Swivutiso Swa Vahlayi

Hikwalahokayini 2 Samuwele 21:7-9 yi vula leswaku Davhida u ‘twele Mefiboxete vusiwana’ kambe a tlhela a lerisa leswaku a dlayiwa?

Van’wana lava hlayeke hi mhaka leyi va tivutise leswi fanaka. Eka tindzimana leti hi kuma leswaku a ku ri ni va Mefiboxete vambirhi naswona hi nga dyondza swo karhi loko hi kambisisa mhaka leyi.

Sawulo Hosi ya Israyele a a ri ni majaha ya nkombo ni vanhwana vambirhi. Mativula yakwe a ku ri Yonathani. Hi ku famba nkarhi hosi Sawulo ni nsati wakwe lontsongo Risipa, va ve ni n’wana wa jaha loyi va n’wi thyeke Mefiboxete. Lexi hlamarisaka, Yonathani na yena u thye n’wana wakwe wa jaha vito ra Mefiboxete. Sweswo swi endle leswaku n’wana ni ntukulu wa Hosi Sawulo va va vamavizweni.

Hi ku famba ka nkarhi, Hosi Sawulo u jikele Vagibiyoni lava a va tshama ni Vaisrayele hi xikongomelo xo va yayarhela. Swi tikomba ku dlayiwe vo tala va vona. Sweswo a swi bihe ngopfu. Hikwalahokayini? Hikuva hi nkarhi wa Yoxuwa, tindhuna ta Vaisrayele ti endle ntwanano wa ku rhula ni Vagibiyoni.—Yox. 9:3-27.

Ntwanano wolowo a wa ha tirha enkarhini wa Hosi Sawulo. Ematshan’weni yo xixima ntwanano wolowo, yena u ringete ku herisa rixaka ra Vagibiyoni. Sweswo swi endle leswaku ‘Sawulo ni ndyangu wakwe va va ni nandzu wa ngati.’ (2 Sam. 21:1) Eku heteleleni Davhida u ve hosi. Vagibiyoni lava poneke va n’wi byele hi nandzu lowu wo chavisa. Davhida u va vutise leswaku a va lava ku rihiwa hi yini hikwalaho ka swiendlo swa Sawulo swo biha leswi a va endleke swona leswaku Yehovha a ta kota ku katekisa tiko. Vagibiyoni a va lavanga ku rihiwa hi mali kambe va lave leswaku ku dlayiwa vana va nkombo va Sawulo loyi ‘a bohe kungu ra ku va lovisa.’ (Tinhl. 35:30, 31) Davhida u pfumerile.—2 Sam. 21:2-6.

Loko ku endleka leswi, Sawulo na Yonathani se a va fele enyimpini kambe Mefiboxete n’wana wa Yonathani a ha hanya. Loko a ha ri ntsongo u humeleriwe hi mhangu leyi endleke leswaku a lamala naswona a nga katsekanga eka rhengu ro hlasela Vagibiyoni. Tanihi vanghana Davhida na Yonathani va endle ntwanano lowu a wu ta vuyerisa vana va Yonathani ku katsa na Mefiboxete. (1 Sam. 18:1; 20:42) Bibele yi ri: ‘Hosi Davhida u n’wi twele vusiwana Mefiboxete n’wana wa Yonathani, n’wana wa Sawulo, hikwalaho ka xihlambanyo lexi endliweke emahlweni ka Yehovha.’—2 Sam. 21:7.

Nilokoswiritano, Davhida u endlele Vagibiyoni leswi va swi kombeleke. U nyikete vana vambirhi va Sawulo leswaku va dlayiwa naswona un’wana wa vona a ku ri Mefiboxete ku katsa ni vatukulu va Sawulo va ntlhanu. (2 Sam. 21:8, 9) Xiboho xexo xa Davhida xi endle leswaku nandzu wa ngati wu hela etikweni.

Hi dyondza swin’wana emhakeni leyi. Nawu wa Xikwembu a wu ri erivaleni, wu te: “Vana a va fanelanga va dlayiwa hikwalaho ka swidyoho swa vatata wa vona.” (Det. 24:16) Yehovha a ta va a nga pfumelanga leswaku vana vambirhi va Sawulo ni vatukulu vakwe va ntlhanu va fela sopo nyama va nga dyanga. Nawu a wu engeta wu ku: “Munhu u fanele a fela xidyoho xa yena n’wini.” Swi vonaka onge vana vambirhi va Sawulo ni vatukulu vakwe va ntlhanu lava dlayiweke va katsekile loko Sawulo a ringeta ku yayarhela Vagibiyoni. Sweswo swi endle leswaku va fela swidyoho swa vona.

Mhaka leyi yi hi dyondzisa leswaku munhu a nge endli swilo swo biha ivi a tiyimelela hi ku vula leswaku wo landzela nkongomiso. Xivuriso xa le Bibeleni xi ri: “Basisela milenge ya wena ndlela, tindlela ta wena hinkwato ti ta va tinene.”—Swiv. 4:24-27; Efe. 5:15.