NHLOKO-MHAKA YA XIFUNENGETO: LESWI HI SWI DYONDZAKA EKA MUXE
Muxe A Ku Ri Mani?
Xana u ehleketa yini loko u twa vito leri nge Muxe? Xana u ehleketa hi . . .
ricece leri fihliweke eNambyeni wa Nayili hi mana wa rona exirhundzwini?
xifanyetana lexi kuriseriweke emafurheni aEgipta hi n’wana wa Faro kambe xi nga rivalangiki leswaku a xi ri Muisrayele?
wanuna loyi a a ri murisi eMidiyani ku ringana malembe ya 40?
wanuna loyi a vulavuleke na Yehovhaa emahlweni ka xihlahla lexi pfurhaka?
wanuna loyi hi xivindzi a kombeleke hosi ya le Egipta leswaku yi ntshunxa Vaisrayele evuhlongeni?
wanuna loyi hi ku kongomisiwa hi Xikwembu a tiviseke hi Makhombo ya Khume lama weleke tiko ra Egipta loko hosi ya rona yi lwisane na Xikwembu xa ntiyiso?
wanuna loyi a rhangeleke Vaisrayele eka riendzo ra vona ro suka aEgipta?
wanuna loyi a tirhisiweke ku ava Lwandle ro Tshwuka?
wanuna loyi a nyikeke Vaisrayele Milawu ya Khume leyi humaka eka Xikwembu?
MUXE u endle swilo leswi hinkwaswo ni swin’wana. A swi hlamarisi leswi wanuna loyi wo tshembeka a xiximiwaka swinene hi Vakreste, Vayuda ni Mamoslem.
Swi le rivaleni leswaku Muxe a a ri muprofeta loyi a kombiseke ‘ku xiximeka lokukulu.’ (Deteronoma 34:10-12) U pfumelele Xikwembu leswaku xi n’wi tirhisa hi ndlela leyikulu. Kambe Muxe a a ri munhu wa nyama loyi a tolovelekeke. Ku fana na muprofeta Eliya, loyi a humeleleke etlhelo ka Muxe exivonweni hi nkarhi wa vutirheli bya Yesu bya laha misaveni, Muxe a a ri munhu loyi a nga ni “mintlhaveko yo fana ni ya hina.” (Yakobo 5:17; Matewu 17:1-9) Muxe u hlangavetane ni swiphiqo swo fana ni swa hina naswona u swi kotile ku swi hlula.
Xana u nga swi tsakela ku tiva leswaku u swi kotise ku yini? Xiya timfanelo tinharhu letinene leti Muxe a ti kombiseke ni leswi hi nga swi dyondzaka eka xikombiso xakwe.
a Yehovha i vito ra Xikwembu hilaha swi hlamuseriweke hakona eBibeleni.