Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? A hi vone loko u nga swi kota ku hlamula swivutiso leswi landzelaka:

• Ha yini swi ri swa nkoka swinene leswaku hi tshama hi tshembekile tanihi Vakreste?

Ku tshama hi tshembekile swi hi pfuna ku kombisa leswaku hi titsongahatela vulawuri bya Yehovha hikwalaho ka leswi hi n’wi rhandzaka kutani hi kombisa leswaku Sathana i muhembi. Ku tshembeka ka hina ku tlhela ku veka xisekelo lexi Xikwembu xi nga hi avanyisaka hi ku ya hi xona naswona i ka nkoka eka ntshembo wa hina wa vumundzuku.—12/15, matluka 4-6.

• Hi swihi swithopo swin’wana leswi kombisaka ntirho wa Yesu eka xikongomelo xa Xikwembu?

N’wana la tswariweke a ri swakwe. Rito. Amen. Muhlanganisi wa ntwanano lowuntshwa. Muprista Lonkulu. Mbewu leyi tshembisiweke.—12/15, tluka 15.

• Ha yini swi ri swa nkoka leswi muprofeta Eliya a leriseke nandza wa yena leswaku a languta etlhelo ra lwandle loko yena a ri karhi a khongela leswaku ku na mpfula? (1 Tih. 18:43-45)

Eliya u kombise leswaku a a wu toloverile ndzhendzheleko wa mati. Mapapa lama vumbekeke ehenhla ka lwandle a ma ya emisaveni laha loko ma fika kona a ma nisa mpfula.—1/1, matluka 15-16.

• Hi nga wu engetela njhani ntsako lowu hi wu kumaka entirhweni wa hina wo chumayela?

Hi nga lunghiselela timbilu ta hina, hi anakanyisisa swinene hi ndlela leyi hi nga va pfunaka ha yona van’wana. Hi nga chumayela hi xikongomelo xo sungula tidyondzo ta Bibele. Loko vanhu va nga ri tsakeli rungula ra hina, hi nga ha cinca xingheniso xa hina ivi hi vulavula hi swilo leswi khumbaka vanhu lava nga le nsin’wini ya hina.—1/15, matluka 8-10.

• Xana vuvabyi bya nhlokonho lebyi ku vulavuriwaka ha byona eBibeleni bya fana ni lebyi nga kona namuntlha?

Xitsongwatsongwana lexi vangaka nhlokonho a xi ri kona eminkarhini ya ku tsariwa ka Bibele. (Lev. 13:4, 5) Bibele yi tlhela yi vulavula hi nhlokonho leyi a yi kumeka eka swiambalo ni le tindlwini. Vuvabyi byolebyo bya “nhlokonho” swi nga ha endleka a ku ri muxaka wo karhi wa mfurho. (Lev. 13:47-52)—2/1, tluka 19.

• Xana tidyondzo ta le Bibeleni ti fanele ti ri khumba njhani langutelo ra Mukreste swin’we ni mikhuva leyi fambisanaka ni minkosi?

Hambileswi Mukreste a nga ha rilaka loko a feriwile, wa swi tiva leswaku vafi a va tivi nchumu. Hambiloko vanhu lava nga riki Vakreste va n’wi sandza, u papalata mikhuva leyi fambisanaka ni dyondzo ya leswaku vafi va nga vavisa kumbe ku pfuna vanhu lava hanyaka. Leswaku va papalata swivulavula, Vakreste van’wana va swi tsala ehansi leswi va lavaka swi endliwa enkosini wa vona.—2/15, matluka 29-31.

• Hi ku ya hi Pisalema 1:1, hi swihi swilo swinharhu leswi hi faneleke hi swi papalata loko hi lava ku va lava tsakeke?

Ndzimana leyi yi vulavula hi “xitsundzuxo xa lavo homboloka,” “[tindlela] ta vadyohi” ni “[xitshamo] xa vahlekuri.” Ina, leswaku hi va lava tsakeke hi fanele hi papalata vanhu lava hlekulaka kumbe va honisa milawu ya Xikwembu. Ematshan’weni ya sweswo, hi fanele hi tsakela nawu wa Yehovha.—3/1, tluka 17.

• Xana ‘buku ya Yaxara’ ni ‘buku ya Tinyimpi ta Yehovha’ i tibuku ta le Bibeleni leti lahlekeke? (Yox. 10:13; Tinhl. 21:14)

Doo! Swi tikomba onge a ku ri tibuku leti nga huhuteriwangiki leti a ti ri kona eminkarhini ya ku tsariwa ka Bibele naswona vatsari va Bibele va vulavule ha tona.—3/15, tluka 32.

• Hi kwihi ku cinca lokukulu loku endliweke eka vuhundzuluxeri bya manguva lawa bya Bibele ya Xilatini?

Hi 1979, Mupapa John Paul wa Vumbirhi u pfumele leswaku ku tirhisiwa Nova Vulgata, ku nga vuhundzuluxeri lebyintshwa bya Xilatini. Nkandziyiso wo sungula a wu ri ni vito ra Xikwembu leri nge Iahveh, etindhawini tin’wana. (Eks. 3:15; 6:3) Hambiswiritano, loko ku humesiwa nkandziyiso wa vumbirhi wa ximfumo hi 1986, a ku tirhisiwe rito Dominus [Hosi] ematshan’weni ya vito leri nge Iahveh.—4/1, tluka 22.