“Ntiyiso Wu Ta Mi Ntshunxa”

“Mi ta tiva ntiyiso, kutani ntiyiso wu ta mi ntshunxa.” Ku vule Yesu loko a ri karhi a dyondzisa mintshungu etempeleni eYerusalema. (Yohane 8:32) Vaapostola va Yesu swi va oloverile ku vona leswaku dyondzo ya Yesu a yi ri ntiyiso. Va vone vumbhoni byo tala bya leswaku mudyondzisi wa vona a a huma eka Xikwembu.

HAMBISWIRITANO, namuntlha van’wana swa va tikela ku xiya ntiyiso lowu Yesu a vulavuleke ha wona. Ku fana ni le masikwini ya muprofeta Esaya, namuntlha ku ni lava va “v̌ulaka leŝaku ŝo biha ŝi sasekile, ni ŝo saseka leŝaku ŝi bihile, la’v̌a endlaka munyama e ku v̌onakala ni ku v̌onakala e munyama, ni la’v̌a v̌ulaka ŝo bav̌a leŝaku ŝa nanḍiha, ni ŝo nanḍiha leŝaku ŝa bav̌a!” (Esaya 5:20) Tanihi leswi masiku lawa ku amukeriwaka mianakanyo, tifilosofi ni mahanyelo yo hambana-hambana, vanhu vo tala va vona onge swilo hinkwaswo swa fana ni leswaku a wu kona nchumu lowu vuriwaka ntiyiso.

Loko Yesu a byele vayingiseri va yena leswaku ntiyiso wu ta va ntshunxa, va angule hi ku vula leswaku: “Hina hi vana va Abrahama naswona a hi si tshama hi va mahlonga ya munhu wo karhi. Xana u vurisa ku yini u ku, ‘Mi ta ntshunxeka’?” (Yohane 8:33) A va vonanga xilaveko xa leswaku munhu wo karhi kumbe nchumu wo karhi wu va ntshunxa. Kambe Yesu u te: “Hakunene ndzi tiyisile ndzi ri eka n’wina, Muendli un’wana ni un’wana wa xidyoho i hlonga ra xidyoho.” (Yohane 8:34) Ntiyiso lowu Yesu a a vulavula ha wona wu nga pfula ndlela leyi yisaka eku ntshunxekeni exidyohweni. Yesu u te: “Loko N’wana a mi ntshunxa, mi ta ntshunxeka hakunene.” (Yohane 8:36) Kutani ntiyiso lowu ntshunxaka vanhu i ntiyiso wa malunghana na Yesu Kreste, N’wana wa Xikwembu. Munhu a nga ntshunxiwa eka xidyoho ni rifu hi ku va ni ripfumelo egandzelweni ra vutomi lebyi hetisekeke bya Yesu ntsena.

Eka khamba rin’wana Yesu u te: “Va kwetsimise hi ntiyiso; rito ra wena i ntiyiso.” (Yohane 17:17) Rito ra Xikwembu hilaha ri hlamuseriweke hakona eBibeleni i ntiyiso lowu nga ntshunxaka munhu eka swiyilayila ni le vugandzerini bya mavunwa. Bibele yi ni ntiyiso wa malunghana na Yesu Kreste, lowu endlaka leswaku vanhu va pfumela eka yena ni ku pfula ndlela leyi yisaka eka ntshembo lowu vangamaka wa nkarhi lowu taka. Ku tiva ntiyiso wa Rito ra Xikwembu i nchumu wa risima!

I swa nkoka ku fikela kwihi ku tiva ntiyiso? Vukhongeri byo tala namuntlha, hambiloko byi tivula lebyi landzelaka Bibele, byi kuceteriwa swinene hi tifilosofi ni mindhavuko ya vanhu. Hakanyingi, varhangeri va vukhongeri va vonaka va nga khathali hi ku pakanisa ka rungula ra vona, va lava ku amukeriwa hi vanhu ntsena. Van’wana va vona onge Xikwembu xi enerisiwa hi muxaka wihi na wihi wa vugandzeri, ntsendze loko byi ri bya mbilu hinkwayo. Kambe Yesu Kreste u te: “Nkarhi wa ta, naswona hi wona sweswi, lowu vagandzeri va ntiyiso va nga ta gandzela Tatana hi moya ni ntiyiso, hikuva, hakunene, Tatana u lava lavo tano leswaku va n’wi gandzela.”—Yohane 4:23.

Loko hi lava ku gandzela Xikwembu hi ndlela leyi amukelekaka, hi fanele hi tiva ntiyiso. Leyi i mhaka ya nkoka. Ntsako wa hina lowu nga heriki wu titshege hi swona. Hikwalaho, un’wana ni un’wana u fanele a tivutisa: ‘Xana ndlela leyi ndzi gandzelaka ha yona ya amukeleka eka Xikwembu? Xana ndza swi tsakela hi mbilu hinkwayo ku dyondza ntiyiso wa Rito ra Xikwembu? Kumbe xana ndzi chava leswi nkambisiso wa vukheta wu nga ta swi paluxa?’