela kakwe eka Yehovha hi ku khuvuriwa ematini.

Xikongomelo Xo Sungula Xa Xikwembu

Ku fana na Maria, vo tala va tsakile ku tiva leswaku xikongomelo xo sungula xa Xikwembu xa leswaku vanhu va hanya hilaha ku nga heriki eparadeyisini ya laha misaveni swin’we ni ku khathalela swiharhi xi ta hetiseka emakumu. (Genesa 1:28) Bibele yi vula leswaku Xikwembu a xi “yi tumbuluxelangiki swa hava [misava]” kambe ‘xi yi vumbele leswaku ku akiwa eka yona.’ Swi le rivaleni leswaku vanhu a va fanele va tsakela misava ni swiharhi hilaha ku nga heriki.—Esaya 45:18.

Bibele yi tlhela yi kandziyisa leswaku Xikwembu xi tiyimisele ku hetisisa xikongomelo xa xona xo sungula xa ku endla misava yi va paradeyisi. “Ndzi swi vurile,” ku vula Yehovha. Nakambe wa engetela: “Hikwalaho rito ra mina leri humaka enon’wini wa mina ri ta endlisa sweswo. A ri nge tlheleli eka mina ri nga ri na vuyelo, kambe kunene ri ta endla leswi ndzi swi tsakelaka, naswona ri ta humelela hakunene eka leswi ndzi ri rhumeleke swona.”—Esaya 46:11; 55:11.

Swi le rivaleni leswaku xikongomelo xo sungula xa Xikwembu a ku ri leswaku vanhu va tsakela vutomi emisaveni ya paradeyisi hilaha ku nga heriki. Ha tiyiseka hi ku helela leswaku xikongomelo lexi xi ta hetiseka emakumu. A hi kambisiseni leswaku Bibele yi ri vutomi byi ta va njhani emisaveni leyintshwa ya Xikwembu. Hi ta swi vona leswaku, hakunene, swiharhi ni swifuwo hinkwaswo, swi ta hanyisana hi ku rhula swona hi swoxe swin’we ni vanhu.—Esaya 65:17, 21-25; 2 Petro 3:13.

Swifuwo Swa Le Ndlwini eMisaveni Leyintshwa Ya Xikwembu

Emisaveni leyintshwa ya Yehovha, vanhu va ta swi kota ku khumba ntshiva wa nghala, ku bambatela voya bya mivala-vala bya yingwe, ina, ku etlela enhoveni handle ko chava leswaku ku ni xiharhi lexi nga ta va hlasela. Xiya xitshembiso lexi xa Xikwembu: “Ndzi ta herisa xivandzana lexi nga ni khombo etikweni, ti [vanhu] ta tshama emananga ti sirhelelekile, ti etlela emakhwatini.”—Ezekiyele 34:25; Hosiya 2:18.

Kunene, swiharhi swi ta yingisa, hambi ku ri ku yingisa vana! Bibele yi ri: “Mhisi yi ta tshama nkarhinyana ni xinyimpfana xa xinuna, yingwe yi ta etlela ni ximbutana, rhole ni xinghalana ni xifuwo lexi wundliweke kahle swi ta tshama swin’we; kutani swi ta rhangeriwa hi mufana lontsongo.”

Kambe a swi heleli kwalaho! Tsalwa leri ri ya emahlweni: “Homu ni bere swi ta dya swin’we; vana va kona va ta vundza swin’we. Ni nghala yi ta dya byanyi kukota nkunzi. Kunene n’wana la an’waka u ta tlangela enceleni wa xivatlankombe; naswona n’wana la lumuriweke u ta nghenisa voko ra yena enkeleni wa nyoka leyi nga ni vuxungu. A va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha kukota mati lama funengetaka lwandle.”—Esaya 11:6-9.

Emisaveni leyintshwa ya Yehovha, a xi nge he vi kona xiphiqo xa leswaku vanhu va fumbana emadorobeni lamakulu lama nga va hanyisiki kahle vona ni swifuwo swa vona. I ntiyiso leswaku hambi ku ri sweswi vanhu vo tala va swi tsakela swifuwo swa vona, naswona vo tala va ni langutelo leri faneleke naswona va swi khathalela kahle. Kambe, ehleketa hi ntshembo lowunene wo tsakela swifuwo hilaha ku nga heriki emisaveni leyintshwa yo lulama! Ndlela leyi swi khathaleriwaka ha yona ya rirhandzu yi ta dzunisa Muvumbi Lonkulu wa swilo hinkwaswo leswi hanyaka.

Loko u nga si dyondza hi switshembiso leswinene swa Xikwembu—hilaha Maria la rhandzaka swifuwo a ha ku dyondzaka sweswinyana—ha ku rhamba hi malwandla leswaku u tihlanganisa ni vakandziyisi va magazini lowu kumbe un’wana wa Timbhoni ta Yehovha, u ta swi tsakela ku ku pfuna u dyondza ha swona.

[Xifaniso lexi nga eka tluka 18]

Emisaveni leyintshwa ya Xikwembu, swifuwo swi ta tsakeriwa hilaha ku nga heriki