5 Xikwembu Xi Amukela Vugandzeri Hinkwabyo—Xana I Ntiyiso?

Leswi u nga ha vaka u swi twile: “Tanihi leswi ku nga ni tindlela to tala leti yisaka endhawini yin’we, ku ni tindlela to tala leti yisaka eka Xikwembu. Munhu un’wana ni un’wana u fanele a tikumela ndlela yakwe yo ya eka Xikwembu.”

Leswi Bibele yi swi dyondzisaka: Hi fanele hi tshembeka eka vugandzeri bya hina, hi papalata vukanganyisi. Yesu u byele varhangeri va vukhongeri va le sikwini rakwe leswaku ha yini Xikwembu xi va papalatile u te: “Esaya u profete hilaha ku faneleke malunghana na n’wina vakanganyisi, hilaha swi tsariweke hakona, ‘Vanhu lava va ndzi xixima hi milomu ya vona, kambe timbilu ta vona ti le kule swinene na mina.’” (Marka 7:6) Kambe ku tshembeka ntsena a swi vuli swona leswaku Xikwembu xi ta amukela vugandzeri bya hina.

Yesu u veke mhaka leyi erivaleni hi ku paluxa swihoxo leswikulu eka vugandzeri lebyi a byi tisiwa hi varhangeri va vukhongeri ni valandzeri va vona. U va byele marito ya Xikwembu lama nge: “Va tama va ndzi gandzela swa hava, hikuva va dyondzisa swileriso swa vanhu va swi endla tidyondzo leti nga enawini.” (Marka 7:7) Vugandzeri bya vona a byi ri bya “hava,” kumbe lebyi nga pfuniki nchumu, hikuva va rhangise mindhavuko ya vona ematshan’weni yo tiyiseka leswaku va endla leswi Xikwembu xi swi lavaka.

Ematshan’weni yo seketela vonelo ra leswaku ku ni tindlela to tala to tshinela eka Xikwembu, Bibele yi dyondzisa leswaku ku ni ndlela yin’we ntsena. Matewu 7:13, 14 yi ri: “Nghenani hi nyangwa leyo khuma; hikuva gondzo leri yisaka endzovisweni ri anamile ri tlhela ri pfuleka, naswona va tele lava nghenaka ha rona; kambe nyangwa leyi yisaka evuton’wini yi khumile, ni gondzo ra kona ri larile, naswona a hi vangani lava ri kumaka.”

Ndlela leyi ku tiva ntiyiso swi ku pfunaka ha yona: Ehleketa ndlela leyi a wu ta titwa ha yona loko u leteriwe tin’hweti to hlayanyana leswaku u ta va xitsutsumi naswona u hete mphikizano u ri exiyin’weni xo sungula, kambe u byeriwa leswaku sagwadi a wu nge ri kumi hileswi u tluleke wun’wana wa milawu lowu a wu nga wu tivi. U nga ha vona onge matshalatshala ya wena hinkwawo ma ve nyuku wa mbyana. Xana nchumu wo fana ni lowu wa endleka eku gandzeleni ka hina Xikwembu?

Loko muapostola Pawulo a fanisa vugandzeri bya hina ni mphikizano wo tsutsuma u tsale a ku: “Hambiloko munhu a hlanganyela emphikizanweni emintlangweni, a nga tlhandlekiwi harhi handle ka loko a hlanganyele emphikizanweni hi ku ya hi milawu ya kona.” (2 Timotiya 2:5) Xikwembu xa hi amukela loko hi xi gandzela “hi ku ya hi milawu ya kona,” ku nga ndlela leyi xi yi amukelaka. A hi nge amukeriwi hi Xikwembu loko hi ringeta ku tihlawulela ndlela ya hina yo xi gandzela ku fana ni xitsutsumi lexi nga ta ka xi nga wini loko xi tsutsuma kun’wana ni ku n’wana laha xi lavaka kona.

Leswaku hi tsakisa Xikwembu, vukhongeri bya hina a byi fanelanga byi vulavula mavunwa ha xona. Yesu u te: “Vagandzeri va ntiyiso va . . . ta gandzela Tatana hi moya ni ntiyiso.” (Yohane 4:23) Hi dyondza ndlela ya ntiyiso yo ya eka Xikwembu eRitweni ra xona, ku nga Bibele.—Yohane 17:17.a

[Nhlamuselo ya le hansi]

[Marito lama tshahiweke exihlokweni lama nga eka tluka 8]

Xana vukhongeri hinkwabyo byi dyondzisa vanhu ku gandzela Xikwembu hi ndlela leyi xi yi amukelaka?