Xana Yesu I Xikwembu Xa Matimba Hinkwawo?

Tinhlamulo leti tolovelekeke:

▪ “Ina, Yesu i Xikwembu xa Matimba Hinkwawo.”

▪ “Yesu a a ri Xikwembu lexi ambaleke miri wa nyama.”

I yini leswi Yesu a swi vuleke?

▪ “Loko a mi ndzi rhandza, a mi ta tsaka leswi ndzi yaka eka Tatana, hikuva Tatana u nkulu eka mina.” (Yohane 14:28) Yesu u vule leswaku yena ni Tata wakwe a va nga ringani.

▪ “Ndzi tlhandlukela eka Tatana ni Tata wa n’wina ni le ka Xikwembu xa mina ni Xikwembu xa n’wina.” (Yohane 20:17) Yesu a nga vulanga leswaku yena i Xikwembu kambe u vulavule hi Xikwembu tanihi Munhu un’wana.

▪ “A ndzi vulavulanga hi ku tisungulela ka mina, kambe Tatana loyi a ndzi rhumeke u ndzi nyike xileriso xa leswi ndzi nga ta swi hlamusela ni ku swi vulavula.” (Yohane 12:49) Tidyondzo leti Yesu a ti dyondziseke a ti nga humi eka yena; a ti huma eka Tatana.

YESU u vule leswaku i N’wana wa Xikwembu, ku nga ri Xikwembu xa Matimba Hinkwawo. Loko Yesu a a ri Xikwembu, xana a a khongela eka mani loko a ri laha misaveni? (Matewu 14:23; 26:26-29) A swi twali ku ehleketa leswaku Yesu a a tiendla onge u vulavula ni munhu un’wana!

Loko vadyondzisiwa van’wana vambirhi va Yesu va n’wi kombele swikhundlha swo hlawuleka eMfun’weni wakwe, u va hlamule a ku: “Loko ku ri ku tshama evokweni ra mina ra xinene ni ra ximatsi a hi swa mina ku swi nyika van’wana, kambe i swa lava lunghiseriweke swona hi Tata wa mina.” (Matewu 20:23) Xana Yesu a a va byela vunwa loko a vula leswaku a a nga ri na yona mfanelo yo va nyika leswi a va swi kombela? Doo! Kambe, hi ku titsongahata a a swi tiva leswaku i Xikwembu ntsena lexi nga ni mfanelo yo endla swiboho swoleswo. Yesu u kale a vula leswaku a ku ri ni swilo swin’wana leswi yena swin’we ni tintsumi a va nga swi tivi kambe a swi tiviwa ntsena hi Tata wakwe.—Marka 13:32.

Xana Yesu a a ri ehansi ka Xikwembu hi nkarhi lowu a ha ri laha misaveni ntsena? Doo! Hambi endzhaku ka loko Yesu a pfuxiwile eku feni, Bibele yi n’wi hlamusela tanihi loyi a nga ehansi ka Xikwembu. Muapostola Pawulo u hi tsundzuxa leswaku “nhloko ya Kreste i Xikwembu.” (1 Vakorinto 11:3) Bibele yi vula leswaku enkarhini lowu taka “loko swilo hinkwaswo swi ta va swi vekiwe ehansi ka yena, kutani N’wana na yena u ta tiveka ehansi ka xona lexi vekeke swilo hinkwaswo ehansi ka yena, leswaku Xikwembu xi va swilo hinkwaswo eka vanhu hinkwavo.”—1 Vakorinto 15:28.

Kutani swi le rivaleni leswaku Yesu a hi Xikwembu xa Matimba Hinkwawo. Hi yona mhaka leyi a vuleke leswaku Tata wakwe i “Xikwembu [xakwe].”—Nhlavutelo 3:2, 12; 2 Vakorinto 1:3, 4.a

[Nhlamuselo ya le hansi]

[Marito lama tshahiweke exihlokweni lama nga eka tluka 7]

Yesu u vule leswaku a ku ri ni swilo swin’wana leswi yena swin’we ni tintsumi a va nga swi tivi kambe a swi tiviwa ntsena hi Tata wakwe