U Nga Swi Kota Ku Hlawula Vumundzuku Lebyi Humelelaka—Njhani?

XANA u nga byi kuma njhani vutomi lebyi humelelaka hakunene? Ndlela yin’wana i ku tirhisa vuswikoti lebyi xiyekaka lebyi u nga na byona leswaku u xiyisisa vuyelo bya swiboho leswi tekaka nkarhi wo leha leswi u swi endlaka sweswi.

Hakunene, u nga ha kuma swi tika ku endla swiboho leswi nga ta ku vuyerisa vutomi bya wena hinkwabyo. Ha yini? Hikuva vanhu vo tala namuntlha va swi lava hi ku hatlisa swilo leswi va swi navelaka. Hi xikombiso, u nga ha xiya leswaku ku tirhisa ndzayo ya Bibele swi nga ku pfuna leswaku u va ni ndyangu lowu tiyeke. (Vaefesa 5:22–6:4) Kambe leswaku u endla tano, nkarhi na nkarhi u fanele u heta nkarhi u ri ni ndyangu wa wena, loko u ri karhi u lwisana ni ntshikilelo wo va u heta nkarhi wo tala u ri entirhweni, eka vuhungasi kumbe ku titsakisa. Tanihi le ka swilo swo tala swa vutomi, u fanele u hlawula exikarhi ka ku titsakisa swa xinkarhana ni ku humelela nkarhi wo leha. Xana u nga ma kuma njhani matimba lama lavekaka leswaku u kota ku hlawula ndlela ya vutlhari? Xiya magoza ya mune lama landzelaka.

1 Anakanya Hi Vuyelo Bya Swiboho Swa Wena

Loko u fanele u endla xiboho, anakanya hi vuyelo lebyi nga vaka kona. Bibele yi ri: “U tlharihile la voneke khombo kutani a tumbela.” (Swivuriso 22:3) Loko u langutisa vuyelo lebyi nga vaka kona, u nga ha titwa u susumeteleka ku papalata xiendlo lexi nga ni khombo. Hi hala tlhelo, loko u anakanya hi vuyelo bya nkarhi wo leha lebyi nga vaka kona bya xiboho xa vutlhari, u nga ha tiyisa ku tiyimisela ka wena ko endla xiboho xa vutlhari.

Tivutise: ‘Xana byi ta va byihi vuyelo bya xiboho xa mina endzhaku ka lembe kumbe hambi ku ri malembe ya khume kumbe 20? Xana byi ta va byihi vuyelo eka mintlhaveko ni le ka rihanyo ra mina? Xana xiboho xa mina xi ta wu khumba njhani ndyangu wa mina ni van’wana lava ndzi khathalaka ha vona?’ Swivutiso swa nkoka swinene leswi u faneleke u tivutisa swona hi leswi nge: ‘Xana xiboho xa mina xi ta xi tsakisa Xikwembu? Xana xi ta byi khumba njhani vuxaka bya mina na xona?’ Tanihi leswi Bibele yi huhuteriweke hi Xikwembu, yi nga ku pfuna leswaku u twisisa leswi xi tsakisaka ni ku ku lemukisa eka makhombo lawa minkarhi yin’wana u nga ha ma honisaka.—Swivuriso 14:12; 2 Timotiya 3:16.

2 Kambisisa Swiboho Hi Wexe

Ematshan’weni yo tiendlela swiboho hi voxe, vanhu vo tala va tekelela vanhu lava nga ekusuhi na vona. Kambe ndlela yo karhi ya vutomi a yi nge endli leswaku u humelela ntsena hileswi yi nga duma. Kambisisa swiboho hi wexe. Xiya xikombiso xa Natalie.a Wa hlamusela: “A ndzi lava ku tekiwa kahle. Kambe a ndzi swi vona leswaku a ndzi nge n’wi kumi nuna hikwalaho ka ndlela leyi a ndzi hanya ha yona. Vanghana va mina hinkwavo lava a ndzi ri na vona ekholichi a va tlharihile swinene. Kambe va hambete va endla swiboho swa vuphukuphuku evuton’wini bya vona. Nkarhi na nkarhi a va cinca majaha kumbe tintombhi. Ku fana na vona, a ndzi rhandzana na majaha yo hlayanyana. Ndlela leyi a ndzi hanya ha yona yi ndzi karhate swinene emintlhavekweni.”

Natalie u sungule ku dyondza Bibele ni Timbhoni ta Yehovha. U ri: “Exikarhi ka Timbhoni ndzi vone vantshwa lava nga ni ntsako ni vanhu lava nga ni vukati lebyi tiyeke. Hambileswi a swi nga ndzi oloveli, ndzi cince ndlela leyi a ndzi hanya ha yona hakatsongo-tsongo.” Vuyelo byi ve byihi? Natalie u ri: “Minkarhi hinkwayo a ndzi lava ku tekiwa hi munhu loyi ndzi n’wi xiximaka swinene. Hi ku famba ka nkarhi, ndzi tekiwe hi wanuna loyi a nga eka vukhongeri lebyi ndzi pfumelaka eka byona. Ndza pfumela leswaku Xikwembu xi ndzi nyike vutomi byo antswa bya ndyangu ku tlula lebyi ndzi nga si tshamaka ndzi lorha ha byona.”

3 Anakanya Ndlela Leyi Swiboho Leswi U Swi Endlaka Sweswi Swi Nga Ku Khumbaka Ha Yona eNkarhini Lowu Taka

Leswaku u papalata ku anakanya hi swiboho leswi nga ni vuyelo bya xinkarhana, u fanele ku tlhela u va ni mianakanyo leyinene hi vumundzuku lebyi u byi lavaka ni ku hlela ndlela leyi u nga ta byi fikelela ha yona. (Swivuriso 21:5) U nga anakanyi ntsena hi malembe ya 70 kumbe 80 lawa munhu a hanyaka wona. Ematshan’weni ya sweswo, tivone u ri karhi u tiphina hi vumundzuku lebyi nga heriki lebyi Bibele yi byi hlamuselaka.

Bibele yi hlamusela leswaku hi gandzelo ra nkutsulo ra Kreste Yesu, Xikwembu xi endlele vanhu lunghiselelo ra leswaku va kuma vutomi lebyi nga heriki. (Matewu 20:28; Varhoma 6:23) Xikwembu xi tshembisa leswaku ku nga ri khale xikongomelo xa xona xo sungula hi vanhu ni hi misava xi ta hetiseka. Lava rhandzaka Xikwembu va ta va ni lunghelo ro tiphina hi vutomi hilaha ku nga heriki emisaveni yo saseka leyi vuyeteriweke. (Pisalema 37:11; Nhlavutelo 21:3-5) Vumundzuku byebyo u nga byi kuma loko u anakanya hi ndlela leyi swiboho leswi u swi endlaka sweswi swi nga ku khumbaka ha yona enkarhini lowu taka.

4 Tikarhatele Ku Fikelela Tipakani Ta Wena

Xana u fanele u endla yini leswaku u ta va xiphemu xa vumundzuku byebyo lebyi tshembisiweke? Sungula hi ku nghenisa vutivi hi Xikwembu. (Yohane 17:3) Vutivi lebyi kongomeke bya Bibele byi ta tiyisa ntshembo wa wena wa leswaku switshembiso swa Xikwembu hi vumundzuku swi ta hetiseka. Ripfumelo ro tano ri nga ku tiyisa leswaku u endla ku cinca kun’wana ni kun’wana loku lavekaka leswaku u ta amukeriwa hi Xikwembu.

Xiya ntokoto wa Michael. U ri: “Ndzi sungule ku nwa byala ku tlula mpimo ni ku tirhisa swidzidziharisi loko ndza ha ri ni malembe ya 12. A ndzi wela eka ntlawa wa swigevenga naswona a ndzi ehleketa leswaku ndzi ta fa emahlweni ko va ndzi va ni malembe ya 30. Ku hlundzuka ka mina ni ku tshoveka mbilu swi endle leswaku ndzi ringeta ku tidlaya ko hlayanyana. A ndzi ri ni ntshembo wa leswaku ndzi nga kuma swilo swo tala evuton’wini kambe a ndzi swi kumanga.” Loko Michael a ri exikolweni xa le henhla, munhu loyi a a katseka na yena eka ntlawa wa swigevenga u sungule ku dyondza Bibele ni Timbhoni ta Yehovha. Michael na yena u pfumele ku dyondza.

Leswi Michael a swi dyondzeke eBibeleni swi cince ndlela leyi a byi languta ha yona vumundzuku byakwe. U ri: “Ndzi dyondze leswaku enkarhini lowu taka misava yi ta vuyeteriwa yi va paradeyisi naswona vanhu va ta hanya hi ku rhula handle ko karhateka. Ndzi sungule ku vona swilo leswi tanihi vumundzuku bya mina. Xikongomelo xa mina ku ve ku aka vuxaka lebyinene na Yehovha. Kambe a hi minkarhi hinkwayo a ndzi kota ku tsakisa Yehovha. Hambiloko ndzi sungule ku dyondza Bibele, minkarhi yin’wana a ndzi pfa ndzi dakwa. Ndzi tlhele ndzi rhandzana ni nhwanyana.”

Xana Michael u swi kotise ku yini ku hlula swiphiqo leswi kutani a cinca mahanyelo yakwe hi ndlela leyi humelelaka? U ri: “Munhu loyi a a ndzi dyondzisa Bibele u ndzi khutaze ku yi hlaya siku ni siku ni ku tihlanganisa ni vanhu lava lavaka ku tsakisa Xikwembu. A ndzi swi xiya leswaku ntlawa wa swigevenga lowu a ndzi tihlanganisa na wona a wu hambeta wu ndzi kucetela ku endla swilo swo biha. Hambileswi a ndzi wu teka wu fana ni swirho swa ndyangu wa mina, ndzi nambe ndzi tshika ku tihlanganisa na wona.”

Michael u tivekele tipakani ta xinkarhana leti n’wi pfuneke leswaku a fikelela tipakani letikulu leti endleke leswaku vutomi byakwe byi fambisana ni milawu ya Xikwembu. Na wena u nga endla hilaha ku fanaka. Tsala tipakani ta wena ta nkarhi wo leha ni magoza lama nga ta ku pfuna leswaku u ti fikelela. Byela vanhu lava nga ta ku seketela tipakani ta wena naswona va kombeli leswaku va ku pfuna u kambisisa nhluvuko wa wena.

U nga tshiki ku dyondza hi Xikwembu ni ku tirhisa nkongomiso wa xona evuton’wini bya wena. Sweswi teka magoza yo va u rhandza Xikwembu ni Rito ra xona, ku nga Bibele. Loko ri hlamusela munhu loyi a tirhisaka milawu ya Bibele, Rito ra Xikwembu ri ri: “Hinkwaswo leswi a swi endlaka swi ta humelela.”—Pisalema 1:1-3.

[Nhlamuselo ya le hansi]