Swivutiso Swa Vahlayi

I yini “nyimpi . . . ya Xikwembu xa Matimba Hinkwawo” eHar–Magedoni, naswona vuyelo byi ta va byihi?—Nhlavutelo 16:14, 16.

Hi ku kongoma, nyimpi ya Har–Magedoni i nyimpi ya misava hinkwayo ya nkarhi lowu taka laha Hosi leyi vekiweke hi Yehovha, ku nga Yesu Kreste, yi nga ta herisa valala va Xikwembu. Bibele yi hlamusela leswaku valala lava, ‘tihosi ta misava hinkwayo leyi akiweke,’ va ta kuceteriwa hi “marito lama huhuteriweke hi madimona” leswaku va hlengeletanela “nyimpi ya siku lerikulu ra Xikwembu xa Matimba Hinkwawo . . . endhawini leyi vuriwaka Har–Magedoni hi Xiheveru.”—Nhlavutelo 16:14, 16.

Ndhawu leyi mintlawa leyi kwetlembetanaka yi hlengeletanaka eka yona a hi ya xiviri. Vito Har–Magedoni, leri eka vuhundzuluxeri byin’wana bya Bibele ri hundzuluxeriweke ri va “Armagedoni,” ri vula “Ntshava ya Megido.” (Nhlavutelo 16:16) A ku si tshama ku va ni ntshava leyi vitaniwaka hi vito rero. Ku tlula kwalaho, “tihosi ta misava ni mavuthu ya tona” a ti nge hlengeletani hi xiviri endhawini yin’we. (Nhlavutelo 19:19) Kahle-kahle, ‘ndhawu’ leyi yi vula xiyimo lexi vafumi va tipolitiki va misava ni vaseketeri va vona va yisiwaka eka xona—xa ku kaneta Yehovha ni “mavuthu lawa a ma ri etilweni” lawa ma nga ehansi ka nkongomiso wa “Hosi ya tihosi ni Mufumi wa vafumi,” Yesu Kreste.—Nhlavutelo 19:14, 16.

Xa nkoka swinene, rito “Har–Magedoni” ri fambisana ni muti wa khale wa Megido wa le Israyele. Tanihi leswi muti wa Megido a wu ri evuxeni bya Ntshava ya Karimeli, hi wona a wu lawula magondzo lamakulu ya nkarhi wolowo lawa a ma tirhisiwa hi vaxavisi ni masocha. Naswona tinyimpi ta ku susana ntshiva a ti lweriwa kona. Hi xikombiso, Muavanyisi Baraka wa le Israyele u hlule vuthu ra matimba ra Vakanana leri a ri rhangeriwe hi Ndhuna-nkulu Sisera “ekusuhi ni mati ya Megido.” (Vaavanyisi 4:12-24; 5:19, 20) Nakambe endhawini yoleyo, Muavanyisi Gidiyoni u hlule Vamidiyani hi ku helela. (Vaavanyisi 7:1-22) Hi ku hlanganisa Megido ni nyimpi leyi taka, Bibele yi hi tiyisekisa leswaku Xikwembu xi ta yi hlula hi ku helela mintlawa hinkwayo ya vakaneti, hi ku tirhisa N’wana wa xona.

Vuyelo byi ta va byihi? Nyimpi ya Har–Magedoni yi ta herisa vukanganyisi ni vubihi hinkwabyo lebyi nga laha misaveni. Yi ta endla leswaku ku fika xiyimo lexinene ku tlula hinkwaswo leswi tshameke swi va kona ematin’wini ya vanhu. (Nhlavutelo 21:1-4) Ehansi ka nkongomiso wa rirhandzu wa Mfumo wa Xikwembu, misava yi ta hundzuriwa paradeyisi laha vanhu lavo lulama va nga ta hanya hilaha ku nga heriki.—Pisalema 37:29.