Xana Xikwembu Xi Ku Tshembisa Rifuwo?

‘Xikwembu xi lava leswaku u va ni rifuwo—timovha to tala, u va n’wamabindzu loyi swi n’wi fambelaka kahle. Lexi wena u faneleke u xi endla i ku tshembela eka xona, u pfula xandla xa wena kutani u xi nyika mali hinkwayo leyi u nga kotaka ku xi nyika yona.’

HI KU YA HI phepha-hungu leri kandziyisiweke eBrazil, mintlawa yin’wana ya vukhongeri yi byela vanhu rungula rolero. Naswona vanhu vo tala va ri tekela enhlokweni. Hi ku ya hi ndzavisiso lowu endliweke eUnited States eka vanhu lava tivulaka Vakreste, magazini wa Time wu vula leswi: “Vanhu lava endlaka 61 wa tiphesente va pfumela leswaku Xikwembu xi lava leswaku vanhu va va ni rifuwo. Kasi lava endlaka 31 wa tiphesente . . . va pfumela leswaku loko u nyika Xikwembu mali ya wena, xi ta ku katekisa hi mali yo tala.”

Dyondzo ya muxaka lowu, leyi vuriwaka dyondzo ya leswaku u ta va xigwili loko u seketeriwa hi Xikwembu, ya andza ngopfu-ngopfu ematikweni ya Latin-Amerika, yo tanihi Brazil naswona vanhu va khitikanela etikerekeni leti tshembisaka vanhu leswaku Xikwembu xi ta va nyika rifuwo. Kambe, xana hakunene Xikwembu xi va tshembisa rifuwo vanhu lava xi tirhelaka? Xana malandza hinkwawo ya Xikwembu ya le nkarhini lowu hundzeke a ma fuwile?

I ntiyiso leswaku eMatsalweni ya Xiheveru hakanyingi hi hlaya leswaku lava Xikwembu xi va katekiseke a va fuwile. Hi xikombiso, eka Deteronoma 8:18 ha hlaya: “U fanele u tsundzuka Yehovha Xikwembu xa wena, hikuva hi yena munyiki wa matimba ya wena leswaku a ku endla u fuwa.” Marito wolawo a a ma tiyisekisa Vaisrayele leswaku loko va yingisa Xikwembu a va ta va tiko leri fuweke.

Ku vuriwa yini hi munhu ha un’we? Yobo wanuna wo tshembeka loyi a a fuwe ni swikunwana, endzhaku ka loko Sathana a n’wi vangele vusiwana, Yehovha u tlhele a n’wi vuyisela rifuwo rakwe ri “andzisiwe kambirhi.” (Yobo 1:3; 42:10) Abrahama na yena a a fuwile. Genesa 13:2 yi vula leswaku a a ri ni “mintlhambi yo tala ya swifuwo ni silivhere ni nsuku.” Loko mavuthu lama hlanganisiweke ya tihosi ta mune ta le Vuxeni ma teke Lota, Abrahama u “[hlengelete] vanhu vakwe lava leteriweke, mahlonga ya 318 lama tswariweke endyangwini wakwe.” (Genesa 14:14) Leswi Abrahama a a ri ni ‘vanhu lava leteriweke’ lava lunghekeleke nyimpi, swi vula leswaku a a ri ni ndyangu lowukulu. Mhaka ya leswaku a a swi kota ku hlayisa ndyangu wolowo lowukulu yi kombisa leswaku a a ri wanuna loyi a a fuwile swinene, loyi a a ri ni ntlhambi lowukulu wa swifuwo.

I ntiyiso leswaku malandza yo tala ya Xikwembu lama tshembekeke enkarhini lowu nga hundza yo tanihi Abrahama, Isaka, Yakobe, Davhida na Solomoni ni van’wana vo tala, a va fuwile. Hambiswiritano, xana leswi swi vula leswaku Xikwembu xi ta endla leswaku munhu un’wana ni un’wana loyi a xi tirhelaka a va ni rifuwo? Hi hala tlhelo, xana ku va munhu a ri xisiwana swi vula leswaku Xikwembu a xi n’wi katekisi? Xihloko lexi landzelaka xi ta tlhuvutsa swivutiso leswi.