Ha Yini Xikwembu A Xi Lava Leswaku Vagandzeri Va Xona Va Tekana Ni Vagandzeri-kulobye Ntsena?

▪ Nawu lowu Xikwembu xi wu nyikeke tiko ra Israyele a wu katsa xileriso lexi, lexi khumbaka vanhu va matiko lawa a ya va rhendzerile lexi a xi ku: “U nga tshuki u endla ntwanano wa ku tekelana na wona. U nga tshuki u nyika n’wana wa wena wa nhwanyana eka n’wana wakwe wa jaha, naswona n’wana wakwe wa nhwanyana u nga tshuki u n’wi tekela n’wana wa wena wa jaha.” (Deteronoma 7:3, 4) Xana a ku ri xihi xivangelo xa nawu lowu?

Yehovha a a swi tiva leswaku Sathana a a lava ku hambukisa vanhu va Yena, hi ku va endla va gandzela swikwembu swa hava. Xisweswo, Xikwembu xi lemukise valandzeri va xona leswaku vanhu lava nga riki vapfumeri va “ta hambukisa n’wana wa wena wa jaha, a nga ha ndzi landzeli, kunene va ta tirhela swikwembu swin’wana.” A va langutane ni ntlhontlho. Loko tiko ra Israyele a ro wela endzingweni wa ku gandzela swikwembu swa hava, Xikwembu a xi nga ha ta ri tsakela kumbe ku ri sirhelela, leswi a swi ta endla leswaku valala va rona va ri hlasela hi ku olova. Kutani xana tiko leri a ri ta n’wi humesa njhani Mesiya loyi a tshembisiweke? Swi le rivaleni leswaku Sathana a ri ni xivangelo lexi twalaka xo yenga Vaisrayele leswaku va tekana ni vanhu lava nga riki vapfumeri.

Hi hala tlhelo, tsundzuka leswaku Xikwembu a xi khathala hi vanhu va xona ha un’we un’we. A xi swi tiva leswaku ntsako ni vuhlayiseki bya un’wana ni un’wana wa vona a byi titshege hi ku va va va ni vuxaka bya le kusuhi na xona tanihi Xikwembu xa vona. Xana a ku ri ni xivangelo lexi twalaka xa leswaku Yehovha a khathala hi nkucetelo wo biha lowu munghana wa vukati loyi a nga riki mupfumeri a nga vaka na wona eka vanhu va yena? Xiya xikombiso xa Hosi Solomoni. A a xi tiva xileriso xa Yehovha malunghana ni vavasati lava nga riki vapfumeri lexi nge: “[Va] ta voyamisela mbilu ya n’wina leswaku yi landzela swikwembu swa [vona].” Leswi a a ri wanuna wo tlhariha swinene, kumbexana u vone onge xileriso lexi a xi nga tirhi eka yena. Kutani u xi be hi makatla. Xana ku ve ni vuyelo byihi? “Hakatsongo-tsongo vasati vakwe va voyamisa mbilu yakwe . . . leswaku yi landzela swikwembu swin’wana.” Wa nga vona khombo ro tano! Solomoni a a nga ha tsakeriwi hi Yehovha naswona vanhu lava a a va fuma va hambanisiwe hi ndlela leyi vavaka hikwalaho ka ku nga tshembeki ka yena.—1 Tihosi 11:2-4, 9-13.

Van’wana va nga ha ehleketa leswaku nawu lowu a wu nga tirhi eka vanhu hinkwavo. Hi xikombiso, Muisrayele la vuriwaka Mahaloni u teke wansati wa Mumowabu loyi a a vitaniwa Rhuti naswona u ve mupfumeri la hisekaka. Kambe ku teka vavasati lava nga Vamowabu a swi ri ni khombo. Mahaloni a nga bumabumeriwanga hileswi a tekeke nhwana wa Mumowabu; u fe a ha ri ntsongo kumbexana emahlweni ko va Rhuti a va mugandzeri wa Yehovha. Buti wa Mahaloni ku nga Khiliyoni u teke Orpa wa Mumowabu loyi a yeke emahlweni a gandzela “swikwembu swakwe.” Hi hala tlhelo, Bowasi u teke Rhuti endzhaku ka loko ku hundze malembe a ri mupfumeri. Entiyisweni, hi ku famba ka nkarhi, Vayuda va teke Rhuti tanihi “muproselita lonene.” Vukati bya Rhuti na Bowasi a byi ri nkateko eka vona havambirhi.—Rhuti 1:4, 5, 15-17; 4:13-17.

Xana swa twala ku vula leswaku xikombiso xa Mahaloni na Rhuti xi lwisana ni xileriso xa Yehovha xo va vagandzeri va tekana ni vagandzeri-kulobye ntsena? Xana ku anakanya sweswo a swi fani ni ku vona mugemburi loyi a wineke mali yo tala ivi u hetelela hi leswaku ku gembula i ndlela leyinene ya ku tikumela mali yo tihanyisa?

Bibele yi khutaza Vakreste namuntlha ku va va teka “eHosini ntsena.” Yi hi lemukisa leswaku hi nga “paniwi ni lava va nga riki vapfumeri.” Xilemukiso xexo xi kongomisiwe eka Vakreste va ntiyiso lava sweswi va nga eku laveni ka munghana wa vukati. Bibele yi nyikela ndzayo leyi pfunaka eka lava se va nga tekana ni lava nga riki vapfumeri, leyi va pfunaka ku va va endla xiyimo lexi nga ntlhontlho xi va xinene. (1 Vakorinto 7:12-16, 39; 2 Vakorinto 6:14) Xilemukiso xexo xi kombisa leswaku Yehovha Xikwembu, Musunguri wa vukati, u lava leswaku hi tsaka tanihi vagandzeri vakwe—hambiloko hi nghenele vukati kumbe hi nga byi nghenelanga.