Leswi Hi Nga Swi Dyondzaka Eka Yesu

Malunghana Ni Swikhongelo Leswi Xikwembu Xi Swi Yingisaka

Hakanyingi Yesu a a lava ndhawu leyi ku nga riki na munhu leswaku a ta khongela eka yona, naswona u khutaze valandzeri vakwe leswaku na vona va endla tano. Bibele yi ri: “Enkarhini lowu a a ri endhawini yin’wana a khongela, loko a heta, un’wana wa vadyondzisiwa vakwe a ku eka yena: ‘Hosi, hi dyondzise ndlela ya ku khongela’ . . . Kutani a ku eka vona: ‘Loko mi khongela, vulani leswi, “Tatana, vito ra wena a ri kwetsimisiwe.”’” (Luka 5:16; 11:1, 2) Xisweswo Yesu a a kombisa leswaku hi fanele hi khongela ntsena eka Tata wakwe, ku nga Yehovha. Hi yena ntsena loyi a nga Muvumbi wa hina tlhelo “Mutwi wa xikhongelo.”—Pisalema 65:2.

Xana Xikwembu xi tsakisiwa hi swikhongelo hinkwaswo?

Xikwembu a xi swi tsakeli swikhongelo leswi hlokohatiweke leswi phindha-phindhiwaka. Yesu u te: “Loko u khongela, u nga vuli swilo leswi fanaka hi ku phindha-phindha.” (Matewu 6:7) Hi fanele hi vulavula ni Tata wa hina wa le tilweni swi suka embilwini. Siku rin’wana Yesu u byele valandzeri vakwe leswaku swikhongelo swa munhu la endleke xidyoho loyi a lavaka ku hundzuka hi mbilu yakwe hinkwayo swi amukeleka swinene eka Xikwembu ku tlula swikhongelo swa munhu loyi a tikukumuxaka loyi a yi namarhelaka hi vukheta mikhuva ya vukhongeri. (Luka 18:10-14) Leswaku Xikwembu xi yingisa swikhongelo swa hina, hi fanele hi titsongahatela ku endla leswi xi hi byelaka swona. Hambi ku ri Yesu u te: “Ndzi vulavula swilo leswi hilaha Tatana a ndzi dyondziseke hakona . . . Nkarhi hinkwawo ndzi endla swilo leswi n’wi tsakisaka.” (Yohane 8:28, 29) Loko Yesu a khongela u te: “Ku nga endleki ku rhandza ka mina, kambe a ku endleke ka wena.”—Luka 22:42.

Hi swihi swilo leswi hi faneleke hi swi khongelela?

Leswi Xikwembu xi onhiweke vito, Yesu u te: “Kutani mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.’” (Matewu 6:9, 10) Hi fanele hi khongelela Mfumo wa Xikwembu leswaku wu ta hikuva hi wona lowu xi nga ta wu tirhisa ku hetisisa ku rhandza ka xona etilweni ni le misaveni. Yesu u vule leswaku hi nga khongelela “xinkwa xa hina xa siku.” Hi nga tlhela hi khongelela ntirho, ndhawu yo tshama, swiambalo, rihanyo lerinene ni swin’wana leswi hi karhataka. Ku engetela kwalaho, Yesu u vule leswaku hi fanele hi khongelela ku rivaleriwa swidyoho.—Luka 11:3, 4.

Xana hi fanele hi va khongelela vanhu van’wana?

Yesu u va khongelerile vanhu van’wana. Bibele yi hi byela leswi: “Vana lavatsongo va yisiwa eka yena, leswaku a va tlhandleka mavoko, a va khongelela.” (Matewu 19:13) Yesu u byele muapostola Petro a ku: “Ndzi ku endlele xikombelo leswaku ripfumelo ra wena ri nga heli.” (Luka 22:32) Yesu u khutaze valandzeri vakwe leswaku va khongelela vanhu van’wana, hambi ku ri lava a va va xanisa ni lava a va va rhukana.—Matewu 5:44; Luka 6:28.

Ha yini hi fanele hi phikelela exikhongelweni?

Yesu u tinyike nkarhi wo khongela ni ku khutaza valandzeri vakwe leswaku va “khongela nkarhi hinkwawo, va nga tshiki.” (Luka 18:1) Yehovha wa hi rhamba leswaku hi n’wi tshemba hi ku va hi vulavula na yena hi ku phindha-phindha malunghana ni swilo leswi hi karhataka. Yesu u te: “Hambetani mi kombela, mi ta nyikiwa.” Kambe leswi a swi vuli swona leswaku Yehovha wa kanakana ku hlamula lava n’wi rhandzaka ni ku n’wi xixima tanihi Tatana. Ematshan’weni ya sweswo Yesu u te: “Loko n’wina, hambiloko mi hombolokile mi tiva ndlela ya ku nyika vana va n’wina tinyiko letinene, Tatana la nge tilweni u ta nyika moya lowo kwetsima hilaha ku tlurisaka swinene eka lava n’wi kombelaka!”—Luka 11:5-13.

Leswaku u kuma rungula leri engetelekeke, vona ndzima 17 ya buku leyi nge Xana Bibele Yi Dyondzisa Yini Hakunene?a

[Nhlamuselo ya le hansi]