Xikwembu I Mani?
XANA a wu ta xi hlamula njhani xivutiso lexi? Van’wana va ehleketa leswaku va xi tiva kahle Xikwembu—leswaku i munghana wa vona lonkulu. Van’wana va teka Xikwembu ku ri xaka leri tshamaka ekule. Va pfumela leswaku xi kona kambe a va tivi swo tala ha xona. Loko u pfumela eka Xikwembu, xana a wu ta swi hlamula njhani swivutiso leswi xaxametiweke laha hansi?
1. Xana Xikwembu i munhu wa xiviri?
2. Xana Xikwembu xi ni vito?
3. Xana Yesu i Xikwembu xa Matimba Hinkwawo?
4. Xana Xikwembu xa khathala ha mina?
5. Xana Xikwembu xi amukela vukhongeri hinkwabyo?
Loko wo vutisa vanhu van’wana swivutiso leswi, u nga ha kuma tinhlamulo to tala leti nga faniki. Kutani a swi hlamarisi leswi ku nga ni mintsheketo ni mavonelo lama hoxeke malunghana ni Xikwembu.
Tinhlamulo Ta Swivutiso Leswi I Ta Nkoka Swinene
Loko Yesu Kreste a vulavula ni wansati loyi a a pfumela eka Xikwembu loyi a hlanganeke na yena exihlobyeni, u kandziyise leswaku ha yini swi ri swa nkoka ku tiva ntiyiso malunghana ni Xikwembu. Wansati loyi wa Musamariya u pfumerile leswaku Yesu a a ri muprofeta. Kambe a ku ri ni nchumu lowu a wu nga n’wi dyisi byi rhelela. Vukhongeri bya Yesu a byi hambanile ni bya yena. Loko wansati loyi a phofule leswi a swi n’wi karhata, Yesu u te eka yena: “Mi gandzela lexi mi nga xi tiviki.” (Yohane 4:19-22) Swi le rivaleni leswaku Yesu u dyondzise leswaku a hi vanhu hinkwavo lava pfumelaka eka Xikwembu lava xi tivaka kahle.
Xana marito ya Yesu ma vula leswaku ku hava munhu loyi a nga xi tivaka kahle Xikwembu? Doo! Kutani Yesu u byele wansati loyi a ku: “Vagandzeri va ntiyiso va . . . ta gandzela Tatana hi moya ni ntiyiso, hikuva, hakunene, Tatana u lava lavo tano leswaku va n’wi gandzela.” (Yohane 4:23) Xana u un’wana wa lava gandzelaka Xikwembu “hi moya ni ntiyiso”?
I swa nkoka swinene eka wena leswaku u tiva nhlamulo ya xivutiso xexo. Ha yini? Yesu u kandziyise leswaku ha yini swi ri swa nkoka ku va ni vutivi lebyi kongomeke loko a khongela a ku: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.” (Yohane 17:3) Ina, leswaku u va ni vutomi lebyi nga heriki enkarhini lowu taka swi titshege hi ku va u tiva ntiyiso malunghana ni Xikwembu!
Xana swa koteka hakunene ku tiva ntiyiso malunghana ni Xikwembu? Ina, swa koteka! Kutani, u nga swi kotisa ku yini ku tiva ntiyiso wolowo? Yesu u vule leswi ha yena: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.” (Yohane 14:6) U tlhele a ku: “Leswaku Tatana i mani, ku hava loyi a swi tivaka handle ka N’wana, ni loyi N’wana a rhandzaka ku n’wi hlavutela eka yena.”—Luka 10:22.
Kutani ndlela yo tiva Xikwembu yi kumeka eka tidyondzo ta Yesu Kreste, N’wana wa Xikwembu. Entiyisweni, Yesu u hi tshembise a ku: “Loko mi khomelela eka tidyondzo ta mina, mi vadyondzisiwa va mina hakunene. Naswona mi ta tiva ntiyiso, kutani ntiyiso wu ta mi ntshunxa.”—Yohane 8:31, 32, The Holy Bible—New International Version.
Kutani, xana Yesu a a ta swi hlamula njhani swivutiso swa ntlhanu leswi vutisiweke eku sunguleni ka xihloko lexi?
[Xifaniso lexi nga eka tluka 4]
Xana u gandzela Xikwembu lexi u nga xi tiviki?