Tshinela Eka Xikwembu
“Mina Yehovha Xikwembu Xa N’wina Ndza Kwetsima”
“WA KWETSIMA, wa kwetsima, wa kwetsima Yehovha Xikwembu.” (Nhlavutelo 4:8) Hi marito wolawo Bibele yi hlamusela leswaku Yehovha wa kwetsima, leswi vulaka leswaku u tengile naswona u lulamile hi ndlela leyi tlakukeke swinene. Xikwembu a xi na xidyoho nikatsongo; a xi nge nyamisiwi kumbe ku thyakisiwa hi xidyoho hambi ku ri hi ndlela yihi ni yihi. Xana leswi swi vula leswaku vanhu lava nga hetisekangiki a va nge swi koti ku va ni vuxaka ni Xikwembu lexi kwetsimaka xi tlhela xi va lexi tlakukeke? Doo! A hi kambisiseni marito lama nga hi nyikaka ntshembo lama tsariweke eka Levhitika ndzima 19.
Yehovha u byele Muxe a ku: “Vulavula ni ntshungu hinkwawo wa vana va Israyele.” Marito lawa a ma vuleke endzhaku ka wolawo a ma tirha eka munhu un’wana ni un’wana etikweni. Xana Muxe a a fanele a va byela yini? Xikwembu xi ya emahlweni xi ku: “U ku eka [vona], ‘Mi fanele mi tikombisa mi ri lava kwetsimaka, hikuva mina Yehovha Xikwembu xa n’wina ndza kwetsima.’” (Ndzimana 2) Muisrayele un’wana ni un’wana a a fanele a va la kwetsimaka. Marito lama nge “mi fanele” ma kombisa leswaku lexi a ku nga ri xiringanyeto kambe a ku ri xileriso. Xana Xikwembu a xi va kombela ku endla nchumu lowu a va nga ta swi kota ku wu endla?
Xiya leswaku Yehovha u vule leswaku wa kwetsima, ku nga ri ku va vekela xipimelo lexi na vona a va fanele va xi fikelela, kambe u va hlamusela xivangelo lexi endlaka leswaku a va nyika nawu wolowo. Hi marito man’wana, Yehovha a nga byelanga vagandzeri vakwe lava nga hetisekangiki va le Israyele leswaku va va lava kwetsimaka ku fana na yena. Sweswo a swi nga ta koteka. Yehovha, “Lowo Kwetsima Ngopfu,” u kwetsima swinene ku tlula vanhu lavan’wana hinkwavo. (Swivuriso 30:3) Hambiswiritano, leswi Yehovha a kwetsimaka, u langutele leswaku vagandzeri vakwe va va lava kwetsimaka—hi ku ya hi vuswikoti lebyi vanhu lava nga hetisekangiki va nga na byona. Xana a va ta tikombisa va ri lava kwetsimaka hi tindlela tihi?
Endzhaku ka loko Yehovha a lerise Vaisrayele leswaku va va lava kwetsimaka, u tirhise Muxe ku hlamusela swilaveko leswi katsaka timhaka hinkwato ta vutomi. Muisrayele un’wana ni un’wana a a languteriwe ku yingisa milawu yo tano ya mahanyelo hi tindlela leti landzelaka: a va xixima swinene vatswari ni vanhu lava kuleke (tindzimana 3, 32); a anakanyela munhu la feke tindleve, munhu la feke mahlo ni vanhu van’wana lava pfumalaka (tindzimana 9, 10, 14); a va la tshembekaka naswona a nga vi na xihlawuhlawu loko a tirhisana ni vanhu van’wana (tindzimana 11-13, 15, 35, 36); naswona a rhandza mugandzeri-kulobye hilaha na yena a tirhandzaka hakona. (Ndzimana 18) Loko Muisrayele a swi landzela sweswo swin’we ni milawu yin’wana leyi boxiweke, ‘hakunene a a ta va la kwetsimaka eka Xikwembu xa yena.’—Tinhlayo 15:40.
Nawu lowu wa malunghana ni ku kwetsima wu hi endla hi twisisa ndlela leyi Yehovha Xikwembu a langutaka swilo ha yona swin’we ni tindlela takwe. Phela hi dyondza leswaku loko hi lava ku va ni vuxaka lebyikulu na yena, hi fanele hi endla matshalatshala lamakulu leswaku hi hanya hi ku pfumelelana ni milawu yakwe ya mahanyelo lamanene. (1 Petro 1:15, 16) Loko hi namarhela milawu yoleyo hi nga tiphina hi vutomi.—Esaya 48:17.
Xileriso xa leswaku hi kwetsima xi tlhela xi kombisa leswaku Yehovha wa va tshemba vagandzeri vakwe. Yehovha a nga langutelanga leswaku hi endla leswi hi nga ta ka hi nga swi koti ku swi endla. (Pisalema 103:13, 14) Wa swi tiva leswaku hina vanhu lava endliweke hi xifaniso xakwe, hi ni vuswikoti byo hlakulela ku va lava kwetsimaka—hi mpimo wo karhi. (Genesa 1:26) Xana u susumeteleka ku dyondza swo tala hi ndlela leyi u nga tshinelaka ha yona eka Xikwembu lexi kwetsimaka, ku nga Yehovha?
[Xifaniso lexi nga eka tluka 9]
Hi ni vuswikoti byo hlakulela ku va lava kwetsimaka