Swivutiso Swa Vahlayi

Xana Sathana u hlongoriwe rini etilweni?—Nhlav. 12:1-9.

Hambileswi buku ya Bibele ya Nhlavutelo yi nga vuliki hi ku kongoma nkarhi lowu Sathana a hlongoriweke ha wona etilweni, yi boxa swiendlakalo leswi tlhandlamanaka leswi nga hi pfunaka ku kumisisa nkarhi lowu a hlongoriweke ha wona etilweni. Xiendlakalo xo sungula eka swiendlakalo sweswo i xa ku simekiwa ka Mfumo wa Mesiya. Kasi xiendlako xa vumbirhi i xa ‘nyimpi leyi tlhekekeke etilweni’ leyi endleke leswaku Sathana a hluriwa kutani a hetelela a hlongoriwile etilweni.

Matsalwa ma swi veka erivaleni leswaku 1914 ku ve lembe leri “nkarhi lowu vekiweke wa matiko” wu heleke ha rona kutani ku simekiwa Mfumo wa Mesiya.a (Luka 21:24) Xana swi teke nkarhi wo tanihi kwihi endzhaku ka sweswo leswaku ku tlhekeka nyimpi etilweni leyi endleke leswaku Sathana a hlongoriwa etilweni?

Nhlavutelo 12:4 yi ri: “Dragona [Sathana] yi yima yi nga suki emahlweni ka wansati loyi a a lava ku veleka, leswaku, loko a veleka, yi mita n’wana wakwe.” Leswi swi kombisa leswaku Sathana a a lava ku endla leswi a nga swi kotaka leswaku a wu herisa hi ku hatlisa Mfumo wolowo lowuntshwa endzhakunyana ka loko wu simekiwile. Hambileswi Yehovha a siveleke kungu rolero ro biha, Sathana a a tiyimiserile ku lovisa Mfumo wolowo lowu a wa ha ku simekiwa. Hi yona mhaka leyi “Mikayele ni tintsumi ta yena” va hatliseke va hlongola ‘dragona ni tintsumi ta yona’ etilweni leswaku Mfumo wu nga lovisiwi. Leswi swi vula leswaku ku hluriwa ni ku hlongoriwa ka Sathana ku endleke endzhakunyana ka loko Mfumo wu simekiwile hi 1914.

Xiendlakalo xin’wana lexi hi faneleke hi xi kambisisa i xa ku pfuxiwa ka Vakreste lava totiweke, loku hi ku ya hi Matsalwa ku endlekeke endzhakunyana ka loko Mfumo wu simekiwile.b (Nhlav. 20:6) Leswi ku nga vuriwiki leswaku vamakwavo va Kreste lava totiweke va hlanganyerile na Yesu enyimpini yo lwa na dragona ni tintsumi ta yona, swi nga ha endleka leswaku nyimpi yoleyo ni ku hlongoriwa ka Sathana ni madimona yakwe ku hele loko ku pfuxiwa ka vamakwavo va Kreste ku sungula.

Kutani Bibele a yi wu vuli hi ku kongoma nkarhi lowu Sathana ni madimona yakwe va hlongoriweke ha wona etilweni. Nilokoswiritano, swi le rivaleni leswaku ku vekiwa ka Yesu Kreste exiluvelweni etilweni hi 1914 ku landzeriwe hi ku hlongoriwa ka Sathana ni madimona yakwe etilweni.

[Tinhlamuselo ta le hansi]