Xana U Tshame U Titwa Onge A Wu Faneleki Ku Va eXikarhi Ka Vanhu Van’wana?

MUNHU loyi a titwaka onge a nga faneleki ku va exikarhi ka vanhu van’wana hi loyi vanhu van’wana va nga n’wi amukeriki eka ntlawa wa vona. A nga ha va a hambana na vona hi nhlonge, hi rixaka, hi ndlela yakwe yo vulavula kumbe yo endla swilo. Xana na wena u tshame u titwa hi ndlela yoleyo?—a

A hi buleni hi wanuna loyi na yena a titweke hi ndlela yoleyo. Vito rakwe i Mefiboxete. A hi tweneni leswaku a a ri mani ni xivangelo xo va a titwe hi ndlela yoleyo. Loko u titwa u nga faneleki ku va exikarhi ka vanhu van’wana, u nga dyondza swo tala eka Mefiboxete.

Mefiboxete a a ri n’wana wa Yonathani, munghana lonkulu wa Davhida. Emahlweni ko va Yonathani a dlayiwa enyimpini, u byele Davhida a ku: ‘U n’wi khoma kahle n’wana wa mina.’ Davhida u ve hosi. Endzhaku ka malembe u ma tsundzukile marito ya Yonathani naswona Mefiboxete a ha hanya. Loko a ha ri ntsongo, u weriwe hi mhangu. A nga ha ta kota ku famba vutomi byakwe hinkwabyo. Xana wa xi vona xivangelo xo va a titwe a nga faneleki?—

Davhida a a lava ku n’wi endlela leswinene n’wana wa Yonathani. Kutani Davhida u hlele leswaku muti wa Mefiboxete wu va ekusuhi ni wa yena eYerusalema naswona u dye etafuleni ra Davhida. Wanuna la vuriwaka Ziba, swin’we ni vana vakwe ni malandza yakwe, va nyikiwe Mefiboxete leswaku va va malandza yakwe. Hakunene Davhida u n’wi xiximile n’wana wa Yonathani! Xana wa swi tiva leswi endlekeke endzhaku ka sweswo?—

Davhida u sungule ku va ni swiphiqo emutini wakwe. Absalomu, un’wana wa vana va Davhida, u n’wi pfukerile kutani a ringeta ku n’wi tekela vuhosi. Davhida a a fanele a tsema a ri vona leswaku a ponisa vutomi byakwe. Mefiboxete u lave ku famba na Davhida tanihi leswi vo tala va fambeke na yena. Vanghana volavo va Davhida a va swi tiva leswaku a ri hosi leyi fanelekaka. Kambe Mefiboxete a nga fambanga hileswi a tsandzeka ku famba.

Kutani Ziba u byele Davhida leswaku Mefiboxete u sale hileswi a lava ku va hosi. Davhida u kholwe mavunwa wolawo! Hiloko a nyika Ziba nsimu hinkwayo ya Mefiboxete. A swi tekanga nkarhi leswaku Davhida a hlula Absalomu kutani a tlhelela eYerusalema. Sweswi Davhida a a lava leswaku Mefiboxete a tivulela hi yexe leswaku ha yini a nga fambanga. Davhida u endle xiboho xa leswaku Mefiboxete na Ziba va fanele va avelana nsimu. Xana u ehleketa leswaku Mefiboxete u endle yini?—

A nga gungulanga a vula leswaku xiboho xa Davhida a xi twali. Mefiboxete a a swi tiva leswaku hosi yi lava ku rhula leswaku yi ta wu endla kahle ntirho wa yona. Kutani u vule leswaku Ziba a teka nsimu hinkwayo. Lexi a xi ri xa nkoka eka Mefiboxete hileswaku Davhida nandza wa Yehovha a vuyile leswaku a ta va hosi eYerusalema.

Mefiboxete u xaniseke swinene. Minkarhi yo tala a titwa a nga faneleki ku va exikarhi ka vanhu van’wana. Kambe Yehovha a n’wi rhandza naswona u n’wi khathalerile. Xana hi nga dyondza yini emhakeni leyi?— Hambiloko hi endla leswi nga swinene, swi nga ha endleka van’wana va hi hembela. Yesu u te: “Loko misava yi mi venga, ma swi tiva leswaku yi ndzi vengile yi nga si mi venga.” Hambi ku ri Yesu vanhu va n’wi dlayile! Hi nga tiyiseka leswaku loko hi endla leswi nga swinene, Yehovha, la nga Xikwembu xa ntiyiso, u ta hi rhandza naswona ni N’wana wakwe, Yesu u ta endla hilaha ku fanaka.