Xana Swa Koteka Ku Hanya Vutomi Lebyi Nga Ni Xikongomelo?

HAKUNENE marito lawa i ntiyiso! Hakanyingi, vutomi emisaveni leyi byi tele hi “ku karhateka ni swilo swo biha.” Kumbexana u tshame u tivutisa u ku: ‘Xana swa koteka ku hanya vutomi lebyi nga ni xikongomelo sweswi?’

Xiya xikombiso xa Maria. Minkarhi hinkwayo a a ri munhu wa migingiriko, kambe sweswi u ni malembe ya 84 naswona a nga swi koti hambi ku ri ku huma endlwini hi yexe. U hanye kahle emianakanyweni kambe swi tikomba onge miri wakwe a wa ha tirhi. Xana swi nga kotekisa ku yini ku va a vona vutomi byakwe byi ri ni xikongomelo?

Ku vuriwa yini hi wena? Swi nga ha endleka leswaku minkarhi yin’wana u tshame u tivutisa loko ku ri hi leswaku vutomi bya wena byi ni xikongomelo. Swi nga ha endleka leswaku ntirho wa wena wa karharisa. Swi nga ha endleka leswaku vanhu a va na mhaka ni leswi u tirhaka hi matimba. Hambiloko swilo swi ku fambela kahle sweswi, swi nga ha endleka wa vilela hileswi nga ha humelelaka enkarhini lowu taka. Minkarhi yin’wana u nga titwa u ri ni xivundza kumbe u ri ni ntshikilelo. Swi nga ha endleka leswaku ndyangu wa wena wu tshama wu ri karhi wu holova ni ku lwa. U nga ha va u fele hi loyi u n’wi rhandzaka. Wanuna un’wana loyi a vuriwaka André a ri ekusuhi swinene ni tata wakwe loyi hi xitshuketa a sunguleke ku vabya ivi a fa. Eka André, a ku ri mhaka leyi vavaka swinene naswona yi siye vangwa leri a twaka onge a ri nge he pfuki ri pfalekile.

Ku nga khathariseki maxangu lawa hi nga ha langutanaka na wona, ku ni nchumu lowu hi lavaka ku wu tiva ngopfu: Xana swa koteka ku hanya vutomi lebyi nga ni xikongomelo? Hi nga kuma nhlamulo eka ndlela leyi wanuna loyi a hanyeke eka malembe ya 2 000 lama hundzeke a hanyeke ha yona, ku nga Yesu Kreste. Ku nga khathariseki swihinga leswi a hlangavetaneke na swona, Yesu a a hanya vutomi lebyi nga ni xikongomelo. Kutani na hina hi nga swi kota loko hi landzela xikombiso xakwe.