Ntiyiso Wu Nga Cinca Vutomi Bya Wena

U NGA ha va u twe kumbe u dyondzisiwe man’wana ya mavunwa malunghana ni Xikwembu lawa swihloko leswi swa nxaxamelo swi ma paluxeke. Hambiswiritano, u nga ha kanakana ku cinca tidyondzo leti u pfumelaka eka tona, ngopfu-ngopfu loko u pfumele man’wana ya mavunwa wolawo ku ringana nkarhi wo leha.

Ku kanakana koloko ka twisiseka. Tikereke tin’wana a ti pfumeli ku pimanisa tidyondzo ta tona ni leswi Bibele yi swi vulaka. Tin’wana ti ringeta ku sirhelela tidyondzo ta tona ta mavunwa, hi ku vula leswaku Bibele yi rharhanganile, a yi endleriwanga ku twisisiwa hi un’wana ni un’wana. Hambiswiritano, vo tala va vadyondzisiwa va Yesu a ku ri vanhu lava tolovelekeke, lava nga dyondzekangiki naswona hi ku hatlisa va twisise leswi a swi dyondzisa.—Mintirho 4:13.

U nga ha anakanya leswaku a wu na ripfumelo loko u endla xiboho xo kambisisa loko tidyondzo leti u ti pfumelaka ti ri ntiyiso. Kambe, xana swa twala leswaku Xikwembu a xi nge swi tsakeli leswaku u hlaya Bibele, ku nga rungula leri xi ri tsaleleke vanhu, leswaku u twisisa leswi xi swi kombelaka eka wena? Ku hambana ni sweswo, Rito ra xona ri hi khutaza ku va hina hi hexe hi tikambisisela Matsalwa, ri ri: “Tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.”—Varhoma 12:2.

I swa nkoka leswaku u kuma ntiyiso malunghana ni Xikwembu, ku nga ri leswaku u dyondza nchumu wuntshwa, kambe hikwalaho ka leswi wu nga ta endla leswaku vutomi bya wena byi antswa. (Yohane 8:32) Deanne, loyi a boxiweke eka xihloko xo sungula, sweswi ripfumelo rakwe ri sekeriwe eRitweni ra Xikwembu. U ri: “A ndzi nga swi xiyi leswaku Matsalwa ma veka timhaka erivaleni kukondza ndzi sungula ku dyondza Bibele. Sweswi ndzi tiva Yehovha, ku nga ri Xikwembu lexi nga riki na xinghana kambe tanihi Tata wa mina wa rirhandzu wa le tilweni. Ndzi kume xikongomelo xa xiviri evuton’wini.”

Kumbexana u dyondze Bibele emahlweni ko va u vona leswaku wa vuyeriwa. Loko swi ri tano, u nga wi mapa. Ku ringeta ku twisisa Bibele loko u dyondzisiwe mavunwa malunghana ni Xikwembu swi fana ni ku ringeta ku lunghisa muchini u tirhisa buku leyi hoxeke leyi vulavulaka hi matirhiselo ya wona. U nga ha lunghisa tiphatsi tin’wana ta muchini kambe u lahla thawula hikwalaho ko tshoveka mbilu loko u nga swi koti ku lunghisa muchini hinkwawo. Kambe loko u tirhisa buku leyinene u ta lunghisa muchini hi ndlela leyi humelelaka. Xana u nga lava ku tirhisa buku leyinene kutani u dyondza malunghana ni Xikwembu?

Xana u lava ku dyondza ntiyiso malunghana ni Xikwembu? Tihlanganise ni Timbhoni ta Yehovha ta le ndhawini ya ka n’wina kumbe u tsalela eka adirese leyi faneleke eka leti nga eka tluka 4 ra magazini lowu, leswaku u ta kuma dyondzo ya mahala ya le kaya ya Bibele.

[Marito lama tshahiweke exihlokweni lama nga eka tluka 9]

“Tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.”—VARHOMA 12:2.