Dyondzo Malunghana Ni Ku Tikukumuxa Swin’we Ni Ku Titsongahata
XIENDLAKALO xin’wana lexi humeleleke evuton’wini bya Hosi Davhida xi kandziyisa ku hambana exikarhi ka ku titsongahata ka xiviri ni ku tikukumuxa. Xi humelele endzhaku ka loko Davhida a hlule Yerusalema kutani a wu endla ntsindza wa tiko rakwe. Davhida a a teka Yehovha tanihi Hosi ya xiviri ya Israyele, kutani u hlele leswaku Areka leyi a yi fanekisela ku va kona ka Xikwembu yi tisiwa emutini wolowo. Xiendlakalo lexi a xi ri xa nkoka swinene eka Davhida lerova u kombise vanhu hinkwavo leswaku a a tsakile loko a ri karhi a landzelela vaprista lava rhwaleke Areka. Vaaki va le Yerusalema va vone hosi ya vona yi “chanchula” “hi matimba ya y[o]na hinkwawo.”—1 Tikronika 15:15, 16, 29; 2 Samuwele 6:11-16.
Hambiswiritano, Mikala nsati wa Davhida a nga wu joyinanga ntshungu wolowo lowu tsakeke. U hlalele hi le fasitereni naswona ematshan’weni yo tsakisiwa hi ndlela leyi Davhida a a dzunisa Yehovha ha yona, u “sungul[e] ku n’wi langutela ehansi embilwini yakwe.” (2 Samuwele 6:16) Ha yini Mikala a titwe hi ndlela leyi? Swi le rivaleni leswaku u anakanyisise ngopfu hi xikhundlha xa yena xa ku va n’wana wa xisati wa Sawulo, hosi yo sungula ya Israyele naswona sweswi se a a ri nsati wa hosi ya vumbirhi ya Israyele. Swi nga ha endleka a a vona swi nga fanelanga leswaku nuna wakwe lowa hosi a tichicha xiyimo, naswona a tlangela na vanhu lava tolovelekeke. Moya wolowo wa ku tikukumuxa u wu kombise hi ndlela leyi a xeweteke Davhida ha yona loko a tlhelele ekaya. U vule marito lawa yo monya a ku: “Hosi ya Israyele yi tivangamisile namuntlha loko yi tifunungula namuntlha ematihlweni ya mahlonga ya xisati ya malandza ya yona, hilaha un’wana wa vavanuna lava kalaka dzano a tifunungulaka hakona erivaleni!”—2 Samuwele 6:20.
Xana Davhida u hlamule njhani loko a monyiwa hi ndlela leyi? Davhida u tshinye Mikala hi ku vula leswaku Yehovha u fularhele tata wakwe Sawulo hikwalaho ka leswi a a rhandza yena. Davhida u engeterile a ku: “Ndzi ta tiendla la pfumalaka xindzhuti ku tlula leswi, naswona ndzi ta va wa xiyimo xa le hansi ematihlweni ya mina; ndzi tiyimisele ku tivangamisa hi mahlonga ya xisati lawa u ma vuleke.”—2 Samuwele 6:21, 22.
Ina, Davhida a a tiyimiserile ku hambeta a tirhela Yehovha hi ku titsongahata. Langutelo leri ri hi pfuna ku twisisa xivangelo lexi endleke leswaku Yehovha a vula leswaku Davhida i “wanuna la amukelekaka embilwini ya mina.” (Mintirho 13:22; 1 Samuwele 13:14) Entiyisweni, Davhida u tekelele munhu la nga xikombiso lexinene ku tlula vanhu hinkwavo emhakeni ya ku titsongahata, ku nga Yehovha Xikwembu hi byakwe. Lexi tsakisaka, xiga lexi Davhida a xi tirhiseke loko a byela Mikala leswaku, “Ndzi ta va wa xiyimo xa le hansi” xi huma eka riendli ra Xiheveru leri ri tlhelaka ri tirhisiwa ku hlamusela langutelo ra Xikwembu hi vanhu. Hambileswi Yehovha a nga Munhu la tlakukeke swinene evuakweni hinkwabyo, Pisalema 113:6, 7 yi n’wi hlamusela tanihi loyi a “korhama[ka] [ku va munhu a suka exikhundlheni xakwe loko a tirhisana ni vanhu va xiyimo xa le hansi] a languta etilweni ni le misaveni, a pfuxa la nga le hansi entshurini; [a] tlakusa xisiwana ekheleni ra nkuma.”
Leswi Yehovha a titsongahataka, a swi hlamarisi leswi a vengaka “mahlo lama titlakusaka” ya vanhu lava tikukumuxaka. (Swivuriso 6:16, 17) Leswi a kombiseke mfanelo leyi yo biha ni ku nga xiximi loyi Xikwembu xi n’wi hlawuleke ku va hosi, Mikala u tsoniwe lunghelo ra ku velekela Davhida n’wana. U fe a ri mhika. Hakunene leyi i dyondzo ya nkoka eka hina! Hinkwavo lava lavaka ku amukeriwa hi Xikwembu va fanele va yingisa marito lawa: “Tikhameni hi mianakanyo yo titsongahata un’wana eka un’wana, hikuva Xikwembu xi lwisana ni lava titlakusaka, kambe lava titsongahataka xi va nyika musa lowu nga faneriwiki.”—1 Petro 5:5.