Swivutiso Swa Vahlayi
Xana Timhangu Ta Ntumbuluko I Nxupulo Lowu Humaka Eka Xikwembu?
Xikwembu a xi tirhisi timhangu ta ntumbuluko leswaku xi xupula vanhu lava nga riki na nandzu. A xi si tshama xi xupula vanhu vo tano ha tona naswona a xi nge pfuki xi va xupurile. Ha yini? Hikuva “Xikwembu i rirhandzu,” ku vula Bibele eka 1 Yohane 4:8.
Rirhandzu i xihlovo xa swilo hinkwaswo leswi Xikwembu xi swi endlaka. Rirhandzu a ri susumeteli munhu leswaku a vavisa vanhu lava nga riki na nandzu, hikuva Bibele yi vula leswaku “rirhandzu a ri endli leswo biha eka warikwavo.” (Varhoma 13:10) Eka Yobo 34:12, Bibele yi ri: “Entiyisweni Xikwembu a xi endli hilaha ku hombolokeke.”
I ntiyiso leswaku Bibele yi profete leswaku eminkarhini ya hina ku ta va ni timhangu ta ntumbuluko, to fana ni “ku tsekatseka lokukulu ka misava.” (Luka 21:11) Kambe Yehovha a nga fanelanga a soriwa hikwalaho ka makhombo lama vangiwaka hi timhangu ta ntumbuluko tanihi leswi ni muviki wa ta maxelo a nga fanelangiki a soriwa hikwalaho ka ku onhaka loku vangiwaka hi xidzedze lexikulu lexi a vuleke leswaku xi ta va kona. Kutani loko Xikwembu ku nga ri xona lexi vangaka ku xaniseka ka vanhu loku tisiwaka hi timhangu ta ntumbuluko, xana ku vangiwa hi yini?
Bibele yi paluxa leswaku “misava hinkwayo yi le hansi ka matimba ya lowo homboloka,” ku nga Sathana Diyavulosi. (1 Yohane 5:19) U ve mudlayi wa vanhu ku sukela loko a xandzukile eku sunguleni ka matimu ya munhu ku ta fikela esikwini ra hina. (Yohane 8:44) Sathana u anakanya leswaku vutomi bya vanhu a byi pfuni nchumu. U lawuriwa hi vutianakanyi, kutani a swi hlamarisi leswi a sunguleke fambiselo ra misava hinkwayo ra vanhu lava rhandzaka vutianakanyi. Fambiselo ra misava ya namuntlha ri pfumelela ku va vanhu va khomiwa bya mahlonga lerova vo tala lava nga riki na wona matimba yo tilwela va tshama etindhawini leti nga ni khombo, leti nga ha hlaseriwaka hi timhangu ta ntumbuluko kumbe timhangu leti vangiwaka hi vanhu. (Vaefesa 2:2; 1 Yohane 2:16) Xisweswo, vanhu va makwanga hi vona lava faneleke va soriwa hikwalaho ka makhombo man’wana lama welaka vanhu. (Eklesiasta 8:9) Njhani?
Nhlayo leyikulu ya timhangu hi leti vangiweke hi vanhu hi ndlela yo karhi. Hi xikombiso, xiya makhombo lama weleke vaaki va le dorobeni ra New Orleans, leri hlaseriweke hi xidzedze lexikulu ni ndhambi le U.S.A., kumbe tindlu leti khukhuriweke hi ndzhope lowu khulukeke hi le tintshaveni leti nga ekusuhi ni lwandle le Venezuela. Eka swiendlakalo sweswo ni swin’wana, swilo swa ntumbuluko swo fana ni moya ni mpfula, swi vange khombo lerikulu hileswi vanhu va nga riki na vutivi byo tala hi mbango ni ta maxelo, maakelo lama nga nyawuriki, ku tsandzeka ku hlela swilo hi vukheta, ku nga yingisi swilemukiso ni swihoxo leswi endliwaka hi valawuri.
Xiya mhangu leyi veke kona eminkarhini ya Bibele. Esikwini ra Yesu, ku wa ka xihondzo loku a ku nga rindzeriwanga ku dlaye vanhu va 18. (Luka 13:4) Mhangu leyi yi nga ha va yi vangiwe hi swihoxo swa vanhu, “nkarhi ni xiendlakalo lexi nga languteriwangiki,” kumbe haswimbirhi ka swona—kambe ha tiyiseka leswaku a ku nga ri vuavanyisi bya Xikwembu.—Eklesiasta 9:11.
Xana ti kona timhangu to karhi leti tshameke ti vangiwa hi Xikwembu? Ina, kambe ku hambana ni timhangu ta ntumbuluko kumbe leti vangiweke hi vanhu, tona a ti dlayi munhu un’wana ni un’wana, a ti ri ni xikongomelo xo karhi naswona a ti nga tolovelekanga. Swikombiso swimbirhi swa timhangu teto ta ntumbuluko i Ndhambi leyi veke kona emisaveni hinkwayo emasikwini ya Nowa swin’we ni ku lovisiwa ka muti wa Sodoma ni wa Gomora emasikwini ya Lota. (Genesa 6:7-9, 13; 18:20-32; 19:24) Vuavanyisi byolebyo bya Xikwembu byi lovise vaaki lavo homboloka lava nga hundzukangiki kambe vanhu lava a va lulamile ematihlweni ya Xikwembu va ponisiwile.
Kahle-kahle, Yehovha Xikwembu u ni vuswikoti ni matimba yo herisa ku xaniseka loku vangiwaka hi timhangu ta ntumbuluko naswona wa swi navela ku endla tano. Malunghana ni Hosi leyi vekiweke hi Xikwembu, ku nga Yesu Kreste, Pisalema 72:12 yi profete yi ku: “Yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni.”