Tshinela Eka Xikwembu

“U Ta N’wi Endla Hi Vutshembeki”

2 SAMUWELE 22:26

SWILO swin’wana swi nga hi heta matimba kumbe hi xengiwa hi munhu loyi hi n’wi tshembaka. Swilo swo tano swi tolovelekile emisaveni ya namuntlha leyi nga tshembekiki. (2 Timotiya 3:1-5) Xana u kona loyi hi nga titshegaka ha yena naswona a nga tshamaka a tshembekile eka hina? A hi kambisiseni vutomi bya Hosi Davhida wa le Israyele wa khale.

Hi nkarhi wakwe, Davhida u xanisiwe hi tindlela to hambana-hambana. U boheke ku hanya tanihi mubaleki naswona Sawulo hosi yo sungula ya Israyele a a n’wi xanisa hikwalaho ko n’wi vondzoka. Endyangwini wakwe, nsati wakwe Mikala a a nga tshembekanga eka yena naswona u “[sungule] ku n’wi langutela ehansi embilwini yakwe.” (2 Samuwele 6:16) Ahitofele, mutsundzuxi la tshembekaka wa Davhida, u n’wi xengile kutani a joyina ntlawa wa vaxandzuki vakwe. A ku ri mani murhangeri wa vaxandzuki volavo? A ku ri Absalomu, n’wana wa jaha wa Davhida! Leswi Davhida a xengiweke hi ku phindha-phindha, xana u hele matimba kutani a gimeta hileswaku a nga kona loyi a nga n’wi tshembaka?

Nhlamulo ya xivutiso lexi yi kumeka emaritweni ya Davhida lama nga eka Samuwele wa Vumbirhi 22:26. Loko Davhida wanuna la nga ni ripfumelo leri tiyeke a vulavula hi Yehovha Xikwembu eka risimu rakwe ra xiphato u te: “U ta n’wi endla hi vutshembeki loyi a tshembekeke.” Davhida a a tiyiseka leswaku ku nga khathariseki ndlela leyi vanhu va nga n’wi khomisaka tingana ha yona, Yehovha u ta tshama a tshembekile eka yena.

A hi kambisiseni marito ya Davhida hi vuenti. Xiga xa Xiheveru lexi hundzuluxeriweke xi va ku “endla hi vutshembeki” xi nga ha tlhela xi vula ku “kombisa swiendlo swa musa.” Vutshembeki bya xiviri byi ti tshege hi rirhandzu. Yehovha u titshineta eka lava tshembekaka eka yena.a

Xiya leswaku ku tshembeka swi katsa swo tala ku tlula ndlela leyi u titwaka ha yona; ku fanele ku vonaka eka hinkwaswo leswi u swi endlaka. Yehovha u endla hi vutshembeki, hilaha Davhida a swi voneke hakona evuton’wini byakwe. Hi nkarhi lowu a a langutane ni maxangu, Yehovha u n’wi pfunile, a n’wi sirhelela ni ku n’wi kongomisa tanihi hosi yo tshembeka. Davhida u nkhense Yehovha hileswi a n’wi kutsuleke “exandleni xa valala vakwe.”—2 Samuwele 22:1.

Xana marito ya Davhida ma hi byela yini? Ma hi byela leswaku Yehovha a nga hundzuki. (Yakobo 1:17) Wa yi namarhela milawu yakwe naswona wa swi hetisisa switshembiso swakwe. Eka yin’wana ya tipisalema takwe, Davhida u te: “Yehovha . . . a nge va siyi lava tshembekeke vakwe.”—Pisalema 37:28.

Yehovha wa ku tlangela ku tshembeka ka hina naswona u hi khutaza leswaku hi tekelela ku tshembeka kakwe loko hi tirhisana ni van’wana. (Vaefesa 4:24; 5:1) Loko hi kombisa ku tshembeka hi tindlela teto, hi nga tiyiseka leswaku a nge hi siyi. Hambiloko vanhu van’wana vo hi heta matimba, hi nga titshega hi Yehovha loyi a nga ta endla hilaha ku tshembekeke eka hina, a hi pfuna ku hlula miringo yihi ni yihi leyi hi nga ha langutanaka na yona. Xana leswi a swi ku susumeteli ku tshinela eka Yehovha ‘La tshembekaka’?—Nhlavutelo 16:5.

[Nhlamuselo ya le hansi]