Ku Tikhoma Lokunene Ku Tswala Mihandzu

EXIHLALENI lexitsongo xa le ribuweni ra le dzongeni wa Japani, manana un’wana ni vana vakwe vanharhu va sungule ku dyondza Bibele ni Timbhoni ta Yehovha. Loko va vona sweswo, vaaki va le xihlaleni xexo lava landzelelaka ndhavuko ngopfu, va sungule ku honisa manana yoloye kun’wana ni kun’wana laha va n’wi vonaka kona. Wa hlamusela: “Hambileswi a va ndzi honisa kambe lexi ndzi vaviseke ngopfu hileswi a va nga lavi ku vulavurisana ni nuna wa mina ni vananga.” Nilokoswiritano, u byele vana vakwe a ku: “Hi fanele hi hambeta hi xeweta vaakelani va hina hikwalaho ka Yehovha.”—Matewu 5:47, 48.

Ekaya u dyondzise vana vakwe leswaku va va ni xichavo hambiloko va nga rhandziwi. Loko va ri endleleni yo ya exihlobyeni xa mati yo hisa lexi va toloveleke ku ya eka xona, vana volavo va titolovete ku xeweta loko va ri emovheni. Loko va nghena emuakweni, vana volavo minkarhi hinkwayo a va ku: “Konnichiwa!”—“Xewani!” Ndyangu lowu wu hambete wu xeweta vanhu hinkwavo lava a wu hlangana na vona, hambiloko vaakelani va kona va nga anguli hi ndlela leyi kombisaka xinghana. Hambiswiritano, vanhu a va xiya ku tikhoma lokunene ka vana volavo.

Eku heteleleni, muakelani un’wana u hlamurile a ku: “Konnichiwa,” hiloko ku landzela un’wana a endla leswi fanaka. Loko ku hele malembe mambirhi, vunyingi bya vanhu edorobeni rero a va angula kahle loko ndyangu lowu wu va xeweta. Nakambe va sungule ku xewetana hi xivona ni ku kombisana xinghana. Xandla xa meyara wa doroba u lave ku fundzha vana lava hikwalaho ka leswi va swi endleke leswaku xiyimo xi cinca hi ndlela leyi. Kambe mana wa vona u n’wi tiyisekisile leswaku a va endla leswi Vakreste va faneleke va swi endla. Endzhakunyana, eka mphikizano wa mbulavulo wa le xihlaleni, mufana un’wana u hlamusele ndlela leyi mana wa yena a leteleke ndyangu wa ka vona ha yona leswaku wu xeweta vanhu van’wana hi ndlela yo titsongahata ku nga khathariseki leswaku va angula njhani. Nkulumo ya yena yi kume sagwadi ro sungula naswona yi kandziyisiwe eka phepha-hungu ra le dorobeni rero. Namuntlha ndyangu wolowo wu tsake ngopfu hileswi ku landzela misinya ya milawu ya Vukreste swi tiseke vuyelo lebyinene swonghasi. Swi olova swinene ku chumayela mahungu lamanene loko vanhu va kona va ri ni xinghana.