Swivutiso Swa Vahlayi . . .

Xana Ndzi Fanele Ndzi Joyina Ntlawa Wo Karhi Wa Vukhongeri?

▪ Xana wa kanakana ku joyina ntlawa wo karhi wa vukhongeri hikwalaho ko hetiwa matimba hi vukanganyisi ni ku nga twanani ka swirho swa byona ni vafundhisi va kona? Loko swi ri tano, xivuriso xa Xifurwa xi yi hlamusela kahle ndlela leyi u titwaka ha yona loko xi ku, “Hakanyingi munhu loyi a nghenaka kereke u le kule ni Xikwembu.”

Kumbexana wa yi xixima Bibele naswona u vona onge mimfumo ni vanhu va fanele va xixima xiboho xin’wana ni xin’wana lexi munhu a xi endlaka malunghana ni vukhongeri. Kambe u nga ha tivutisa, ‘Xana Xikwembu xi lava leswaku vanhu lava lavaka ku xi gandzela hi ndlela leyi amukelekaka va va swirho swa ntlawa wo karhi wa vukhongeri?’

Nhlamulo leyi kongomeke i ina. Ha yini hi vula tano? Xana vukhongeri hinkwabyo bya amukeleka eka Xikwembu?

Xiya xikombiso xa Yesu. Xana a a ri xirho xa ntlawa wa vukhongeri byo karhi? Loko a ha ri ntsongo, a a famba ni swirho swa ndyangu wa ka vona leswi a swi ri Vayuda swin’we ni vanhu van’wana, lava a ku ri mukhuva wa vona ku ya etempeleni ya le Yerusalema leswaku va ya gandzela tanihi ntlawa. (Luka 2:41-43) Loko se a kurile, u joyine Vayuda-kulobye leswaku va gandzela esinagogeni ya kwalaho. (Luka 4:14-16) Loko a vulavula ni wansati loyi a a huma eka vukhongeri byin’wana, u te: “Hi gandzela lexi hi xi tivaka.” (Yohane 4:22) Laha Yesu u swi veke erivaleni leswaku a a ri xirho xa ntlawa wa vukhongeri bya Vayuda.

Endzhakunyana, Yesu u vule leswaku leswi Vayuda va n’wi fularheleke, Xikwembu xi ta fularhela vugandzeri bya vona bya vukanganyisi. (Matewu 23:33–24:2) Hambiswiritano, u kombise leswaku lava lavaka ku gandzela Xikwembu hi ndlela leyi amukelekaka, va fanele va va swirho swa ntlawa wa vukhongeri byo karhi. U byele valandzeri vakwe a ku: “Hinkwavo va ta tiva leswaku mi vadyondzisiwa va mina, loko mi rhandzana.” (Yohane 13:35) Mudyondzisiwa wa Kreste u fanele a tihlanganisa ni vapfumeri-kulobye leswaku a ta kombisa rirhandzu rero. Entiyisweni, Yesu u swi veke erivaleni leswaku ku ni tindlela timbirhi ta vukhongeri. Yin’wana u yi hlamusele tanihi gondzo leri “[anameke] ri tlhela ri pfuleka” leri “yisaka endzovisweni.” Ku hambana na rona, u te: “Nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.”—Matewu 7:13, 14.

Kambe a hi vukhongeri hinkwabyo lebyi nga endleleni leyi. Bibele yi hi lemukisa hi ku joyina vukhongeri lebyi nga ni ‘nghohe ya vukhongeri, kambe byi aleke matimba ya byona.’ Yi tlhela yi hi lemukisa leswaku hi ‘byi fularhela.’ (2 Timotiya 3:5, Bibele Ya Xitsonga) Hi hala tlhelo, hi ta vuyeriwa swinene loko ho kuma vukhongeri lebyi yisaka evuton’wini lebyi nga heriki kutani hi tihlanganisa na byona. Byi ta hi khutaza, byi hi seketela ni ku hi byela hi ntshembo wa vumundzuku.—Vaheveru 10:24, 25.

Xana u nga byi vona njhani vukhongeri lebyi nga egondzweni ro lala? Ha yini u nga kambisisi tinhlamulo leti sekeriweke eBibeleni leti nga eka ndzima 15 ya buku leyi nge Xana Bibele Yi Dyondzisa Yini Hakunene?a Rungula rero ri ta ku pfuna leswaku u endla xiboho lexinene malunghana ni ntlawa wa vukhongeri lowu u faneleke u wu joyina.

[Nhlamuselo ya le hansi]