Xana Ku Ni Loyi A Yingisaka Swikhongelo?

“A ndzi kanakana leswaku Xikwembu xi kona. Kambe minkarhi yin’wana a ndzi khongela. A ndzi ri ni ntshembo wa leswaku a ku ri ni munhu loyi a a ndzi yingisela hambileswi a ndzi nga tiyiseki ha swona. A ndzi ri hava ntsako ni xikongomelo evuton’wini. A ndzi chava ku pfumela eka Xikwembu hikuva a ndzi ehleketa leswaku i vanhu lava tsaneke ntsena lava pfumelaka eka Xikwembu.”—PATRICIA,a IRELAND.

XANA u tshame u titwa ku fana na Patricia? Xana wa khongela hambiloko u kanakana leswaku Xikwembu xi kona? Loko swi ri tano, ku ni vanhu vo tala lava kanakanaka loko Xikwembu xi ri kona. Xiya leswi landzelaka.

◼ Nkambisiso lowu endliweke eBritain eka vanhu lava ringanaka 2 200 wu kombise leswaku i tiphesente ta 22 ntsena leti pfumelaka leswaku ku ni Xikwembu lexi tumbuluxeke misava xi tlhela xi yingisa swikhongelo swa hina. Kambe nkambisiso wolowo wu kombisa leswaku vanhu lava endlaka 55 wa tiphesente va khongela nkarhi na nkarhi.

◼ Nkambisiso lowu endliweke eka vanhu va 10 000 eka matiko-nkulu ya mune wu kombise leswaku eka vanhu lava ku vulavuriweke na vona lava vulaka leswaku Xikwembu a xi kona, vanhu va kwalomu ka 30 wa tiphesente va khongela.

Ha Yini Va Kanakana?

Wanuna wo huma eNghilandhi loyi vito rakwe ku nga Allan u ri: “A ndzi vula leswaku a ndzi pfumeli eka Xikwembu hikuva a ndzi ehleketa leswaku vukhongeri a byi endleriwe ku lawula vanhu ni ku endla mali. Nakambe a ndzi ehleketa leswaku loko Xikwembu xi ri kona, a ku nga ta va ni vuhomboloki byo tala swonghasi. Kambe minkarhi yin’wana a ndzi khongela hambileswi a ndzi nga tiyiseki leswaku ndzi vulavula na mani. Nakambe a ndzi tivutisa leswaku, ‘Ndzi tise ku yini laha misaveni?’”

Munhu un’wana ni un’wana loyi a titwaka hi ndlela yoleyo u ni swivangelo swakwe swo kanakana loko swikhongelo swi hlamuriwa. Eka swiendlakalo swo tala, ku kanakana ku nga ha vangiwa hi swivutiso leswi nga hlamuriwangiki, swo tanihi leswi landzelaka:

◼ Xana ku ni Muvumbi?

◼ Ha yini minkarhi yo tala vukhongeri byi endla swilo swo biha?

◼ Ha yini Xikwembu xi pfumelela ku xaniseka?

Loko wo tiva tinhlamulo ta swivutiso leswi, xana u ta va ni ntshembo swinene loko u khongela?

[Nhlamuselo ya le hansi]